Israel castapaq Tayta Diospa milagronkunamanta
105
Tayta Diosmanyá
graciasta qoychik.
Sutinmantayá
payta mañakuychik.
Runakunamanyá
rurasqankunata reqsichiychik.
2 Paymanyá alabanzakunata
takiychik.
Llapallan milagronmantayá
rimaychik.
3 Chuya sutinmantayá
qamkunaqa alabakuychik.
Tayta Diosta maskaqkunaqa
sonqoykichikpiyá kusikuychik.
4 Tayta Diostayá
qamkunaqa maskaychik.
Atiynintayá
qamkunaqa maskaychik.
Tukuy tiempoyá
payllataña maskaychik.
5 Rurasqan milagrokunamantayá
yuyariychik.
Admirakuypaq rurasqankunamantayá
yuyariychik.
Sentencia rimasqankunamantayá
yuyariychik.
6 Yuyariychikyá,
serviqnin Abrahampa mirayninkuna.
Yuyariychikyá,
akllasqan Jacobpa mirayninkuna.
7 Payqa yupaychasqanchik Tayta Diosmi.
Payqa allin arreglokuna ruraqmi.
Payqa tukuy kay pachapi arreglaqmi.
8 Payqa wiña-wiñaypaqmi
yuyachkan contrato rurasqantaqa.
Waranqantin miraykunapaqmi
payqa yuyachkan kamachisqan palabrakunataqa.
9 Abrahanwan rurasqan contratotaqa
manam qonqanchu.
Isaacman jurasqan contratotaqa
manam qonqanchu.
10 Jacobpaq decretontam segurarqa.
Israelpaq wiñaypaq contratontam segurarqa.
11 Abrahamtam Tayta Dios nirqa:
Qanmanmi qosqayki
Canaan law allpata,
nispa.
Qanmanmi qosqayki
tocanciaykichik allpata,
nispa.
12 Paykunaqa asllaraq kachkaptinkum,
chaypi forastero kachkaptinkum,
13 nacion-nacion purichkaptinkum,
gobiernon-gobiernon purichkaptinkum
14 Diosqa mana consienterqachu
pipas ñakarichinanta.
Paykunarayku qaqchaspam
nirqa reykunata:
15 Akllasqay runakunataqa
amam llachpankichikchu,
nispa.
Ñoqamanta willakuqkunataqa
amam imanankichikchu,
nispa.
16 Kay pachamanmi
yarqayta kachamurqa.
Kawsanankupaq mikuytam
chinkarachirqa.
17 Paykunapa ñawpaqnintam
huk runata kacharqa.
Sirvientepaq rantikusqa
Joseytam kacharqa.
18 Chakinkunatam cadenawan watarqaku.
Kunkanmantam cadenawan watarqaku.
19 Chaynaqa karqa
Joseypa nisqan cumplikunankamam
otaq paypa cheqap rimaq kasqanta
Tayta Dios qawachinankamam.
20 Reymi runankunata kachaspan
Joseyta kachaykachirqa.
Achka runakunapi munaychakuqmi
payta kachaykachirqa.
21 Wasinpi kamachikunanpaqñam
churaykurqa.
Joseymi tukuy kapuqninpi
gobiernarqa.
22 Jefekunatapas munasqanman hina
kamachinanpaqmi churaykurqa.
Ancianonkunatapas yachayta
yachachinanpaqmi churaykurqa.
23 Israelmi Egipto nacionman yaykurqa.
Jacobmi Cam castapa allpanpi yacharqa.
24 Diosmi achka-achkaman
runakunata mirarachirqa.
Enemigonkunamantapas
aswan kallpayoqtam rurarurqa.
25 Egipto runakunapa sonqontam tikrarqa
runankunata cheqninanpaq.
Egipto runakunapa sonqontam tikrarqa
sirvientenkunata engañananpaq.
26 Tayta Diosmi kacharqa
serviqnin Moisesta.
Tayta Diosmi kacharqa
akllasqan Aaronta.
27 Paykunam rurarqaku
milagrokunata Egipto runakunapi.
Admirakuypaq kaqkunatam
rurarqaku Cam castapa allpanpi.
28 Dios tutayarachiptinmi
lliw nacion tutayarurqa.
Ichaqa manam kasukurqakuchu
palabrankunataqa.
29 Yakukunatam yawarman tikrarurqa.
Challwakunatam pasaypaq wañurachirqa.
30 Nacionninkupim kayrakuna mirarurqa.
Reyninkupa palacionmanmi yaykururqa.
31 Rimariykuptillanmi
achka-achka tankayllukuna hamururqa.
Rimariykuptillanmi
puka chuspikuna lliw nacionman huntarurqa.
32 Paramantam
runtu parata parachirqa.
Lenguachkaq ninatam
nacionpi rikurichirqa.
33 Uvas plantakunatawan
higos plantakunatam tukururqa.
Nacionpi llapallan sachakunatam
lliw pakiparurqa.
34 Rimariykuptillanmi
aqarwaykuna rikurirurqa.
Mana yupay atinam
aqarwaychakunapas rikurirurqa.
35 Nacionpi qorakunatam mikururqa.
Chakrapi wiñaqkunatam mikururqa.
36 Nacionninkupi llapa piwikunatam
wañurachirqa.
Punta kaq churi-wawankutam
wañurachirqa.
37 Qori-qollqeyoqtam
runankunata horqomurqa.
Manam imapas pasarqachu
paykuna castataqa.
38 Egipto runakunam
lloqsimusqankuwan kusikurqaku.
Paykunata manchakusqankuraykum
chaynata kusikurqaku.
39 Diosmi puyuta mastarirqa
paykunata tapaykunanpaq.
Tutanñataqmi ninata churarqa
paykunata achkinanpaq.
40 Aychata mañakuptinkum
yutukunata kachamurqa.
Cielokunamanta mikuywantaqmi
paykunata saksachirqa.
41 Qaqata raqrarachiptinmi
yaku pawamurqa.
Chaki allpantam
mayu hinaraq puririrqa.
42 Manam qonqarqachu
chuya promesanta.
Serviqnin Abrahanman
prometesqanta.
43 Runankunatam horqomurqa
llumpay kusisqata.
Akllasqankunatam horqomurqa
sinchi kusisqata.
44 Huklaw nacionniyoq runakunapa
allpantam qoykarirqa.
Chay runakunapa llamkasqantam
dueñochaykachirqa
45 chaynapi decretonkunata
kasukunankupaq,
chaynapi yachachisqankunata
cumplinankupaq.
¡Aleluya!