Juda lawpi chaynataq Israel lawpi Davidpa gobiernasqanmanta
11
Israel casta llapallan runakuna rispanmi Davidwan huñunakurqaku Hebron llaqtapi hinaspam Davidta nirqaku:
—Ñoqaykuqa kaniku qampa aylluykipunim.
2 Saul gobiernawachkaptinkupas qamqa ñawpaqmantaraqmi Israel tropakunata kamachirqanki.
Tayta Diosmi prometesurqanki:
“Qanmi oveja michiq hina Israel casta runaykunata gobiernanki hinaspam Israel nacionpi kamachinki” nispa.
3 Hebron llaqtapi Rey Davidpa kasqanmanmá hamurqaku Israel casta llapallan ancianokuna,
Rey Davidmi chaypi paykunawan contratota rurarqa Tayta Diospa qayllanpi.
Israel nacionpi gobiernananpaqmi Davidta aceitewan tallirqaku.
Chaynatam rurarqaku Samuelnintakama Tayta Diospa prometesqanman hina.
Murallasqa Sion llaqtapi David vencesqanmanta
4 Chaymantam David llapallan Israel tropakunawan Jerusalen llaqtaman rirqaku.
Jerusalen llaqtapa huknin sutinmi karqa Jebus.
Jebus casta runakunam chay lawpiqa yacharqaku.
5 Jebus casta runakunam Davidta nirqaku:
—Manam qamqa kayman yaykumuytaqa atiwaqchu —nispa.
Davidmi ichaqa dueñochakururqa chay murallasqa Sion llaqtata.
Chay Sion llaqtatam suticharqaku “Davidpa Llaqtan” nispa.
6 Davidmi nirqa:
—Pipas Jebus casta runakunata puntata atacaqmi kanqa llapallan tropakunapa kamachiqnin —nispa.
Sarviapa wawan Joab puntata seqaspa atacaruptinmi payta David churarqa llapallan tropakuna kamachiqpaq.
7 Davidmi yacharqa murallasqa llaqtapi chayraykum chay llaqtata suticharqaku “Davidpa Llaqtan” nispa.
8 Chaypa muyuriqninpim David llaqtata hatarichirqa,
chaytaqa hatarichirqa llaqtapa patanmanta muyuriqninkamam.
Mana tukusqa kaqkunatañataqmi Joab allichachirqa.
9 Davidta Llapallan Kamachiq Tayta Dios yanapaptinmi payqa aswan atiyniyoqraq rikurirurqa.
Davidpa valeroso soldadonkunamanta
10 Kaykunam karqa Davidpa soldadonkunapa valeroso jefenkuna hinaspa gobiernonpi kallpanchaqninkuna.
Paykunam Israel casta llapallan runakunapiwan Davidta kallpancharqaku chaynapi imaynam Tayta Diospa nisqanpi hina gobiernananpaq.
11 Davidpa valeroso soldadonkunamá karqa:
Hacmoni casta Jasobeam,
paymi karqa kimsa valeroso soldadokunapa jefen.
Paymi huk kutipi lanzanwan wañurachirqa kimsa pachak soldadokunata.
12 Paymanmi qatirqa Ahoa castamanta Dodo sutiyoq runapa churin Eleazar,
paymi karqa kimsa valerosokunapa huknin.
13 Paymi karqa Davidwan Pas-damim lawpi,
chay sitiopim Filistea runakuna huñunakururqaku peleanankupaq,
chaypitaqmi karqa cebada chakra.
Israel tropakuna Filistea runakunamanta lluptichkaptinkum
14 Eleazar chay cebada chakrapa chawpinpi churakuykuspan defienderqa hinaspam Filistea runakunata vencerurqa.
Chaynatamá Tayta Dios pasaypaqta vencerachirqa.
15 Kimsa chunka valeroso jefekunamantam kimsa rirqaku Davidpa pakakusqan qaqakunapi kasqan Adulam sutiyoq machayman,
Filistea runakunapa campamentonmi kachkarqa Refaim Qechwapi.
16 Davidmi karqa amparakunan sitiopi,
Filistea runakunapa tropankunañataqmi kachkarqa Belen llaqtapi.
17 Davidta yakunayaruptinmi nirqa:
—¡Piraq tomaykachiwanman Belen llaqta zaguanpa waqtanpi pozomanta yakuta!
—nispa.
18 Chay kimsa valeroso jefekunam Filistea tropakunapa campamentonman yaykuruspanku Belen llaqta zaguanpa waqtanpi pozomanta yakuta horqorurqaku hinaspam Davidman apamurqaku.
