Davidman comisionta Rey Hiram kachasqanmanta
14
Tiro llaqtapa reynin Hiranmi kacharqa Davidman runankunata,
apachirqataqmi cedromanta qerukunatapas.
Kacharqataqmi albañilkunatapas chaynataq carpinterokunatapas Davidpaq palacionta ruranankupaq.
2 Hinaptinmi David cuentata qokururqa Israel nacionpi gobiernananpaq Tayta Dios takyachisqanta.
Entienderqataqmi Israel casta runakunata llumpayta favorecespan pay gobiernachisqantapas.
Jerusalen llaqtapi naceq Davidpa churinkunamanta
3 Jerusalen llaqtapi David yachaspanmi huk warmikunawan casarakururqa chaymi paykuna wachakurqa qaritapas-warmitapas Davidpa churinkunata.
4 Jerusalen llaqtapi naceq Davidpa churinkunam karqa Samua,
Sobab,
Natan,
Salomon,
5 Ibhar,
Elisua,
Elpelet,
6 Noga,
Nefeg,
Jafia,
7 Elisama,
Eliada hinaspa Elifelet.
Filistea runakunata David vencerusqanmanta
8 Filistea runakunam Israel lliw nacionpi gobiernananpaq David churasqa kasqanta yacharurqaku chaymi llapallanku hamurqaku Davidta maskanankupaq.
David chayta yacharuspanmi paykunawan tupaq lloqsirqa.
9 Chaymi Filistea runakuna hamururqaku Refaim Qechwapi yachaqkunata salteanankupaq.
10 Hinaptinmi Diosta David tapurqa:
—¿Risaqchu Filistea runakunapa contranpi?
¿Paykunataqa qowankichu?
—nispa.
Chaymi Tayta Dios nirqa:
—Riypuniyá,
Filistea runakunataqa makikimanmi churamusaq —nispa.
11 Baal-perazim sitiokama David chayaruspanmi chaypi Filistea runakunata vencerurqa,
chayraykum nirqa:
—Lloqllapa wayqosqanta hinam Dios enemigoykunata qayllaypi vencerun —nispa.
Chayraykum chay sitiota suticharqa “Baal-perazim” nispa.
12 Filistea runakuna taytachankuta chaypi saqeruptinmi David kañarachirqa.
13 Filistea runakunam yapatawan hamururqaku Refaim Qechwapi yachaqkunata salteanankupaq.
14 Chaymi Diosta David yapatawan tapuptin payñataq nirqa:
—Ama riychu paykunapa ñawpaqninmanqa aswanqa paykunapa qepanman muyuruspayá balsamo sutiyoq sachakunapa ñawpaqninmanta pawaykamuy.
15 Balsamo sachakunapa hawanpi tropakuna marchachkaq hina saqaqaqaqta uyarispaykim listolla kanki pawaykunaykipaq.
Qampa ñawpaqnikitam ñoqa Dios risaq Filistea tropakuna vencesqa kananpaq —nispa.