Unanchaqninchikta alabasunchik.
104
Tukuy sonqoywanmi Tayta Diosta alabasaq.
Yupaychasqay Dios Taytalláy
¡mayna hatunmi qamqa kanki!
Suma-sumaq kanchariq pachawan
pachakuchkaq hinam kancharinki.
2 Pachawan hinam
achkiwan churakunki.
Telata hinam
cielokunata mastarunki.
3 Lamar qochapa hawanpim
wasikipa altosninta churarunki.
Qamqa puyukunatam
carretaykipaq churanki.
Wayrapa rapranpi pawachkaq hinam
qamqa purinki.
4 Willakuqniki kananpaqmi
wayrakunata churanki.
Serviqniki kananpaqmi
ninapa rupayninta churanki.
5 Kay pachatam maypim
tiyananpaq unancharqanki.
Mana haykapipas suchurinanpaqmi
chaynata takyachirqanki.
6 Uku-uku lamar qochawanmi
kay pachata tapaykurqanki.
Pachawan tapaykuchkaq hinam
chaynata tapaykurqanki.
Orqokunatapas yakukunawanmi
qamqa tapaykachirqanki.
7 Qaqchaykuptikim yakukuna
ayqeypaq-ayqerqaku.
Rayoykipa toqyasqanwanmi
lluptiypaq-lluptikurqaku.
8 Yakukunam orqokunaman qespirurqaku.
Wayqokunamanmi tallikuykurqaku.
Señalasqayki sitiomanmi chayarurqaku.
9 Linderontam churarunki
chaymanta mana pasanankupaq
chaynapi kaqllamanta
allpata mana tapanankupaq.
10 Qanmi pukyukunata toqyachispa
wayqonkunata kallpachinki.
Orqokunapa chawpintam
chay yakukunataqa puririchinki.
11 Purunpi llapallan animalkunam
chay yakuta tomanku.
Montepi asnokunam
yakunayayninkuta tanichinku.
12 Alton pawaqkunam
mayupa patanpi yachanku.
Alton pawaqkunam
sachakunapa kallmanpi takinku.
13 Cielomanta parachisqaykiwanmi
orqokunata parqoykunki.
Allpatapas parachisqaykiwanmi
qamqa saksaykachinki.
14 Animalkunapaqmi pastokunata wiñachinki.
Mikunankutapas allpamanta
horqonankupaqmi chaynata rurarunki.
15 Vinotam horqonku
sonqonkuta kusichinankupaq.
Aceitetam horqonku
uyankuta llusikunankupaq.
Tantatañataqmi horqonku
kallpanchakunankupaq.
16 Tayta Diospa sachankunaqa
yakuwan saksasqam.
Líbano lawpi plantasqan cedrokunapas
yakuwan saksasqam.
17 Chaypim alton pawaqkuna qesachakun.
Cipres sachapim cigueñapas qesachakun.
18 Alto orqokunaqa
monte cabrakuna purinanpaqmi.
Waqta ranrakunaqa
purun qowikuna pakakunanpaqmi.
19 Killan-killan yupanapaqmi
rurarqanki killata.
Intiqa yachanmi
ima horam seqaykuyta.
20 Tutayachiptikim chayaramun tutapas.
Tutaqa lloqsinmi monte animalkunapas.
21 Leonkunam mikunanta
maskaspa qaparkachanku.
Qanmantam paykunaqa
mikunanta mañakunku.
22 Achikyaruptinmi ichaqa kutikunku.
Machayninman yaykuruspam puñukunku.
23 Runañataqmi llamkananpaq lloqsin.
Tardeykuqkama llamkananpaqmi lloqsin.
24 Dios Taytalláy,
mana yupay atinam
qampa rurasqaykikunaqa.
Yachaywanmi rurarqanki
tukuy chaykunataqa.
Unanchasqaykikunawanmi
huntarun kay pachaqa.
25 Chaypiqa ancho-ancho
lamar qocham kachkan.
Chaypiqa mana yupay atina
animalkunam kachkan.
Taksapas-hatunpas
animalkunam kachkan.
26 Lamar qochapim
purichkan buquekunapas.
Qanmi unancharqanki
Liviatan animaltapas.
Chaypi pukllananpaqmi
unancharqanki chay animaltapas.
27 Llapallankum mikuchinaykipaq suyanku.
Tiempollanpi mikuchinaykipaqmi suyanku.
28 Paykunaman qoptikim
mikunankuta huñukunku.
Makikita kichariptikim
allinkunawan saksakunku.
29 Manaña favoreceptikiqa
pasaypaqmi mancharikunku.
Vidanta qechuruptikiqa
wañuruspam allpayarunku.
30 Espirituykita kachaspaykim
kaqllamanta unanchanki.
Kay pachapa rikchaynintam
kaqllamanta mosoqyachinki.
31 Tayta Diosqa wiñaypaqyá
reqsisqa kachun.
Tayta Diosqa rurasqanmantayá
kusikuchun.
32 Pay qawarimuptinqa
kay pachapas katkatatanmi.
Pay tupaykuptinqa
orqokunapas qosnirinmi.
33 Kawsanaykamam Tayta Diosman takisaq.
Kawsanaykamam takita paypaq takisaq.
34 Yuyaymanasqaypiyá agradakuchun payqa.
Tayta Diosllapim kusikuni ñoqaqa.
35 Kay pachamantayá
chinkachun huchasapakunaqa.
Amañayá kachunkuchu
mana allin ruraqkunaqa.
Tukuy sonqoywanmi
Tayta Diosta alabasaq.
¡Aleluya!