Churinkunawan Saul guerrapi wañusqanmanta
10
Filistea runakunam pelearqa Israel runakunawan,
Israel runakuna ayqekuyta qallaykuspankum Gilboa Moqopi achka-achka wañururqaku.
2 Filistea runakunam Saultawan churinkunata qatirqaku hinaspam wañurachirqaku Saulpa churin Jonatanta,
Abinadabta hinaspa Malquisuata.
3 Chaymantam Filistea runakunaqa mana chinkaykachispa qatirqaku Saultaña,
flechaqkuna Saulpa kasqankama hayparachiptinmi Saulqa heridoña kachkarqa.
4 Chaymi arman apaq soldadota Saul nirqa:
—Espadaykita horqospayki tuksiruway,
manam ñoqaqa munanichu wak mana señalasqa enemigoykunaraq hamuspa ñoqamanta burlakuwanankuta —nispa.
Chaymi llumpayta manchakusqanrayku arman apaq soldadoqa mana munarqachu chay rurayta hinaptinmi Saulqa espadanta hapiykuspa kikinña tuksikururqa.
5 Arman apaq soldadopas Saul wañurachikusqanta qawaykuspanmi espadanwan tuksikururqa,
chaynapim paypas wañururqa.
6 Chaynatamá chay punchaw Saul wañukurqa,
wañukurqataqmi kimsan churinkunapas hinaspa llapallan familiankunapas.
7 Qechwapi yachaq llapallan Israel runakunam tropakunapa lluptisqantawan Saulpa hinaspa churinkunapa wañurusqanta yacharuspanku llaqtankuta saqeruspa lluptikurqaku hinaptinmi Filistea runakunaña hamuruspanku chay llaqtakunapi yacharqaku.
8 Paqarinnintin punchawmi Filistea runakuna lloqsirqaku wañuqkunapa imantapas hoqarikamunankupaq.
Gilboa Moqopim tarirurqaku Saultawan churinkunata wañusqaña pampapi chutarayachkaqta.
9 Filistea runakunaqa Saulpa pachanta llatanaruspankum umantawan armankunata aparqaku.
Willakuqkunatam kacharqaku Filistea runakunapa llapallan muyuriqninpi llaqtakunaman,
chay llaqtakunamanqa kacharqaku taytachankuman hinaspa llapallan runakunaman willamunankupaqmi.
10 Saulpa armankunatam churarqaku mamachankupa templonpi,
umantañataqmi warkururqaku Dagon sutiyoq taytachankupa templonman.
11 Galaad lawpi Jabes llaqtayoq llapallan runakunam yacharurqaku Filistea runakunaqa Saulpa cuerponta imam rurarusqankuta.
12 Llapallan valeroso qarikuna rispankum Saulpa hinaspa churinkunapa ayanta apamurqaku Jabes llaqtankuman,
chaypi kaq encina sachapa sikinpi pamparuspankum qanchis punchaw ayunarqaku.