Tayta Diosman reypa prometesqanmanta
Diosman Davidpa takisqan
101
Dios Taytalláy,
kuyapayakuynikimantam takisaq.
Allin arreglasqaykimantam takisaq.
Qamllataña alabaspaymi takisaq.
2 Cuidakusaqmi
mana huchallikuspa kawsanaypaq.
¿Haykapitaq qamqa
ñoqaman hamuwaq?
Mana hucha sonqoyoqmi
palacioypipas kawsasaq.
3 Mana allin kaqkunatam qepanchakusaq.
Cheqninim Diosmanta
karunchaqkunapa rurasqantaqa.
Manam qatipakusaqchu
paykunapa rurasqantaqa.
4 Qarqorusaqmi
mana allin piensasqaykunataqa.
Manam qawarisaqchu
mana allin ruraqtaqa.
5 Upallachisaqmi
runamasinpa qepanpi rimaqtaqa.
Manam aguantasaqchu
hatun tukuq orgulloso runataqa.
6 Nacionpi confianza
runakunatam akllasaq.
Ñoqawan kananpaqmi
paykunataqa akllasaq.
Mana huchallikuqmi
ñoqataqa serviwanqa.
Mana chayna kawsaqmi
ñoqataqa serviwanqa.
7 Engañaq runaqa palacioypiqa
manam yachanqachu.
Llulla runaqa qayllaypiqa
manam servikunqachu.
8 Sapa punchawmi upallachisaq
nacionpi lliw mana allin ruraqkunata.
Tayta Diospa llaqtanmantam qarqosaq
llapallan mana allin ruraqkunata.