Tayta Diospa baulninta Jerusalenman David aparuy munasqanmanta
6
Davidmi kasqallan huñurachirqa Israel casta llapallan akllasqa tropakunata.
Paykunam karqa kimsa chunka waranqa soldadokuna.
2 Chaymi Juda law Baala llaqtamanta David llapallan tropankunawan pasarqa Tayta Diospa baulninta chay lugarmanta apamunanpaq.
Chay baulmi sutichasqa karqa Llapallan Kamachiq Tayta Diospa sutinwan.
Paymi chay baulpa hawanpi kaq querubin sutiyoq angelkunapa chawpinpi tiyaq.
3-4 Diospa baulninta mosoq carretaman churaykuspankum Abinadabpa wasinmanta aparqaku,
chay wasiqa karqa moqopim.
Abinadabpa churin Uzawan Ahio sutiyoq runam Diospa baulninta carretapi guiarqaku.
Ahiom rirqa baulpa ñawpaqninta.
5 Davidmi Israel casta llapallan runakunawan Tayta Diospa ñawpaqninta rispa anchata kusikurqa,
tukuy sonqonkuwan takispam tusurqaku taksa arpakunapa,
hatun arpakunapa,
tinyakunapa,
taksa platillokunapa hinaspa hatun platillokunapa waqasqanwan.
6 Naconpa eranman chayaruptinkum bueyeskuna mitkaruptin Diospa baulnin mana wichiykunanpaq Uza sutiyoq runa hapirurqa.
7 Uza sutiyoq runapa contranpi Tayta Dios piñakuspanmi mana yuyaywan rurasqanrayku castigarurqa hinaptinmi hina chayllapi wañururqa Diospa baulninpa ladonpi.
8 Davidmi piñakururqa Uzata Tayta Dios wañurachisqanmanta chaymi chay lugar sutichasqa karqa aPerez-uzawan kay libro qellqasqa kasqan tiempokama.
9 Tayta Diosta manchakuspanmi chay punchaw David nirqa:
—Manañam apachimuymanchu Tayta Diospa baulnintaqa —nispa.
10 “Davidpa Llaqtanwan” sutichasqa llaqtaman Tayta Diospa baulninta manaña apayta munaspanmi kamachirqa Gat llaqtayoq Obed-edom sutiyoq runapa wasinmanña apanankupaq.
11 Tayta Diospa baulninmi Obed-edompa wasinpi karqa kimsa killa chaymi Obed-edomtawan lliw familianta Tayta Dios bendecirqa.
Tayta Diospa baulninta Jerusalenman David apachimusqanmanta
12 Rey Davidmanmi willarqaku:
—Tayta Diospa baulnin Obed-edompa wasinpi kasqanraykum paypa familiantawan lliw kapuqninkunata kikin Tayta Dios bendeciykun —nispa.
David rispanmi Obed-edompa wasinmanta Diospa baulninta kusikuywan Davidpa Llaqtanwan sutichasqa llaqtaman apachimurqa.
13 Tayta Diospa baulnin apaqkuna soqta ichiyta puriruptinkum torotawan wirayachisqa animalta David wañuchirqa payta adorananpaq.
14 Davidmi linomanta efodwan pachasqa Tayta Diospa ñawpaqninpi tukuy kallpanwan pawaykacharqa.
15 Davidwan Israelpa llapallan castankunam Tayta Diospa baulninta aparqaku kusikuymanta qaparispanku chaynataq cornetata tocaspanku.
16 Davidpa Llaqtan sutiyoq llaqtaman Tayta Diospa baulnin chayaruptinmi Saulpa warmi churin Mical ventanamanta qawarispa Rey Davidta rikururqa Tayta Diospa ñawpaqninpi pawaykachaspa tusuqta chaymi sinchita despreciarurqa.
17 Tayta Diospa baulninta chayarachispankum churarqaku Davidpa alistasqa karpapa ukunman.
Davidmi ofrecerqa Tayta Diospa qayllanpi lliw kañana ofrendakunata chaynataq Dioswan allinlla kasqankumanta ofrendakunata.
18 Chay ofrendakuna ofreceyta David tukuruspanmi Llapallan Kamachiq Tayta Diosta mañakurqa runakunata bendecinanpaq.
19 Chaypi tarikuq Israel casta llapallan runakunamanmi qarimanpas-warmimanpas aypuchirqa huk rosca tantata,
datiles sutiyoq frutamanta huk pedazo tortillata chaynataq uvas pasasmanta huk pedazo tortillatapas.
Chaymantam lliw runakuna sapakama wasinkuman pasakurqaku.
20 Davidpas kutikurqataqmi palacionman familianpaq Diospa bendicionninta mañakunanpaq.
Ichaqa Saulpa warmi churin Micalmi Davidta chaskinanpaq lloqsiruspan nirqa:
—Israel nacionpi reyqa ¡mayna alabasqam kunan punchaw karunki,
serviqnikikunapa sirvientankunapa qayllanpim mana penqakuq qalalla runa hina qawachikamurqanki!
—nispa.
21 Chaymi Micalta David nirqa:
—Arí,
Tayta Diospa qayllanpim kusikurqani taytaykimantapas chaynataq llapallan castaykikunamantapas Israel casta runakunapi kamachinaypaq akllawasqanrayku.
22 Kunanqa nisqaykimantapas aswan despreciasqaraq kaspaymi humillakusaq ichaqa rimasqayki sirvientakunapa alabasqanmi kasaq —nispa.
23 Chayraykum Saulpa warmi churin Micalqa mana wawayoq karqa wañunankama.