—Diospa baulnintaqa Leviy castakunallam apanqaku,

paykunatam Tayta Dios akllarqa paypa baulninta apanankupaq hinaspa tukuy tiempo payta servinankupaq —nispa.

3 Davidmi Jerusalen llaqtaman huñuchirqa Israel casta llapallan runakunata chaynapi Tayta Diospa baulninta alistachisqan sitioman apamunankupaq.

4 Huñurachirqataqmi Aaronpa mirayninkunatapas chaynataq Leviy casta runakunatapas.

5 Coatpa mirayninkunamantam huñurachirqa pachak iskay chunkan runakunata,

paykunapa jefenmi karqa Uriel.

6 Meraripa mirayninkunamantam huñurachirqa iskay pachak iskay chunkan runakunata,

paykunapa jefenmi karqa Asaias.

7 Gersonpa mirayninkunamantam huñurachirqa pachak kimsa chunkan runakunata,

paykunapa jefenmi karqa Joel.

8 Elizafanpa mirayninkunamantam huñurachirqa iskay pachak runakunata,

paykunapa jefenmi karqa Semaias.

9 Hebronpa mirayninkunamantam huñurachirqa pusaq chunka runakunata,

paykunapa jefenmi karqa Eliel.

10 Uzielpa mirayninkunamantam huñurachirqa pachak chunka iskayniyoq runakunata,

paykunapa jefenmi karqa Aminadab.

11 Davidqa qayachirqataqmi sacerdote Sadoctawan sacerdote Abiatartapas,

qayachirqataqmi Leviy castamanta Urieltapas,

Asaiastapas,

Joeltapas,

Elieltapas chaynataq Aminadabtapas.

12 Paykunatam nirqa:

—Leviy castakunapi jefekuna kasqaykichikraykuyá chuyanchakuychik,

chuyanchaychiktaq castaykichikkunatapas chaynapi Israelpa yupaychasqan Tayta Diospa baulninta apamunaykichikpaq hinaspa alistasqay sitioman churanaykichikpaq.

13 Punta kutipiqa qamkuna mana apamuptikichikmi yupaychasqanchik Tayta Dios wakinniykuta wañurachirqa,

chaynataqa rurarqa paypa leyninman hina mana tapusqaykuraykum —nispa.

14 Chay sacerdotekunawanmi Leviy casta runakuna chuyanchakurqaku Israelpa yupaychasqan Tayta Diospa baulninta apamunankupaq.

15 Chaymi Leviypa mirayninkuna apamurqaku Diospa baulninta varillankunamanta hombrorikuspanku,

chaynataqa rurarqaku Moisesman Tayta Diospa kamachisqanpi hinam.

16 Davidqa kamachirqataqmi Leviy casta runakunapa jefenkunatapas chaynapi castamasinkunamanta takiqkunata tocanantintakama churanankupaq,

churarqakuqa takispa kusikuywan taksa arpakunawan,

hatun arpakunawan chaynataq platillokunawan compañanankupaqmi.

17 Leviy casta runakunamantam akllarqaku Joelpa churin Hemantawan castamasin Berequispa churin Asafta.

Akllarqakutaqmi Meraripa miraynin otaq castamasin Cusaiaspa churin Etantapas

18 chaynataq paykunapa castanku punta jefekunaman qatiqkunatapas,

paykunam karqa Zacarias,

Jaaziel,

Semiramot,

Jehiel,

Uni,

Eliab,

Benaia,

Maasias,

Matatias,

Elifelehu,

Micnias.

Akllarqakutaqmi punkukunawan cuentallikuqkunamantapas,

paykunam karqa Obed-edom hinaspa Jehiel.

19 Takiqkunamantam Heman,

Asaf hinaspa Etan tocarqaku broncemanta platillokunata.

20 Alamot tonopi taksa arpakunata tocaqñataqmi karqa Zacarias,

Aziel,

Semiramot,

Jehiel,

Uni,

Eliab,

Maasias hinaspa Benaia.

21 Matatiasñataqmi Elifelehupiwan,

Micniaspiwan,

Obed-edompiwan,

Jeielpiwan hinaspa Azariaspiwan tocarqaku hatun arpakunata seminit tonoman hina guiaspanku.

22 Leviy castakunapa jefen Quenanias sutiyoq runañataqmi takiqkunapa maestron karqa,

paymi takiqkunamanta cuentallikurqa allin yachachisqa kasqanrayku.

23 Berequiaswan Elcanañataqmi Diospa baulninmanta cuentallikuqkuna karqaku.

24 Sacerdotekunamantañataqmi Sebanias,

Josafat,

Natanael,

Amasai,

Zacarias,

Benaias hinaspa Eliezer tocarqaku cornetillakunata,

paykunaqa tocarqaku Diospa baulninpa ñawpaqninpim.

Obed-edonwan Jehiaspas Diospa baulnin cuidaqkunam karqaku.

25 Davidmá Israel casta ancianokunawan hinaspa waranqantin tropa kamachiqkunawan rirqaku Tayta Diospa contrato baulninta Obed-edompa wasinmanta kusikuywan apamunankupaq.

26 Tayta Diospa contrato baulninta apananpaq Leviy casta runakunata Dios yanapasqanraykum qanchis malta torokunata hinaspa qanchis carnerokunata wañuchirqaku ofrendapaq.

27 Davidmi kachkarqa fino linomanta pachawan pachasqa,

hina chayna pachasqataqmi kachkarqa baul apaq llapallan Leviy casta runakunapas,

takiqkunapas chaynataq takiqkunapa maestron Quinaniaspas.

Davidqa pachakurqataqmi linomanta efodwanpas.

28 Chaynatam llapallan Israel castakuna aparqaku Tayta Diospa contrato baulninta,

aparqakuqa kusikuymanta qaparistinmi hinaspa cornetakunata,

cornetillakunata,

platillokunata,

taksa arpakunata hinaspa hatun arpakunata tocastinmi.

29 “Davidpa Llaqtanwan” sutichasqa llaqtaman Tayta Diospa contrato baulnin chayaruptinmi Saulpa warmi churin Mical ventanamanta qawarispa rey Davidta rikururqa kusikuspa tusuchkaqta chaymi sinchita despreciarurqa.