—Qawasqaykipi hinam ñoqaqa cedromanta palaciopi yachachkani,

Diospa baulninñataqmi kachkan karpallapi —nispa.

3 Chaymi Natanñataq reyta nirqa:

—Rurayá tukuy piensasqaykiman hina.

Tayta Diosmi qanwan kachkan —nispa.

4-5 Chay tutapunim Natanta Tayta Dios rimapayarqa serviqnin Davidman kaynata nimunanpaq:

—Manam qamchu temploytaqa rurapuwanki chaypi yachanaypaq.

6 Egipto nacionmanta Israelpa mirayninkunata horqomusqay punchawmantapunim kunan punchawkama templopiqa mana yacharqanichu.

Ñoqaqa purirqani yachana karpallapim.

7 Tukuy tiempo Israelpa llapallan mirayninkunawan purichkaspaypas runaykunata kamachikunankupaq oveja michiq hina churasqay runakunamantaqa manam haykapipas mañarqanichu cedro tablamanta templota rurapuwanankupaqqa.

8 —Chaynaqa Llapallan Kamachiq Ñoqa Tayta Diospa nisqaytayá serviqniy Davidman kaynata nimuy:

“Ñoqam oveja michisqaykimanta horqomurqayki Israel casta runaykunapi jefe kanaykipaq.

9 Lliw purisqaykipi yanapaspaymi llapallan qanwan peleaq enemigoykikunatapas tukururqani,

kay pachapi atiyniyoqkunata hinam reqsisqata rurarqayki.

10 Israel casta runaykunapaqpas akllaruniñam huk sitiota,

chaypim churarqani paykunataqa manaña pipas kuyuchinanpaq hinaspa ñawpaq tiempopi hina mana allin ruraqkunaqa manaña ñakarichinanpaq.

11 Israel casta runaykunapi jefekuna churasqay tiempomantaraq rurasqayman hinam llapallan enemigoykikunamanta hawkayayta qosqayki.

Ñoqa Tayta Diosmi prometeki castaykikunata mirachinaypaq.

12 Machuyaruspa abueloykikuna hina wañukuptikim kikikipa churikita churasaq gobiernananpaq hinaspam takyachisaq gobiernonta.

13 Paymi ñoqapaq templota ruranqa,

ñoqañataqmi takyachisaq gobiernonta wiñaypaq.

14 Ñoqam paypaq kasaq taytan,

payñataqmi ñoqapaq kanqa churiy.

Mana allinta ruraptinqa ñoqam corregisaq churinta taytan castigachkaq hina chaynataq azotechkaq hina.

15 Ichaqa Saulmanta hinaqa kuyapayakuyniytam churikimanta mana qechurusaqchu.

Saultaqa wischururqani paypa rantinpi qamtaña churanaypaqmi.

16 Castaykipas chaynataq gobiernoykipas wiñaypaqmi takyanqa.

Castaykipa gobiernontapas wiñaypaqmi takyachisaq” nispa.

17 Tukuy chay palabrakunaman hinam chaynataq tukuy chay mosqoyninpi qawasqanta hinam Davidman Natan willarqa.

18 Chaymi Tayta Diospa kasqanman Rey David yaykuykuspan ñawpaqninpi nirqa:

—Señor Dioslláy ¿pitaq ñoqaqa kani?

¿Pitaq castaykunapas kunankama qam yanapawanaykipaqqa?

19 Señor Dioslláy,

chaypas asllapaq rikchakapusuptikim kay serviqnikipa castay imaynam kananmantapas rimariykunkiraq.

Señor Dioslláy,

chay rurasqaykiqa runakuna yachanankupaqmi.

20 Señor Dioslláy ¿imatawanraqtaq nikiman?

Kay serviqnikitaqariki qanmi reqsiwanki.

21 Tukuy chay admirakuypaq kaqkunatam rurarunki prometesqaykiman hina chaynataq munasqaykiman hina chaynapi kay serviqnikiman reqsichiwanaykipaq.

22 Chaynaqa Señor Dioslláy ¡mayna hatunsum qamqa kanki!

Qam hinaqa manam pipas kanchu.

Lliw uyarisqaykupi hinapas qanmanta huk diosqa manam kanchu.

23 Israel runaykikuna hinaqa manam kanchu kay pachapi huk nacionqa.

Dioslláy,

paykunataqa qanmi hamuspa librarqanki runaykikuna kananpaq chaynapi allin reqsisqa kanaykipaq.

Egipto nacionpi runakunamantawan taytachankunamantam libramurqanki hinaspam paykunapaq hatun manchakuypaq kaqkunata rurarqanki chaynapi kay allpata dueñochakunankupaq.

24 Qanmi Israel casta runaykikunata wiñaypaq takyaykachinki hinaspam paykunapa Diosnin karunki.

25 —Chaynaqa Dios Taytalláy,

kay serviqnikimantawan mirayniymanta rimasqaykitayá wiñaypaq cumpliy.

Chaynatayá ruray nisqaykiman hina.

26 Sutiki wiñaypaq hatunchasqa kaptinyá nichunku:

“Llapallan Kamachiq Tayta Diosqa Israel castakunapa Diosninmi” nispa.

Kay serviqniki Davidpa castaykunapas takyachunyá qampa yanapakuynikiwan.

27 Israelpa yupaychasqan Llapallan Kamachiq Dios Taytalláy,

kay serviqnikimanmi niwarqanki mirayniyoqta rurawanaykipaq.

Chayraykum kay serviqnikiqa kallpanchakuni chaynata mañakamunaypaq.

28 Señor Diosnilláy,

qamqa Diosmi kanki,

palabraykikunapas cheqapmi.

Qanmi tukuy kay allinkunata serviqnikiman prometewarqanki.

29 Kunanyá kay serviqnikipa castayta bendeciykapuway qampa qayllaykipi wiñaypaq takyananpaq.

Señor Diosnilláy,

qanmi prometewarqanki kay serviqnikipa castanqa wiñaypaq bendecisqa kananpaq —nispa.