Filistea runakuna Davidpi mana confiakusqankumanta
29
Filistea runakunam llapallan tropankunata huñururqaku Afec sutiyoq llaqta lawpi,
Israel casta runakunañataqmi campamentonkuta sayachirqaku Jezreel sutiyoq pukyupa ladonpi.
2 Filistea runakunapa jefenkunam rirqa pachak soldado kamachiqkunawan chaynataq waranqa kamachiqkunawan.
Paykunapa qepantañataqmi rirqa Davidwan runankuna Rey Aquista compañaspanku.
3 Filistea runakunapa kamachiqninkunam Rey Aquista tapurqaku:
—¿Imatataq wak Hebreo casta runakunaqa kaypi rurachkanku?
—nispa.
Hinaptinmi Rey Aquisñataq nirqa:
—Arí,
payqa Davidmi.
Payqa karqa Israel runakunapa reynin Saulpa yanapaqninmi.
Ichaqa unay watakunañam ñoqawan karqa.
Tupasqayku punchawmantapunim paypiqa mana tarirqanichu imatapas —nispa.
4 Hinaptinmi Filistea runakunapa kamachiqninkuna Rey Aquispa contranpi piñakuruspanku nirqaku:
—Chaynaqa kamachiyá maymi qosqayki llaqtaman kutinanpaq,
manam munanikuchu ñoqaykuwan peleaq rinantaqa.
Yanqañataqmi peleachkaptinchik kutiriykuwachwanchik.
Payqariki reyninwan allin kananpaqqa kay soldadonchikkunata wañurachispanmi umanta qoykunman.
5 Kay Davidmantam tusuqkunapas takirqaku:
Saulmi wañurachimun waranqa soldadokunata.
Davidñataqmi wañurachimun chunka waranqata.
6 Chaymi Davidta qayaspan Rey Aquis nirqa:
—¡Tayta Diosrayku juraspam niki qamqa mana engañakuq allin qari kasqaykita!
Campamentoykupi allin portakusqaykim llumpay gustoypaq karqa.
Manam qampiqa ima faltatapas tarirqanichu chayamuwasqayki punchawmantapuni.
Ichaqa Filistea runakunapa jefenkunam mana gustasunkichu.
7 Chaynaqa David,
hawkallayá kutikuy chaynapi Filistea runakunapa jefenkuna hawka kanankupaq —nispa.
8 Chaymi Davidñataq nirqa:
—Reynilláy ¿imatataq ñoqaqa ruraruni?
¿Yaqachum tukuy tiempo qanwan kaptiyqa ima mana allintapas tarirqanki kay serviqnikipiqa?
Chaynaqa ¿imanasqamá manaqa dejaykuwankichu enemigoykikunawan peleamunaytaqa?
—nispa.
9 Hinaptinmi Rey Aquisñataq nirqa:
—Ñoqaqa yachanim qamqa Diospa angelnin hina allin kasqaykita,
ichaqa Filistea runakunapa kamachiqninkunam tantearunku ñoqaykuwanqa mana peleamunaykipaq.
10 Chaynaqa David,
tutapayta hatarispaykiyá ripukuy reyniki Saulpa soldadokunapiwan.
Paykunaqariki qanwanmi hamurqa —nispa.
11 Davidmi runankunapiwan tutapayta hatariruspan kutikurqaku Filistea runakunapa llaqtanman,
Filistea runakunañataqmi pasarqaku Jezreel llaqta lawman.