PICHQA KAQ LIBRO (107-150)
Tayta Diospa kuyapayakuyninmanta
107
Allin kasqanraykuyá
Tayta Diosman graciasta qoychik.
Wiñaypaq kuyapayakuq kasqanraykuyá
Tayta Diosman graciasta qoychik.
2 Chaynatayá nichunku
Tayta Diospa reclamasqankuna.
Chaynatayá nichunku
enemigonkunamanta reclamasqankuna.
3 Chaynatayá nichunku
nacionkunamanta huñunasqankunapas,
intipa qespimunan lawmanta
huñusqankunapas,
intipa seqaykunan lawmanta
huñunasqankunapas
chaynataq lamar qocha lawmanta
huñunasqankunapas.
4 Chunniqpim purirqaku pantaruspanku.
Purunpim purirqaku pantaruspanku.
Llaqtaman riq ñantam
mana tarirqakuchu.
Yachanankupaqmi
mana tarirqakuchu.
5 Yarqaymanta kaspankum wañunayarqaku.
Yakumanta kaspankum wañunayarqaku.
6 Chaymi llakikuypi kaspanku
qayakurqaku Tayta Diosta.
Chaymi paykunata
libraykurqa sasachakuyninkumanta.
7 Derecho ñannintam
paykunata pusarqa.
Yachanankupaq llaqtamanmi
paykunata pusarqa.
8 Kuyapayakuyninmantayá Tayta Diosman
graciasta qochunku.
Runakunapaq milagronkunamantayá
graciasta qochunku.
9 Payqa yakunayasqatam tanichin.
Payqa yarqasqatam saksachin.
10 Wakinmi yacharqa
sinchi tutayaypi ñakarichisqa.
Wakinmi yacharqa
fierromanta cadenawan presochasqa.
11 Chaynaqa karqaku
Tayta Diospa palabranta
mana kasukusqankuraykum,
alto-altopi kaq
Diospa piensasqankunata
despreciasqankuraykum.
12 Chaymi sasa llamkaywan
humillachisqa karqaku.
Wichiykuptinkupas
manam pipas yanaparqachu.
13 Chaymi llakikuypi kaspanku
qayakurqaku Tayta Diosta.
Chaymi paykunata
salvaykurqa sasachakuyninkumanta.
14 Sinchi tutayaymantam
paykunata horqorurqa.
Preso kasqanku
cadenatam tipiparurqa.
15 Kuyapayakuyninmantayá
Tayta Diosman
graciasta qochunku.
Runakunapaq milagronkunamantayá
graciasta qochunku.
16 Broncemanta punkukunatam pakiparurqa.
Fierromanta cerrojokunatam chamchaparurqa.
17 Wakinmi mana kasukusqankurayku
mana yuyayniyoqña rikurirurqaku.
Mana allin rurasqankuraykum
paykunaqa ñakarirqaku.
18 Llapallan mikuytam millakurqaku.
Wañuy patankamam chayarurqaku.
19 Chaymi llakikuypi kaspanku
qayakurqaku Tayta Diosta.
Chaymi paykunata
salvaykurqa sasachakuyninkumanta.
20 Palabranta nimuspam sanoyachirqa.
Wañuymantam paykunata librarqa.
21 Kuyapayakuyninmantayá Tayta Diosman
graciasta qochunku.
Runakunapaq milagronkunamantayá
graciasta qochunku.
22 Payta adoranaykichikpaqyá
animalkunata wañuchiychik.
Rurasqankunamantayá
kusikuyllawanña willakuychik.
23 Lamar qochapi buquekunawan riqkunam,
lamar qochapi negocio ruraqkunam
24 rikurqaku Tayta Diospa rurasqankunata,
lamar qochapi rurasqan milagrokunata.
25 Rimarispanmi sinchillataña wayrarachirqa.
Olankunatam altokunaman hoqarichirqa.
26 Buquekunam altomanraq hoqarikurqaku.
Lamar qochapa ukunmanraqmi uraykurqaku.
Runakunam pasaypaqta hukmanyarurqaku.
27 Sinkakuna hinam runakuna
pasaypaq tamsaykacharqaku.
Buque manejay yachasqankupas
manañam valerqañachu.
28 Chaymi llakikuypi kaspanku
qayakurqaku Tayta Diosta.
Chaymi paykunata
horqorurqa sasachakuyninkumanta.
29 Sinchi wayratam menosyachirqa.
Hatun olakunatam hawkayachirqa.
30 Tukuy chaykuna hawkayaruptinñataqmi
chayraq kusikurqaku.
Tayta Dios yanapaptinmi
munasqanku llaqtaman chayarqaku.
31 Kuyapayakuyninmantayá
Tayta Diosman
graciasta qochunku.
Runakunapaq milagronkunamantayá
graciasta qochunku.
32 Runakunapa huñunakuyninpiyá hatunchaychik.
Ancianokunapa huñunakuyninpiyá alabaychik.
33 Mayukunata chakirachiptinmi
chunniq allpaña rikurirurqa.
Pukyukunata chakirachiptinmi
chaki allpaña rikurirurqa.
34 Kawsay qespiq allpakunatam
qollpa allpaman tikrarurqa.
Mana allin runakuna yachasqanraykum
chaynaman tikrarurqa.
35 Chunniq allpatam
qochayoq allpaman tikrarqa.
Chaki allpatam
pukyuyoq allpaman tikrarqa.
36 Chaymanmi churarqa
yarqaymanta kaqkunata.
Chaypim hatarichirqaku
yachanankupaq llaqtata.
37 Chakrakunapim tarpurqaku.
Uvas plantakunatam tarpurqaku
hinaspam achkanpi cosecharqaku.
38 Paykunata bendeciptinmi
achkaman mirarqaku.
Paykunata bendeciptinmi
animalninkupas mirarqaku.
39 Menosyachisqa,
humillachisqam
paykunaqa karqaku.
Ñakariypi,
sasachakuypi,
llakikuypim karqaku.
40 Diosqa desprecianmi
kamachikuq runatapas.
Payqa mana ñanpa kananpim
purichin paykunatapas.
Payqa pantaypim
purichin paykunatapas.
41 Wakchakunatam hoqarin
ñakarisqanmanta.
Ovejakunata hinam
mirachin castankuta.
42 Allin ruraq runakunam
qawaspanku kusikunku.
Llapallan mana allin
ruraqkunam upallanku.
43 Yuyayniyoq runaqa
chaykunapiyá piensachun.
Tayta Diospa
kuyapayakuynintayá entiendechun.