Israel castaqa mana kasukuq kasqankumanta
106
¡Aleluya!
Allin kasqanraykuyá
Tayta Diosman graciasta qoychik.
Wiñaypaq kuyapayakuq kasqanraykuyá
Tayta Diosman graciasta qoychik.
2 ¿Pitaq rimarinqa
atiywan Tayta Diospa rurasqankunamanta?
¿Pitaq willakunqa
Tayta Diosqa alabana kasqanmanta?
3 ¡Mayna kusisqam
Diospa reglamenton cumpliqkunaqa!
¡Mayna kusisqam
tukuy tiempopi allinta ruraqkunaqa!
4 Dios Taytalláy,
runaykikunata favorecespaykiqa
yuyariykullawayá.
Salvanaykipaq hamuspaykiqa
yuyariykullawayá.
5 Chaynapim akllasqaykikunapaq
allin rurasqaykita qawasaq.
Chaynapim nacionnikipa
kusikusqanwan kusikusaq.
Chaynapim runaykikunawan
ñoqapas alabasaq.
6 Abueloyku hinam
huchallikurqaniku.
Mana allinllatam
ñoqaykupas rurarqaniku.
Huchallatam
ñoqaykupas rurarqaniku.
7 Egipto nacionpi milagroykikunamantaqa
abueloykutam mana imapas qokurqachu.
Achka-achka kutipi kuyapayasqaykitam
mana yuyarirqakuchu.
Puka Lamar Qochapa waqtanpim
mana kasusurqankichu.
8 Chaywanpas Tayta Diosmi
salvaykurqa sutinrayku
chaynapi ancha atiyniyoq
reqsisqa kananrayku.
9 Puku Lamar Qochata
kamachiptinmi chakirurqa.
Chay ukuntam
chunniqninta hina pasachirqa.
10 Chaynatam cheqniqninkunamanta
salvarqa.
Chaynatam enemigonkunamanta
librarqa.
11 Contraqnin runakunatam
yaku pamparurqa.
Manam hukllapas
kawsarqachu paykunamantaqa.
12 Chaymi Diospa palabranta creerqaku.
Chaymi payman takispa alabarqaku.
13 Chayllam qonqarurqaku
Diospa rurasqankunata.
Manam suyarqakuchu
paypa piensasqankunata.
14 Munasqallanku mikuytam
munarqaku chunniqpi.
Chaynapim Diosta
piñachirqaku purunpi.
15 Chaymi pay qorqa
mañakusqankuta
ichaqa kachamurqam
wañuchikuq onqoyta.
16 Campamentonpipas paykunaqa
Moisesmantam envidiakurqaku.
Tayta Diospaq sapaqchasqan
Aaronmantam envidiakurqaku.
17 Chaymi allpa kicharikuruspa
Datan runata millpururqa.
Abiramtapas kuska
kaqmasinkunatawanmi taparurqa.
18 Ninam paykunapa huñunakuyninpi
ratarirurqa.
Mana allin ruraq runakunatam
ruparurqa.
19 Oreb lawpim
toro taytachata rurarqaku.
Qorimanta fundisqa
taytachatam rurarqaku.
20 Kanchariq Diosninkutam
paykunaqa tikrarurqaku.
Qora mikuq animalpa
imagenninwanmi tikrarurqaku.
21 Salvaqninku Diostam
paykunaqa qonqarurqaku.
Egiptopi atiywan
rurasqantam qonqarurqaku.
22 Qonqarurqakumá Cam castapa allpanpi
admirakuypaq rurasqanta.
Qonqarurqakumá Puka Lamar Qochapi
manchakuypaq rurasqanta.
23 Chaymi paykunata tukurunanpaq
Dios rimarirqa.
Ichaqa akllakusqan Moisesmi
chawpinkupi sayaykurqa.
Piñakuyninta tanichinanpaqmi
chaypi sayaykurqa.
Mana tukusqa kanankupaqmi
chaypi sayaykurqa.
24 Chaymantapas munayllapaqña allpatam
despreciarqaku.
