Musoq takitayá takiychik.

Milagrokunatam payqa rurarun.

Atiyninwanmi payqa vencerun.

Chuyay-chuyay kallpanwanmi vencerun.

2 Tayta Diosmi vencesqanta qawachin.

Allin ruraq kasqantam qawachin.

Nacionkuna qawachkaptinmi qawachin.

3 Manam qonqarqachu

Israel castakunapa kuyapayakuyninta.

Manam qonqarqachu

payqa confiakunapaq kasqanta.

Enteron kay pacham rikurun

Diosninchikpa vencesqanta.

4 Kay pachapi llapallan kaqkuna,

Tayta Diosmanyá kusikuywan takiychik.

Kusikuywanyá qaparispa takiychik.

5 Tayta Diospaqyá arpata tocaychik.

Takiwanyá paypaq arpata tocaychik.

6 Tayta Diospa qayllanpiyá

cornetillakunata tocaychik.

Reyninchik Tayta Diospa qayllanpiyá

cornetakunata tocaychik.

7 Lamar qochapas qaparichunyá.

Chaypi kaqkunapas qaparichunyá.

Kay pachapas qaparichunyá.

Chaypi yachaqkunapas qaparichunyá.

8 Mayukunapas taqllakuq runa hinayá taqllakuchun.

Orqokunapas takiqkuna hinayá huklla qaparichun.

9 Tayta Diospa qayllanpiyá

chaynataqa qaparichun.

Payqa kay pachata

juzgananpaqmi hamunqa.

Kay pachatam

allin arregloman hina juzganqa.

Runakunatam payqa

derechonpi juzganqa.