28
Chay punchawkunapim Filistea runakuna tropankunata huñururqa Israel casta runakunapa contranpi peleanankupaq chaymi Davidta Rey Aquis nirqa:
—Qamqa yachasqaykipi hinapas ñoqawanmi soldadoykikunapiwan guerraman lloqsinki —nispa.
2 Chaymi Davidñataq nirqa:
—Arí,
qanwanmi lloqsisaq,
kunanmi yachaykunki kay serviqnikipa imam rurasqayta —nispa.
Hinaptinmi Rey Aquisñataq nirqa:
—Chaynaqa waqaychaqniy soldadokunapa jefenpaqñam churasqayki,
chaynaqa kanki wañukunay punchawkamam —nispa.
Endor llaqtayoq brujata Saul tapukusqanmanta
3 Samuelmi wañukurqaña chaymi llapallan Israel runakuna paymanta llakikurqaku.
Paypa cuerpontam pamparurqaku Rama sutiyoq kikinpa llaqtanpi.
Saulmi Israel nacionmanta qarqorurqa wañukuqkunapa espiritun qayaqkunata chaynataq demoniowan rimaqkunatapas.
4 Filistea runakunam huñunakuruspanku campamentonkuta sayachirqaku Sunem sutiyoq llaqta lawpi.
Saulpas Israel llapallan runakunata huñuruspanmi campamentonkuta sayachirqa Gilboa Moqopi.
5 Chaymi Saulqa Filistea runakunapa campamentonta qawaykuspan mancharikuyllawanña hukmanyarurqa.
6 Saulqa Tayta Diosta tapuptinpas manam imallatapas nirqachu.
Manamá rimarirqachu sueñoypipas nitaq Urim sutiyoq alhaja rumita choqaptinkupas nitaq paymanta willakuqkunawanpas.
7 Hinaptinmi Saulqa sirviqninkunataña kamachirqa:
—Maskamuychik wañuqpa espiritun qayaq warmita chaynapi payman rispay tapukamunaypaq —nispa.
Chaymi serviqninkuna nirqa:
—Endor llaqtapiqa kachkanmi wañuqkunapa espiritun qayaq huk warmi —nispa.
8 Saulmi mana reqsichikunanpaq huk pachawan churakururqa hinaspam tutallan iskay runawan pusachikuspan pasarqa chay warmipa kasqanman.
Chayaruspam Saul nirqa:
—Ama hina kaspayá ruranaykiman hina qayaykapullaway ñoqapa nisqay runapa espiritunta —nispa.
9 Hinaptinmi chay warmi nirqa:
—Qamqa yachankim Saulpa imam rurarusqanta.
Payqariki kay nacionmantam qarqorun wañuqkunapa espiritun qayaqkunata,
qarqoruntaqmi demoniowan rimaqkunatapas.
Chaynaqa kay mañakuwasqaykiwanqa wañuymanmi tanqaypaq-tanqawachkanki —nispa.
10 Ichaqa Saulmi Tayta Diosrayku juraspan kaynata nirqa:
—Tayta Diosraykum jurani,
manam pipas imanasunkichu —nispa.
11 Hinaptinmi chay warmi nirqa:
—¿Pi qayanaytataq munanki?
—nispa.
Hinaptinmi Saulñataq nirqa:
—Qayaykapuway Samuelta —nispa.
12 Samuelta chay warmi rikuruspanmi qaparispan Saulta nirqa:
—¿Imanasqataq pantarachiwanki?
¡Qamqariki kasqanki Saulmi!
—nispa.
13 Hinaptinmi Rey Saul nirqa:
—Ama manchakuychu ¿imatataq rikurunki?
—nispa.
Chaymi warmiñataq Saulta nirqa:
—Dios kaqlla rikchayniyoqtam rikuchkani allpamanta seqamuchkaqta —nispa.
14 Hinaptinmi payta Saul nirqa:
¿Rikchayninqa imaynataq ?
—nispa.
Chaymi pay contestarqa:
—Huk yuyaq runam hamuchkan capanwan capakuykuspan —nispa.
Chaymi Saulqa Samuel kasqanta musyaruspan qonqoranpa pampaman kumuykurqa.
15 Chaymi Saulta Samuel nirqa:
—¿Imanasqataq fastidiawanki qayachimuwaspayki?
—nispa.
Hinaptinmi Saul nirqa:
—Ancha sasachakuypim kachkani Filistea runakuna contraypi peleaq hamurusqankurayku.
Diospas ñoqamantaqa karunchakurunmi,
manañam imallatapas niwanchu paymanta willakuqkunawanpas nitaq sueñoypipas.
Chayraykum qayachimurqayki imam ruranayta niykuwanaykipaq —nispa.
16 Hinaptinmi Samuelñataq nirqa:
—¿Imanasqataq ñoqataqa tapuwanki kikin Tayta Diospuni enemigoyki rikuriruspa karunchakuruchkaptinqa?
17 Ñawpaqta qanman willachiwasqanman hinam Tayta Diosqa rurachkan.
Rey kasqaykita qechususpaykim qoykun yanapaqniki Davidmanña.
18 Qamqariki manam kasukurqankichu Tayta Diospa kamachikuyninkunata,
manataqmi cumplirqankichu rabiasqanrayku Amalec casta runakunata wañuchiq kachasuptikipas.
Chayraykum kunanqa kayta rurasuchkanki.
19 Tayta Diosqa Israel runakunatawanmi Filistea runakunamanña qoykusunki,
paqarinqa lliw churintinmi ñoqawanñam tarikunki.
Israel casta tropakunataqa Tayta Diosmi qoykunqa Filistea runakunamanña —nispa.
20 Hinaptinmi Saulqa pampapi pakchakururqa,
Samuelpa nisqanwanmi llumpayllataña mancharikururqa.
Payqa huk punchaw hinaspa huk tutan mana mikusqa kasqanraykum mana kallpayoqña karqa.
21 Saulman chay warmi asuykuspanmi mancharisqallataña qawaspan nirqa:
—Kay sirvientaykiqa ruraykunim imam mañawasqaykita,
vidaytapas peligroman churaspaymi imam niwasqaykita kasukurqani.
22 Chaynaqa ama hina kaspayá uyariykullaway:
Mikuytam servimusqayki chaywan kallpanchakuspa pasakunaykipaq —nispa.
23 Saulñataqmi mana munaspan nirqa:
—Manam mikuymanchu —nispa.
Chay warmiwan Saulpa sirvientenkuna hikutaptinkuñam pampamanta hatariykuspan tiyaykurqa camapa hawanpi.
24 Chay warmipa wasinpim karqa wirayachikusqan malta toro,
chaytam apurawman nakarurqa.
Chaymantañataqmi harinata chapuspa tantata rurarqa mana qonchuyoqta.
25 Hinaspam apamurqa Saulmanwan serviqninkunaman.
Chayta mikuykuspankum pasakurqaku hina chay tutalla.