Churinkunawan Saul guerrapi wañukusqanmanta
31
Filistea runakunam pelearqa Israel casta runakunawan.
Israel runakuna ayqekuyta qallaykuspankum Gilboa Moqopi achka-achka wañururqaku.
2 Filistea runakunam Saultawan churinkunata qatirqaku hinaspam wañurachirqaku Saulpa churin Jonatanta,
Abinadabta hinaspa Malquisuata.
3 Chaymantam Filistea runakunaqa mana chinkaykachispa qatirqaku Saultaña,
flechaqkuna Saulpa kasqankama hayparachiptinmi Saulqa heridoña kachkarqa.
4 Chaymi arman apaq soldadota Saul nirqa:
—Espadaykita horqospayki tuksiruway,
manam ñoqaqa munanichu wak mana señalasqa enemigoykunaraq tuksiruwananta hinaspa burlakuwananta —nispa.
Chaymi llumpayta manchakusqanrayku arman apaq soldadoqa mana munarqachu chay rurayta hinaptinmi Saulqa espadanta hapiykuspan kikinña tuksikururqa.
5 Arman apaq soldadopas Saul wañurachikusqanta qawaykuspanmi espadanwan tuksikururqa chaynapim paypas wañururqa.
6 Chaynatamá chay punchawpi Saul wañukurqa,
wañukurqataqmi kimsan churinkunapas hinaspa arman apaq soldadowan llapallan runankunapas.
7 Chay qechwapa waklawninpi yachaq Israel runakunam rikururqaku Israel tropakunaqa ayqekusqankuta.
Rikurqakutaqmi Jordan Mayupa chimpanpi yachaqkunapas.
Paykunam yacharurqakutaq Saulwan churinkunapas wañukusqankuta chaymi paykunapas yachasqanku llaqtakunamanta ayqekurqaku.
Hinaptinmi Filistea runakunaña chayaruspanku chaykunapi yachakurqaku.
8 Paqarinnintin punchawmi Filistea runakuna lloqsirqaku wañuqkunapa imantapas hoqarikamunankupaq.
Gilboa Moqopim tarirurqaku Saultawan churinkunata wañusqaña pampapi chutarayachkaqta.
9 Filistea runakunam Saulpa umanta qoruruspanku armankunatapas lliwta hoqarirurqaku.
Willakuqkunatam kacharqaku tukuy llaqtankuman chaynapi llapa runakunaman willakamunankupaq hinaspa taytachankupa templonpipas willakamunankupaq.
10 Saulpa armankunatam churarqaqaku Astarot sutiyoq mamachankupa templonpi.
Saulpa cuerpontañataqmi warkururqaku Bet-san llaqtapa murallanman.
11 Galaad lawpi Jabes llaqtayoqkunam yacharurqaku Filistea runakunaqa Saulpa cuerponta imam rurarusqankuta.
12 Llapallan valeroso qarikuna tukuy tuta rispankum chayarurqaku Bet-san sutiyoq llaqtaman hinaspam murallanpi warkurayaq Saulpa cuerpontawan churinkunapa cuerponta uraykachirqaku hinaspam kutikurqaku Jabes llaqtankuman.
Chaypim kañarurqaku chay cuerpokunata.
13 Puchuq tullukunatañataqmi pamparurqaku chay Jabes llaqtapi kaq sachapa sikinpi hinaspam qanchis punchaw ayunarqaku.