Tayta Diospa yanapaykuynin mañakusqanmanta
Diosman Davidpa takisqan
108
Diosnilláy,
ñoqaqa takinaypaqmi
listollaña kachkani.
Tukuy sonqowan takipunaypaqmi
listollaña kachkani.
2 Hatun arpa rikchariyá.
Taksa arpa rikchariyá.
Hatarichisaq intitayá.
3 Dios Taytalláy,
runakunapa qayllanpim
graciasta qosqayki.
Dios Taytalláy,
tukuy nacionkunapim
takikunata takipusqayki.
4 Cielokunamantapas alto-altoraqmi
qampa kuyapayakuynikiqa.
Puyukunamanpas haypaq hinaraqmi
confiakunapaq kaynikiqa.
5 Diosnilláy,
cielokunapa altonkamayá
hatunchasqa kay.
Diosnilláy,
tukuy kay pachapiyá
allin reqsisqa kay.
6 Chaynapi kuyasqaykikuna
librasqa kanaykupaq.
Atiynikiwanyá salvaykuwayku
librasqa kanaykupaq.
Qampuniyá contestaykuwayku
librasqa kanaykupaq.
7 Diosmi santuarionpi nirqa:
¡Mayna kusikuywanmi rakinasaq
Siquem llaqtapi allpakunata!
¡Mayna kusikuywanmi partipasaq
Sucot Qechwapi allpakunata!
8 Galaad allpakunaqa ñoqapam.
Manases allpakunaqa ñoqapam.
Efrainqa cascowan hina harkachikunaymi.
Judaqa akllakusqay gobiernaqmi.
9 Moab nacionmi ichaqa
lavatorio hina mayllakunay.
Edom nacionñataqmi
ñoqapa usutay wikapanay.
Filistea nacionñataqmi
venceruspay qaparinay.
10 ¿Pitaq pusawanqa
murallasqa llaqtamanqa?
¿Pitaq pusawanqa
Edom nacionmanqa?
11 Qamqariki Diosnilláy,
manam sayapakuwankikuñachu.
Qamqariki Diosnilláy,
tropaykuwanpas manam lloqsinkiñachu.
12 Enemigoykupa contranpiyá
yanapaykuwayku.
Runapa yanapakuyninqa
manam imapaqpas valenchu.
13 Diospa yanapakuyninwanmi
vencesun ñoqanchikqa.
Paymi saruparunqa enemigonchikkunataqa.