Tayta Dios gobiernasqanmanta
97
Tayta Diosmi gobiernachkan.
Kay pachapi kaqkunaqa kusikuchunkuyá.
Lamar qochakunapa
patanpi yachaqkunaqa kusikuchunkuyá.
2 Puyukunapas paypa muyuriqninpim kachkan.
Tutayaypas paypa muyuriqninpim kachkan.
Allin rurayman hinam payqa gobiernan.
Derechonpim payqa tukuy imata gobiernan.
3 Paypa ñawpaqnintapas ninam richkan.
Muyuriqninpi enemigonkunatam rupachkan.
4 Llipyankunam kay pachata kancharichkan.
Kay pachapi kaqkunam rikuspa katkatatachkan.
5 Tayta Diospa qayllanpim
orqokuna cera hina chullurun.
Tukuy kay pachapa dueñonpa qayllanpim
chaynata chullurun.
6 Cielokunam willakun allin ruraq kasqanta.
Llapallan runakunam
rikunku paypa kanchariyninta.
7 Taytacha-mamachata
llapallan adoraqkunam penqakunku.
Taytacha-mamachankumanta
alabakuqkunam penqakunku.
Llapallan falso dioskunayá
qonqorakuchunku.
8 Dios Taytalláy,
Sion llaqtayoqkunam
uyarispa kusikunku.
Juda lawpi yachaqkunam
anchata kusikunku.
Allin arreglo rurasqaykiraykum
chaynata kusikunku.
9 Dios Taytalláy,
qamqa alto-altopim kachkanki.
Tukuy kay pachapa hawanpim kachkanki.
Llapa falso dioskunapa hawanpim kachkanki.
10 Tayta Dios kuyaqkuna,
cheqniychik mana allinta.
Payqa waqaychanmi
payman sonqoyoqkunata.
Payqa libranmi
mana allin runakunamanta.
11 Allin ruraq runapaqqa
punchawpas kanchirinmi.
Diospa munasqan ruraqtaqa
kusikuypas intuykunmi.
12 Allin runakuna,
Tayta Diospiyá kusikuychik.
Allin runakuna,
chuya Diostayá:
Gracias,
niychik.