Diospa promesanpi mana creespam
despreciarqaku.
25 Diospa contranpim
karpanku ukupi rimarqaku.
Tayta Diospa nisqanta
mana kasukuqmi karqaku.
26 Chaymi paykunapa contranpi jurarqa.
Chaymi chunniqpi wañuchinanpaq rimarqa.
27 Payqa jurarqa mirayninkutapas
nacionkunapi wañuchinanpaqmi.
Payqa jurarqa mirayninkutapas
runakunapa kasqanman cheqechinanpaqmi.
28 Baal-peor taytacha adoraqkunamanmi
hukllawakurqaku.
Wañuqkunaman ofrecesqanku
aychatam mikurqaku.
29 Diostam piñachirqaku
mana allin rurasqankuwan
chaymi paykunata castigarqa
peste onqoywan.
30 Fineesmi huchallikuqpa contranpi
hatarirurqa.
Hinaptinmi peste onqoyqa
chayraq tanirurqa.
31 Chaymi paytaqa allin ruraqpaq
Dios chaskirqa.
Wiña-wiñaypaqmi
mirayninkunatapas chaskirqa.
32 Meriba sutiyoq yakupa kasqanpipas
Diostam piñachirqaku
chaymi Moisespaq mana allinchu
karqa paykunarayku.
33 Paytam piñarachirqaku sinchita
hinaptinmi rimarqa hapisqanta.
34 Tayta Diospa chinkachiy munasqankunatam
mana chinkachirqakuchu.
Wañuchiychik chay runakunata,
nichkaptinmi mana chinkachirqakuchu.
35 Aswanraqmi chay nacionkunapi
runakunawan hukllawanakurqaku.
Paykunapa imam ruranankuta
yacharuspam chaynataña rurarqaku.
36 Taytacha-mamachankutañam adorarqaku.
Chaykunam paykunata pantarachirqaku.
37 Demoniokunapaqmi
qari churi-wawankuta wañuchirqaku.
Demoniokunapaqmi
warmi churi-wawankuta wañuchirqaku.
38 Paykunam wañuchirqaku
Canaan allpapi
inocente wawakunata.
Canaan runakunapa
taytacha-mamachankupaqmi
wañuchirqaku churi-wawankuta.
Chaymi chay nacionpi runakuna
huchayoq karqaku
wañuchisqankumanta.
39 Chay rurasqankuwanmi
millakuypaqña rikurirurqaku.
Chuchumika warmi hinam
rurayninkuwan huchallikurqaku.
40 Tayta Diosmi anchata
runankunapa contranpi rabiarurqa.
Tayta Diosmi runankunata
millakuypaqtaña qawarqa.
41 Dios mana reqsiq nacionkunamanmi
qoykurqa.
Cheqniqninkunañam paykunapiqa
munaychakurqa.
42 Enemigonkunam ñakarichirqaku.
Paykunapa humillachisqanñam karqaku.
43 Achka kutitam
Dios librarqa paykunata.
Aswanqa manam
kasukurqakuchu consejasqanta.
Humillachisqam karqaku
mana allin rurasqankumanta.
44 Chaywanpas Tayta Diosqa qawarirqam
llakikuypi kasqankuta.
Chaywanpas payqa uyarirqam
qaparispa mañakusqankuta.
45 Paykunawan contrato rurasqanta yuyarispam
mana castigarqachu.
Sinchi kuyapayakuq kasqanraykum
mana castigarqachu.
46 Preso pusaqninkunawanmi
llakipayariykachirqa.
Llapallan presochaqninkunawanmi
llakipayariykachirqa.
47 Dios Taytallayku,
qampuniyá salvaykullawayku.
Nacionkunamantayá huñuykuwayku
qanman graciasta qonaykupaq.
Nacionkunamantayá huñuykuwayku
kusikuyllawanña alabanaykupaq.
48 Israelpa yupaychasqan Tayta Diosqa
alabasqayá kachun.
Wiñaymanta wiñaykamayá
payqa alabasqa kachun.
Llapallan runakunayá:
Amen,
nispa nichun.
¡Aleluya!