Llapallanpa reyninqa Tayta Dioslla kasqanmanta
99
Tayta Diosmi gobiernachkan.
Runakunapas katkatatachunyá.
Payqa querubinkunapa chawpinpim tiyachkan.
Kay pachapas kuyurichunyá.
2 Hatunmi Sion llaqtapi kaq Tayta Diosqa.
Llapa runakunapim munaychakun payqa.
3 Diosnilláy,
hatun sutikitayá alabachunku.
Respetana sutikitayá alabachunku.
Chuya kasqaykiraykuyá alabachunku.
4 Qamqa atiyniyoq reymi kanki.
Qamqa allin arreglotam kuyanki.
Derechoyoq kanankupaqmi churarqanki.
Qanmi Jacobpa castankunapaq
allinta arreglarqanki.
Qanmi Jacobpa castankunapaq
allinta rurarqanki.
5 Chuya kasqanraykuyá
yupaychasqanchik Tayta Diosta hatunchaychik.
Chuya kasqanraykuyá
chakinkunapa ñawpaqninpi qonqorakuychik.
6 Moiseswan Aaronmi sacerdotekunawan kachkan.
Samuelñataqmi mañakuqkunawan kachkan.
Tayta Diostam paykunaqa mañakurqa
hinaptinmi Diosñataq contestamurqa.
7 Paykunamanmi sayaq puyumanta rimamurqa.
Kamachikuyninkunatam kasukurqaku paykunaqa.
Decretokuna qosqantam kasukurqaku paykunaqa.
8 Dios Taytallayku,
paykunatam qamqa contestamurqanki.
Pampachaqninku Diosmi karqanki.
Rurasqankuman hinam pagarqanki.
9 Yupaychasqanchik Tayta Diostayá hatunchaychik.
Sapaqchasqan orqopiyá qonqorakuychik.
Chuya Dios kasqanraykuyá
chaynata ruraychik.