Amalec casta runakunata David vencerusqanmanta
30
Kimsa punchawninmanmi Davidqa runankunapiwan chayarurqaku Siclag sutiyoq llaqtaman.
Chayman chayaruspankum llaqtankuta tarirurqaku Amalec casta runakunapa saquearusqanta.
Paykunam Neguev lawpi Siclag sutiyoq llaqtata atacaruspa lliwta kañaykusqaku.
2 Warmikunatawan kuskatam chaypi kaqkunata taksamanta hatunkama presota pasachisqaku aswanqa manam pitapas wañuchisqakuchu.
3 Davidmi runankunapiwan chay llaqtaman chayaruspa tarirurqaku kañasqataña,
preso apasqa kasqankuraykum manaña tarirqakuchu warmillankutapas hinaspa churillankutapas.
4 Hinaptinmi Davidqa runankunapiwan qaparispanku waqarqaku manaña kallpayoq kanankukama.
5 Davidpa iskaynin warmintapas presotam aparusqaku.
Chay huknin warminpa sutinmi karqa Ahinoam,
payqa karqa Jezreel llaqtayoqmi.
Huknin warminpa sutinñataqmi karqa Abigail,
payqa karqa Carmel llaqtayoq Nabalpa viudanmi.
6 Davidmi ancha sasachakuypi karqa runankuna rumiwan choqaparunanpaq rimanakuptinku.
Chay lliw runakunam llakisqallaña kachkarqaku churinkumanta.
Ichaqa Davidmi hapipakurqa yupaychasqan Tayta Diosman.
7 Chayraykum Davidqa Ahimelecpa churin sacerdote Abiatarta nirqa:
—Ama hina kaspaykiyá aparamuway Diosninchik tapuna efodta —nispa.
—Taytáy ¿qatisaqchu icha manachu chay saqueaq runakunata?
¿Yaqaraqchum hayparuyman?
—nispa.
Chaymi Tayta Dios nirqa:
—¡Qatiypuni,
paykunataqa hayparunkim hinaspam presokunatapas libramunkitaq!
—nispa.
9 Hinaptinmi Davidqa chaypunilla pasarqa soqta pachak runankunawan.
Paykunam chayarurqaku Besor Mayuman.
Chaypim wakinnin runakuna qeparurqaku.
10 Chaypi qeparuqkunaqa karqa iskay pachak runakunam.
Paykunam mayu pasayta mana atirqakuchu llumpay pisipasqa kasqankurayku chaymi tawa pachak runakunallawanña Davidqa pasarqa.
11 Richkaspankum purunpi tarirurqaku Egipto nacionniyoq huk runata,
paytam pusamurqaku Davidman hinaspam mikuykachispa yakutawan qorqaku tomananpaq.
12 Chay runamanmá partiykurqaku higosmanta tortillatawan uvas pasasmanta iskay tortillakunata.
Chaykunata mikuykuspanmi chay Egipto runaqa kallpanchakuykurqa.
Payqa kasqa kimsa punchaw hinaspa kimsa tutan mana mikusqam hinaspa mana yaku tomasqam.
13 Chay runatam David tapurqa:
—¿Pipa sirviententaq kanki?
¿Maylawtaq kanki?
—nispa.
Hinaptinmi chay Egipto nacionniyoq runañataq nirqa:
—Ñoqaqa kani Amalec casta runapa sirvientenmi.
Onqorusqayraykum yaqa kimsa punchawña patronniy kaypi saqeruwarqa.
14 Arí,
ñoqaykum rirqaniku Ceret casta runakunapa yachananpa surlawninta.
Rirqanikutaqmi Juda lawtapas chaynataq Caleb casta runakunapa yachanan lawtapas,
chaykunapi saqueamuspaykum Siclag sutiyoq llaqtatapas kañaykamurqaniku —nispa.
15 Chaymi David tapurqa:
—¿Yaqachum pusaruwankiman chay llapa suwakunapa kasqanman?
—nispa.
