Tayta Diostam alabasaq
Davidpa takisqan
103
Tukuy sonqollaywanmi
Tayta Diosta alabasaq.
Tukuy yuyayniywanmi
chuya sutinta alabasaq.
2 Tukuy sonqoywanmi
alabasaq Tayta Diosta.
Manam qonqasaqchu
tukuy favorninkunata.
3 Paymi tukuy mana allin
rurasqaymanta pampachaykuwan.
Paymi tukuy onqoymanta
ñoqallayta sanoyachiwan
4 Wañunaymantaraqmi
payqa libraykullawan.
Llakipayariwaspam
payqa kuyapayawan.
5 Kawsanaykamam payqa
allinkunawan saksaykachiwan.
Anka hina kallpayoq
kanaypaqmi mosoqyaykachiwan.
6 Tayta Diosmi
allin kaqkuna ruraqqa.
Paymi ñakariqkunapaq
allin arreglo ruraqqa.
7 Moisesmanmi yachachirqa
imaynam tanteasqanqa kasqanmanta.
Israelpa mirayninmanmi
qawachirqa admirakuypaq rurasqankunata.
8 Tayta Diosqa llakipayakuqmi.
Tayta Diosqa kuyapayakuqmi.
Payqa mana chaylla piñakuruqmi.
Payqa ancha kuyakuq sonqoyoqmi.
9 Manam wiñaypaqchu anyawasun.
Manam wiñaypaqchu piñakuwasun.
10 Manam huchanchikman hinachu
castigawanchik.
Manam mana allin rurasqanchikman hinachu
pagawanchik.
11 Imaynam cielokuna
allpamanta alto-altopi kachkan,
chaynam respetaqninkunapaq
kuyapayakuyninpas hatu-hatun kachkan.
12 Intipa qespimunantam
intipa seqaykunanmanta karuncharun.
Chaynam mana kasukusqanchiktapas
ñoqanchikmanta karuncharun.
13 Imaynam tayta
churinkunata llakipayan,
chaynam Tayta Diospas
respetaqninkunata llakipayan.
14 Payqa yachanmi
imamanta rurasqa kasqanchikta.
Payqa yuyanmi
allpamanta rurasqa kasqanchikta.
15 Runapa vidanqa qora hinallam,
chakrapi waytariq qora hinallam.
16 Wayra qespiramuspanmi
chinkarachin chay qorataqa.
Manam yachakunchu
maypim wiñasqanqa.
17 Tayta Diospa kuyapayakuyninmi
ichaqa kachkan wiña-wiñaypaq.
Respetaqninkunapaq kuyapayakuyninmi
ichaqa kachkan wiña-wiñaypaq.
Allin rurayninmi kachkan
respetaqninkunapa mirayninkunapaq.
18 Chayna rurasqankunaqa kachkan
contraton cumpliqkunapaqmi
hinaspa kamachisqankunata
mana qonqaspa kasukuqkunapaqmi.
19 Tayta Diosmi tiyananta
hanaq pachapi churarun.
Llapallanpi munaychakunanpaqmi
chaypi churarun.
20 Angelkuna,
Tayta Diostayá alabaychik.
Kallpasapakuna,
payllatayá alabaychik.
Kamachisqan ruraqkunayá alabaychik.
Nisqankunata kasukuqkunayá alabaychik.
21 Llapallan tropankuna,
Tayta Diostayá alabaychik.
Munasqanta ruraspa serviqninkuna,
payllatañayá alabaychik.
22 Llapallan unanchasqankuna,
Tayta Diostayá alabaychik.
Tukuy munaychakusqan sitiokunapi kaqkuna,
payllatañayá alabaychik.
Tukuy sonqoywanmi Tayta Diosta alabasaq.