Jerusalen llaqtaman Diospa baulninta David apay munasqanmanta
13
Waranqantin kamachiqkunawan hinaspa pachak kamachiqkunawan otaq llapallan jefekunawan David rimanakuruspanmi
2 Israel casta huñunasqa runakunata nirqa:
—Qamkunapaq allin rikchakapusuptikichikqa hinaspa yupaychasqanchik Tayta Diospaq allin kaptinqa tukuy hinastinmayá willakuqkunata kachasunchik Israel allpapi yachaq llapallan ayllunchikkunaman.
Kachasunchiktaqyá llaqtakunapiwan echaderonkunapi kaq sacerdotekunamanpas chaynataq Leviy casta runakunamanpas chaynapi llapallanku hamuspanku ñoqanchikwan huñunakunankupaq
3 hinaspa Diosninchikpa baulninta kayman apamunanchikpaq.
Saulpa tiemponmantapunim chay baulwanqa Diosta mana tapurqanchikchu —nispa.
4 Hinaptinmi huñunakuypi kaqkuna llapallanku “Allinmi” nirqaku chayta ruranankupaq.
5 Davidmi huñurachirqa Israel casta llapallan runakunata.
Payqa huñuchimurqa Egipto nacion lawpi Sihor Mayupa kasqanmantaraqmi chaynataq Hamat lawman yaykurina lawmantaraqmi.
Huñunakurqakumá Quiriat-jearim llaqtamanta Diospa baulninta apamunankupaq.
6 Davidmi Israel casta llapallan runakunapa compañasqan rirqa Quiriat-jearim llaqtaman.
Chay llaqtapa huknin sutinmi karqa Baala.
Chay llaqtaqa karqa Juda lawpim.
Rirqakumá Diospa baulninta apamunankupaq.
Chay baulmi sutichasqa karqa Diospa sutinwan.
Paymi chay baulpa hawanpi kaq querubin sutiyoq angelkunapa chawpinpi tiyaq.
7 Diospa baulninta mosoq carretaman churaykuspankum Abinadabpa wasinmanta aparqaku.
Uzapiwan Ahio sutiyoq runam carretata guiarqaku.
8 Davidmi Israel casta llapallan runakunawan Diospa ñawpaqninta rispa anchata kusikurqaku,
tukuy sonqonkuwan takispam tusurqaku taksa arpakunapa,
hatun arpakunapa,
tinyakunapa,
platillokunapa hinaspa cornetillakunapa waqasqanwan.
9 Quidon sutiyoq runapa eranman chayaruptinkum bueyeskuna mitkaruptin Diospa baulnin mana wichiykunanpaq Uza sutiyoq runa baulta hapirurqa.
10 Uza sutiyoq runapa contranpim Tayta Dios piñakururqa,
payqa piñakururqa chay Uza sutiyoq runa baulta hapirusqanraykum chaymi hina chayllapi wañurachirqa,
Diospa qayllanpimá payqa wañururqa.
11 Davidmi piñakururqa Uzata Tayta Dios wañurachisqanmanta chaymi chay lugar sutichasqa karqa Perez-uzawan kay libro qellqasqa kasqan tiempokama.
12 Tayta Diosta manchakuspanmi chay punchaw David nirqa:
—Manam apachimuymanchu Diospa baulnintaqa —nispa.