Tayta Diosta alabanapaq mosoq taki
96
Kay pachapi llapallan kawsaqkuna,
Tayta Diosmanyá
mosoq takita takiychik.
Tayta Diosmanyá
qamkunaqa takiychik.
2 Tayta Diosmanyá takiychik.
Payllatañayá alabaychik.
Salvakuq kasqanmantayá takiychik.
Sapa punchawyá chaymanta willakuychik.
3 Nacionkunapi willakuychik
ancha reqsisqa kasqanmanta.
Runakunaman willakuychik
milagrokuna rurasqanmanta.
4 Tayta Diosqa mayna hatunmi.
Tayta Diosqa mayna alabanapaqmi.
Payqa lliw dioskunamantapas respetanapaqmi.
5 Yanqakunallam
llapa runakunapa diosninqa.
Tayta Diosmi ichaqa
cielokunata unancharqa.
6 Ancha kancharichkaqmi
kachkan payqa.
Santuarionpim kachkan
paypa atiyninqa.
Santuarionpim kachkan
sumaq kayninqa.
7 Runakunapa castankuna,
Tayta Diostayá reqsikuychik.
Ancha reqsisqam kanki,
nispayá niychik.
Ancha atiyniyoqmi kanki,
nispayá niychik.
8 Tayta Diostayá honraychik.
Sutinraykuyá payta honraychik.
Paymanyá ofrendakunata apamuychik.
Pationkunamanyá qamkunaqa yaykuychik.
9 Adorana pachakunawan pachakuspayá
Tayta Diosta adoraychik.
Llapallan kay pachapi runakunayá
paypa qayllanpi katkatataychik.
10 Tayta Diosmi gobiernachkan,
nispayá willakuychik.
Nacionkunapi runakunamanyá
chaynata willakuychik.
Paymi kay pachata takyachirqa
mana suchurinanpaq.
Allin arreglotam payqa
ruranqa runakunapaq.
11 Cielokunapas kusikuchunyá.
Kay pachapas kusikuchunyá.
Qaparichunyá lamar qochapas.
Qaparichunyá chaypi kaqkunapas.
12 Campokunapas kusikuchunyá.
Chaypi kaqkunapas kusikuchunyá.
Montepi llapa sachakunapas kusikunqakum.
Montepi llapa sachakunapas qaparinqakum.
13 Hamuq Tayta Diospa qayllanpim
paykunaqa kusikunqa.
Kay pachapi runakunata
juzgananpaqmi hamunqa.
Cheqap arregloman hina
runakunata juzgananpaqmi hamunqa.
Iguallatam imam kaqta arreglanqa.