Llakisqa runapa mañakuynin
Ñakariqpa mañakusqan otaq llakisqa kaspan Tayta Diosman willakusqan
102
Dios Taytalláy,
mañakamullasqaytayá uyariykullaway.
Qayakamullasqaytayá chaskiykamullaway.
2 Llakikusqay punchawpiqa
amayá pakaykuwaychu uyaykita.
Llakikusqay punchawpiqa
qamyá uyariykullaway ñoqallayta.
Qayakamullasqay punchawpiqa
chayllayá contestaykamuway ñoqallayta.
3 Vidallaymi qosni hinaraq tukuchkan.
Tullullaykunam sansa hinaraq rupachkan.
4 Sonqollaypas hukmanyasqañam kachkani.
Chakiruq qora hinañam kachkani.
Mana mikunayay ganasniyoqñam kachkani.
5 Qaparkachasqayraykum
tullunwan-qarallanña kachkani.
6 Ñoqaqa chunniqpi
chuseq hinañam kachkani.
Purmasqa wasikunapi
tuku hinañam kachkani.
7 Ñoqaqa manaña puñuy tariqmi kallani.
Wasipa hawanpi pichiwchakuna hinam kallani.
Sapachallan kaq pichiwchakuna hinam kallani.
8 Sapa punchawmi
enemigoykuna kamiwanku.
Contraypi locoyaqkunam
ñakapayawanku.
9 Tantamantam uchpataña mikullani.
Tomaspaypas weqeytawanmi tomallani.
10 Chaytaqa rurani piñakurusqaykiraykum.
Chaytaqa rurani rabiakurusqaykiraykum.
Qanmi ñoqataqa hatunchawarqanki.
Ichaqa kikillaykim humillarachiwanki.
11 Llantuy hinam pasarun wataykunaqa.
Qora hinam chakiruchkaniña ñoqaqa.
12 Dios Taytalláy,
qamqa wiñaypaqmi gobiernanki.
Wiña-wiñaypaqmi yuyasqa kanki.
13 Hatarispaykim llakipayanki.
Sion llaqtatam llakipayanki.
Llakipayanayki tiempoñam.
Plazoqa cumplikurunñam.
14 Serviqnikikunaqa kuyanmi
Sion llaqtapa ruminkunatapas.
Serviqnikikunaqa kuyapayanmi
chaypi tarikuq allpatapas.
15 Nacionkunam respetasunki qam Tayta Diosta.
Kay pachapi llapallan reykunam
respetanqaku reqsisqa kaynikita.
16 Sion llaqtata kasqallan hatarichisqaykirayku,
chaynataq reqsisqa kaynikita qawachikusqaykirayku.
17 Qamqa uyarinkim
mana imayoqkunapa mañakusqanta.
Qamqa chayllam chaskinki
paykunapa mañakusqanta.
18 Chaykunaqa qellqasqayá kachun
hamuq miraykunapaq,
chaynapi hamuq punchawpi nacemuqkuna
Tayta Diosta alabanankupaq.
19 Altopi santuarionmantam
Tayta Dios qawamun.
Paymi hanaq pachamanta
kay pachata qawamun.
20 Payqa qawamuchkan
presokunapa hikikyasqata uyarinanpaqmi.
Payqa qawamuchkan
wañunanpaq sentenciasqakunata kacharinanpaqmi.
21 Chaynapim Sion llaqtapi
Tayta Diosmanta willakunqaku.
Chaynapim Jerusalen llaqtapi
payllataña alabanqaku.
22 Chaynataqa ruranqaku
runakuna huñunakuptinkum.
Chaynataqa ruranqaku
nacionkuna huñunakuptinkum.
Chaynataqa ruranqaku
Tayta Diosta adoranankupaq huñunakuptinkum.
23 Kallpayoqraq kachkaptiymi eqoyarachiwarqa.
Ñoqapa wataykunatam menosyarachirqa.
24 Chaymi Tayta Diosta nirqani:
Amayá wataykunataqa menosyarachiychu,
nispa.
Kallpallaypiraq kachkaptiyqa
amayá menosyarachiychu,
nispa.
Qamqa wiña-wiñaypaq kawsakuqmi kanki.
25 Qallariyninpim kay pachata cimientarqanki.
Cielokunatam atiynikiwan unancharqanki.
26 Chaykuna puchukaruptinpas
takyankim qamqa.
Lliwmi pacha hina mawkayarunqa.
Mudachichkaq hinam
mudarachinki qamqa.
Chaykunaqa mawka pacha hinam
wischuchikunqa.
27 Qanmi ichaqa hina kaqlla kanki.
Mana tukuq watayoqmi kanki.
28 Serviqnikipa mirayninkunaqa
qayllaykipim yachanqaku.
Qayllaykipim manaña
kuyuchisqa kanqaku.