Davidmi ichaqa mana munarqachu chay yaku tomayta,
Tayta Diospaq ofrendata hina tallispanmi
19 nirqa:
¡Diosnilláy ¿tomaymanraqchu kay runakunapa yawarninpa chanin yakuta otaq wañuyman wischukuspanku apamuwasqanku yakuta?!
¡Chaytaqa amayá piensayllapas-piensasaqchu!
—nispa.
Chaynata nispanmi mana munarqachu tomayta.
Chay kimsan valeroso jefekunamá chaykunata rurarqaku.
20 Joabpa wawqen Abisaimi karqa kimsa chunka valeroso jefekunapa kamachiqnin.
Paymi huk kutipi lanzanwan kimsa pachak soldadokunata wañurachirqa.
Paypas reqsisqam karqa chay kimsan jefekuna hina.
21 Abisaimi chay kimsan valeroso jefekunamanta aswan reqsisqa karqa chaymi paykunapa jefen karqa.
Ichaqa manam igualarqachu chay kimsa valeroso jefekunapa rurasqanmanqa.
22 Cabseel llaqtamanta Joiadapa churin Benaia sutiyoq runapas valeroso kaspanmi achka hatun ruraykunata rurarqa.
Paymi wañurachirqa Moab nacionniyoq iskay alli-allin valeroso soldadokunata.
Huk punchawpas lastachkaptinmi uchkuman yaykuruspan chaypi wañurachirqa leonta.
23 Wañurachirqataqmi Egipto nacionniyoq hatunkaray runatapas,
paypa sayayninmi karqa yaqa iskay metro parten.
Chay Egipto nacionniyoq runam lanzawan armasqa kachkarqa,
paypa lanzanpa kaspinmi karqa telarpa rodillon hina rakusu.
Benaiam pawaykurqa huk kaspillawan hinaspam Egipto nacionniyoq runamanta lanzanta qechuruspa chaywan wañurachirqa.
24 Chaynaqa chay Joiadapa churin Benaia sutiyoq runapas chay rurasqanwanmi sinchi reqsisqa karqa kimsan valeroso jefekuna hina.
25 Kimsa chunka jefekunamantapas ancha reqsisqamá karqa,
chaywanpas manam igualarqachu chay kimsa valeroso jefekunapa rurasqanmanqa.
Benaiatam David churarurqa waqaychaqnin soldadokunapa jefenña kananpaq.
26 Wakin valeroso jefekunam karqa:
Joabpa wawqen Asael,
Belen llaqtayoq Dodopa churin Elhanan,
27 Harod lawmanta Samot,
Bet-pelet llaqtayoq Heles,
28 Tecoa llaqtayoq Iquespa churin Ira,
Anatot llaqtayoq Abiezer,
29 Husah casta Sibecai,
Ahoa casta Ilai,
30 Netofa llaqtayoq Maharai,
Netofa llaqtayoq Baanapa churin Heled,
31 Benjamin allpapi Gabaa llaqtayoq Rebaipa churin Itai,
Piraton llaqtayoq Benaia,
32 Gaas Wayqopi yachaq Hurai,
Bet-araba lawpi yachaq Abiel,
33 Bahurim llaqtayoq Azmavet,
Saalbim llaqtayoq Eliaba,
34 Gimso llaqtayoq Jasempa churinkuna,
Harar lawmanta Sagepa churin Jonatan,
35 Harar lawmanta Sacarpa churin Ahiam,
Urpa churin Elifal,
36 Mequer lawmanta Hefer,
Bet-pelet llaqtayoq Ahias,
37 Carmel llaqtayoq Hezrai,
Esbaipa churin Naarai,
38 Natanpa wawqen Joel,
Hagraipa churin Mibhar,
39 Amon nacionniyoq Selec,
Berot llaqtayoq Naharai,
paymi karqa Sarviapa wawan Joab sutiyoq runapa arman apaq,
40 Jatir llaqtayoq Irawan Gareb,
41 Het casta runa Urias,
Ahlaipa churin Zabad,
42 Ruben casta Sizapa churin Adina,
Adinam karqa Ruben castakunapa jefen,
paywantaqmi karqa kimsa chunka runakunapas.
43 Wakin valeroso jefekunañataqmi karqa Maacapa churin Hanan,
Mitan lawmanta Josafat,
44 Astarot llaqtayoq Uzias,
Aroer llaqtayoq Hotampa churinkuna,
paykunapa sutinmi karqa Samapiwan Jehiel,
45 Zimripa churin Jediael,
paypa wawqen Joha,
Johatam suticharqaku “Tiz casta runa” nispa.
46 Wakin valeroso jefekunañataqmi karqa Mahanaim llaqtayoq Eliel,
Elnaampa churin Jerebaipiwan Josavia,
Moab nacionniyoq Itma,
47 Eliel,
Obed hinaspa Soba nacionniyoq Jaasiel.