—Ñoqaykuqa kaniku qampa aylluykipunim.

2 Pasaq tiempopiqa Saul gobiernawachkaptinkupas qanmi Israelpa tropankunataqa kamachirqanki.

Tayta Diosmi prometesurqanki:

“Qanmi oveja michiq hina Israel casta runaykunata gobiernanki hinaspam Israel nacionpi kamachinki” nispa.

3 Hebron llaqtapi Rey Davidpa kasqanmanmá hamurqaku Israel casta llapallan ancianokuna,

Rey Davidmi chaypi paykunawan contratota rurarqa Tayta Diospa qayllanpi.

Israel nacionpi gobiernananpaqmi Davidta aceitewan tallirqaku.

4 Kimsa chunka watanpim Davidqa gobiernayta qallarirqa hinaspam gobiernarqa tawa chunka wata.

5 Juda lawpim gobiernarqa qanchis wata parten Hebron llaqtapi yachaspan.

Kimsa chunka kimsayoq watataqmi gobiernarqa lliw Israel lawpipas chaynataq Juda lawpipas Jerusalen llaqtapi yachaspan.

6 Rey Davidmi tropankunapiwan rirqaku Jerusalen llaqtaman chay allpapi yachaq Jebus casta runakunawan peleananpaq.

Jebus casta runakunam Davidta nirqaku:

—Manam qamqa kayman yaykumuytaqa atiwaqchu,

qamtaqa ñawsakunapiwan weqrukunallam wischurusunki —nispa.

Chaynataqa nirqaku:

“Davidqa manam yaykumuyta atinmanchu” nispa piensasqankuraykum.

7 Davidmi ichaqa vencerurqa murallasqa Sion llaqtapi runakunata.

Chay llaqtatam suticharqaku “Davidpa Llaqtan” nispaña.

8 Chay punchawpi manaraq peleachkaspanmi David nirqa:

—Pipas Jebus casta runakunata vencey munaqqa yakupa tunelninta yaykuspayá wañuchimuchun tukuy sonqoywan cheqnisqay wistukunata hinaspa ñawsakunata —nispa.

Chayraykum kaynata rimakuqku:

“Ñawsakunapas nitaq wistukunapas manam Diospa templonmanqa yaykunmankuchu” nispa.

9 Chay murallasqa llaqtapi David yachaspanmi suticharqa “Davidpa Llaqtan” nispa.

Chay llaqtapa muyuriqninpim rurachirqa murallata,

chaytaqa rurachirqa llaqtapa patanmanta uku lawmanmi.

10 Davidmi aswan-aswan atiyniyoq rikurirurqa Llapallan Kamachiq Tayta Dios yanapasqanrayku.

11 Chaymi Tiro llaqtapa reynin Hiram kacharqa Davidman runankunata.

Cedro qerukunata apachispanmi kacharqataq carpinterokunatapas chaynataq rumi labraqkunatapas.

Paykunam Davidpaq palaciota rurapurqaku.

12 Hinaptinmi David cuentata qokururqa Israel nacionpi gobiernananpaq Tayta Dios takyachisqanta.

Entienderqataqmi Israel casta runakunata favorecespan pay gobiernachisqantapas.

13 Hebron llaqtamanta Jerusalen llaqtamanña David astakuruspanmi chaypipas huk warmikunawan casarakururqa,

kapurqataqmi huk compañerankunapas.

Paykunam wachakurqaku Davidpa qaripas-warmipas churinkunata.

14 Jerusalen llaqtapi naceq Davidpa churinkunam karqa Samua,

Sobab,

Natan,

Salomon,

15 Ibhar,

Elisua,

Nefeg,

Jafia,

16 Elisama,

Eliada hinaspa Elifelet.

17 Filistea runakunam Israel nacionpi gobiernananpaq David churasqa kasqanta yacharurqaku chaymi llapallanku hamurqaku Davidta maskanankupaq.

Davidmi ichaqa maskamusqankuta yacharuspan rirqa amparakunanku sitioman.

18 Filistea runakuna hamuruspankum Refaim Qechwapi campamentonkuta sayarachirqaku.

19 Hinaptinmi Tayta Diosta David tapurqa:

—¿Risaqchu Filistea runakunapa contranpi?

¿paykunataqa qowankichu?

—nispa.

Chaymi Tayta Dios nirqa:

—Riypuniyá,

Filistea runakunataqa makikimanmi churamusaq —nispa.

20 ^aBaal-perazim sitiokama David chayaruspanmi chaypi Filistea runakunata vencerurqa chayraykum nirqa:

—Lloqllapa wayqosqanta hinam Tayta Dios enemigoykunata qayllaypi vencerun —nispa.

—Chayraykum chay sitiota suticharqa “Baal-perazim” nispa.

21 Filistea runakuna taytachankuta chaypi saqeruptinmi Davidwan runankuna apakurqaku.

22 Filistea runakunam yapatawan hamururqaku Refaim Qechwaman hinaspam chaypi campamentonkuta sayachirqaku.

23 Chaymi Tayta Diosta David tapuptin payñataq nirqa:

—Ama riychu paykunapa ñawpaqninmanqa,

paykunapa qepanman muyuruspayá balsamo sutiyoq sachakunapa ñawpaqninmanta pawaykamuy.

24 Balsamo sachakunapa hawanpi tropakuna marchachkaq hina saqaqaqaqta uyarispaykim listolla kanki pawaykunaykipaq.

Qampa ñawpaqnikitam ñoqa Tayta Dios risaq Filistea tropakuna vencesqa kananpaq —nispa.

25 Tayta Diospa kamachisqanta hina David ruraspanmi Filistea tropakunata vencerurqa Gabaon llaqtamanta Gezer llaqtapa hichpankama.