Vengakunanpaq Tayta Diosta qayakusqan
Takiqkunapa maestronpaq. Diosman Davidpa takisqan
109
Ñoqaqa alabaykim Diosnilláy.
Amayá upallaychu Diosnilláy.
2 Mana allin runakunam contraypi rimanku.
Engañakuqkunam contraypi rimanku.
Llullallatam contraypi rimanku.
3 Muyuriqniymantam insultawanku.
Mana imamantam atacawanku.
4 Kuyachkaptiypas acusawankuraqmi.
Ñoqallayqa mañakullachkaykiraqmi.
5 Allinta rurachkaptiypas
mana allinwanmi kutichiwanku.
Paykunataqa kuyachkaptiypas
cheqniypaqraqmi-cheqniwanku.
6 Mana allin runayá
chayna runataqa juzgachun.
Enemigon runayá
chayna runataqa acusachun.
7 Juzgasqa kaspapas
huchayoqyá rikurichun.
Paypa mañakusqanpas
huchanpaqyá kachun.
8 Watankunapas pisillañayá kachun.
Oficionmanpas huk runañayá yaykuchun.
9 Churinkunapas
mana taytayoqyá rikurichun.
Warminpas
mana qosayoqyá rikurichun.
10 Churinkunapas mañakustinyá
wasin-wasin purichunku.
Purmachisqa wasinkumantayá
wischusqa kachunku.
11 Llapa ima kapuqnintapas
manuqnin runayá apakuchun.
Tukuy ima ganasqantapas
forasterokunayá qechuruchun.
12 Paymanta kuyapayaqninqa
amayá pipas kachunchu.
Mana piyniyoq churinkunatapas
amayá pipas llakipayachunchu.
13 Paypaqa mirayninpas
tukusqayá kachun.
Paypaqa sutinpas
wiñaypaqyá chinkachun.
14 Dios Taytalláy,
taytanpa mana allin rurasqantaqa
amayá qonqaychu.
Mamanpa huchallikusqantaqa
amayá pampachaychu.
15 Dios Taytalláy,
paypa huchankunataqa
amapuniyá qonqaychu.
Kay pachapiqa
amañayá pipas yuyachunchu.
16 Mana kuyapayarispanmi
pitapas ñakarichirqa.
Ñakariqtawan wakchatam
payqa ñakarichirqa.
Sonqonpi hukmanyasqatam
wañunankama ñakarichirqa.
17 Ñakayllata kuyasqanraykuyá
kikinpuni ñakasqa kachun.
Mana favorecekuq kasqanraykuyá
amataq favorecesqachu kachun.
18 Pachawan hinam
ñakaypa intusqan karqa.
Chay ñakayqa yaku hinaraqmi
ukunmanpas yaykururqa.
Chay ñakayqa tullunkunamanpas
aceite hinaraqmi yaykururqa.
19 Chaynaqa chay ñakayqa
pachan hinayá kachun.
Chumpin hinaraqyá
wiñaypaq kachun.
20 Dios Taytalláy,
chaynatayá pagay cheqniqniykunaman.
Chaynatayá pagay contraypi rimaqkunaman.
21 Señor Diosnilláy,
qamqa allintayá ruraykullaway.
Pim kasqaykiraykuyá libraykullaway.
Kuyapayakuq kasqaykiraykuyá libraykullaway.
22 Ñoqaqa ñakariq wakcham kallachkani.
Sinchi llakisqa sonqoyoqmi kallachkani.
23 Chinkaruq llantuy hinallañam
kallachkani.
Wikaparusqa aqarway hinallañam
kallachkani.
24 Moqoykunapas katkatatachkanmi
ayunasqayrayku.
Ñoqallayqa tulluyaruniñam
mana mikusqayrayku.
25 Paykunam ñoqamanta asikunku.
Qawariwaspankum umankutapas aywirinku.
26 Yupaychasqay Dios Taytalláy,
ñoqallaytaqa qampuniyá
yanapaykullaway.
Kuyapayakuynikiman hinayá
salvaykullaway.
27 Dios Taytalláy,
yachachunkuyá
kayqa atiyniki kasqanta.
Dios Taytalláy,
yachachunkuyá
kaytaqa qampuni rurasqaykita.
28 Ñakawaptinkupas qamqa bendeciwankim.
Hatariptinkupas qamqa penqarachinkim.
Kay serviqnikitaqa kusichiwankim.
29 Acusaqniykunaqa pachawan
churasqa hinayá
penqaypi kachunku.
Paykunaqa capawan
churachisqa hinayá
penqaypi kachunku.
30 Ñoqaqa Tayta Diosmanmi
anchata graciasta qosaq.
Ñoqaqa achka runapa qayllanpim
payta alabasaq.
31 Payqa wakchapa favorninpim sayaykun.
Wañunanpaq juzgaqninmantam salvaykun.