Hinaptinmi chay Egipto nacionniyoq runa nirqa:
—Sichum Diosrayku jurawaspayki mana wañurachiwanayki kaptinqa hinaspa patronniyman mana qowanayki kaptinqa pusarusqaykim paykunapa kasqankama —nispa.
16 Pusaruptinmi chay runakunaqa tukuy pampaman cheqeruspa mikuchkasqaku hinaspa tomachkasqaku.
Paykunam tukuy imata apamurqaku Filistea runakunapa llaqtanmanta chaynataq Juda lawpi yachaq runakunapa llaqtanmantapas.
Chayraykum huk hatun fiestata rurachkasqaku.
17 Chaymi Davidqa paykunaman pawaykuspan wañurachirqa madrugawmanta paqarinnintin tardeykuqkama.
Tawa pachak mozokunallañam lluptirurqa camellonkuman sillakuykuspa.
18 Davidmá kutichimurqa Amalec casta runakunapa tukuy ima apasqanta,
libramurqataqmi iskaynin warmintapas.
19 Chay suwasqanku runakunamantaqa manam taksapas-hatunpas faltarqachu.
Tukuy ima apasqankutam lliwta David kutichimurqa.
20 Davidqa hapikuykurqataqmi llapallan ovejakunatapas hinaspa vacakunatapas.
Chay animalkunata qatiq runakunam nirqaku:
—Kaykunaqa Davidpa ganancionmi —nispanku.
21 Davidmi chayarurqa Besor Mayupi qeparuq iskay pachak runakunapa kasqanman.
Chaypiqa qeparurqaku llumpay pisipasqa kasqankuraykum.
Paykunam Davidmanwan riqmasinkunaman taripaykurqaku chaymi Davidpas paykunaman asuykuspan rimaykurqa.
22 Ichaqa Davidwan riq wakin mana allin torpe runakunam nirqaku kaynata:
—Enemigomanta imakunapas qechumusqanchiktaqa manam qochwanchu kayllapi qepakuruq runakunamanqa.
¡Qospaqa-qosunchik sapakamapa warmintawan churinkunallatam!
Paykunata pusarikuspayá ripukuchunku —nispa.
23 Chaymi paykunata David nirqa:
—¡Amayá chaytaqa ruraychikchu wawqellaykuna!
Tayta Diosmi tukuy kaykunataqa qoykuwanchik,
pay waqaychaykuwaspanchiktaqmi contranchikpi hamuq salteaqkunatapas makinchikman churaykun.
24 ¡Manam pipas uyarisunkichikmanchu chay munasqaykichiktaqa!
Imapas qechumusqanchiktaqa igualmanmi rakinakusun.
Kaypi qepiwan qepaqkunapas hinaspa peleaq riqkunapas igualninkam chaskinqa —nispa.
25 Chay punchawmantapunim kay libro qellqasqa kasqan punchawkama Israel runakunaqa ruraqku hina chay decretonman hinaspa chay reglamentonman hina.
26 Davidmi Siclag llaqtaman chayaruspan Juda lawpi kamachikuq amistadninkunaman apachirqa wakin imapas qechumusqanta.
Chay apachisqan runakunawantaqmi kaynata kunarqa:
—Tayta Diospa enemigon runakunamanta qechumusqaytam wakinta qamkunaman apachimuchkaykichik —nispa.
27 Davidqa regalokunatamá apachirqa Betel llaqtayoqkunaman,
Neguev lawpi yachaq Ramot llaqtayoqkunaman,
Jatir llaqtayoqkunaman,
28 Aroer llaqtayoqkunaman,
Sifmot llaqtayoqkunaman hinaspa Estemoa llaqtayoqkunaman.
29 Apachirqataqmi Racal llaqtayoqkunamanpas,
Jerameel llaqtakunapi yachaqkunamanpas hinaspa Cain casta runakunapa yachanan llaqtakunamanpas.
30 Chay regalokunataqa apachirqataqmi Horma llaqtayoqkunamanpas,
Bor-asan llaqtayoqkunamanpas,
Atac llaqtayoqkunamanpas,
31 Hebron llaqtayoqkunamanpas hinaspa runankunawan purisqankupi llaqtayoqkunamanpas.