Tayta Diosmi kay pacha juzgaq
94
Vengakuq Dios Taytalláy
¡qamqa kanchariyá!
2 Kay pacha juzgaq Taytalláy
¡qamqa hatariyá!
¡Alto tukuqkunatapas
qamqa castigayá!
3 Dios Taytalláy
¿haykapikamataq mana allin runakuna
kusikunqaku?
4 ¿Haykapikamataq hatun tukuspa rimanqaku?
Mana allin ruraqkunam alabakuchkanku.
5 Dios Taytalláy,
runaykikunatam saruparunku.
Dios Taytalláy,
akllakusqaykikunatam ñakarichinku.
6 Viudakunatawan forasterokunatam wañuchinku.
Mana tayta-mamayoqkunatam wañuchinku.
7 Paykunam ninku:
Tayta Diosqa manam rikunchu,
nispa.
Jacobpa Diosninqa manam qawanchu,
nispa.
8 Asno runakuna,
qamkunayá entiendeychik.
Sonso runakuna,
¿haykapiñataq yuyayniyoq kankichik?
9 Rinri ruraq Diosqa
¿manachum uyarinqa?
Ñawi ruraq Diosqa
¿manachum rikuykunqa?
10 Nacionkuna corregiq Diosqa
¿manachum castiganqa?
Runakuna yachachiq Diosqa
¿manachum yachanqa?
11 Tayta Diosqa yachanmi
runapa piensasqankunataqa.
Tayta Diosqa yachanmi
paykuna waspiy hinalla kasqantaqa.
12 Dios Taytalláy
¡mayna kusisqam corregisqayki runaqa!
¡Mayna kusisqam yachachikuynikiwan
yachachisqayki runaqa!
13 Sasachakuy punchawkunapim
paytaqa hawkayachinki.
Mana allin ruraqpaq
sepulturata toqonankukamam hawkayachinki.
14 Tayta Diosqa manam
saqenqachu runankunata.
Tayta Diosqa manam
saqenqachu akllasqankunata.
15 Diospa munasqanman hinañam
arreglanqaku.
Allin ruraq llapa runakunam
chaynata ruranqaku.
16 ¿Pitaq favorniypi sayarinqa
dañawaqniykunapa contranpi?
¿Pitaq favorniypi rimarinqa
mana allinkunapa contranpi?
17 Sichu Tayta Dios
mana yanapawaptinqa
sepulturapa patanpiñam
kachkayman karqa.
18 Chakillaymi lluchkaykuchkanña,
nispa qapariptiymi,
Dios Taytalláy,
kuyapayariykuwaspayki hapiykullawanki.
19 Pensamientokunapa intusqan kaptiymi
qamqa consuelowaspayki kusichiwanki.
20 Mana allin gobiernaqkunawanqa
manam hukllawakuwaqchu.
Paykunaqa decretokunawanmi
runakunata ñakarichinku.
21 Allin ruraqta
wañuchinankupaqmi rimanakunku.
Inocente runata
wañuchinankupaqmi sentenciarunku.
22 Tayta Diosmi ichaqa
harkaykuwan.
Diosniymi ichaqa
hatun rumi hina amparaykuwan.
23 Tayta Diosmi paganqa
mana allin rurasqankumanta.
Paykunatam chinkarachinqa
daño rurasqankumanta.
Yupaychasqanchik Tayta Diosmi
chinkarachinqa paykunata.