Kusikuywanyá Tayta Diosman takisun.
95
¡Hamuychik takisunchik
Tayta Diosman!
¡Kusikuywan qaparisunchik
salvaqninchikman!
Payqa hatun rumi hinam amparawanchik.
Payqa tukuy imamantam salvawanchik.
2 Asuykuspayá graciasta qosunchik.
Qaparispayá payman takisunchik.
3 Tayta Diosqariki hatun Diosmi.
Lliw dioskunapi hatun reymi.
4 Uku-ukukunapim munaychakun kay pachapipas.
Payllapataqmi orqokunapa altonkunapas.
5 Paypataqmi lamar qochapas.
Paymi chaytaqa rurarqa.
Makinkunawanmi chaki allpatapas
payqa rurarqa.
6 Hamuptikichikyá kumuykuspa adorasunchik.
Tayta Diospa qayllanpiyá qonqorakusunchik.
Paymi ñoqanchiktaqa unanchawarqanchik.
7 Ñoqanchikpa Diosninchikmi payqa.
Runankunam kanchik ñoqanchikqa.
Michinan ovejankunam kanchik ñoqanchikqa.
Allinchá kanman kunan
nisqanta uyariptikichiqa:
8 Amayá sonqoykichikta rumiyachiychikchu
Meriba lawpi hinaqa.
Amayá sonqoykichikta rumiyachiychikchu
chunniq Masah lawpi hinaqa.
9 Chay chunniqpim ñawpa abueloykichikkuna
rurasqaykunata rikurqaku.
Chaywanpas ñawpa abueloykichikkunam
piñachiwaspa pruebawarqaku.
10 Tawa chunka watam chay runakunawan
piñasqa karqani,
chayraykum chay runakunataqa
kaynata nirqani:
“Pantaq sonqo runakunam
kankichik” nispa.
“Ñanniykunatapas mana reqsiqmi
kankichik” nispa.
11 Chayraykum piñakuyniypi jurarqani:
“Samanankupaq qosqaymanqa
manam yaykunqakuchu” nispa.