Ebꞌnaj yuninal naj Esaú
36
Haꞌ ebꞌnaj tiꞌ, ebꞌnaj yuninal naj Esaú, naj chiyijpaxo Edom. 2 Wal naj Esaú yiqꞌ naj yixal xol ebꞌix ah Canaán. Haꞌ ton ebꞌix tiꞌ: ix Ada, iskutzꞌin yaꞌ Elón, naj hitita, yiqꞌnipaxo naj ix Aholibama iskutzꞌin naj Aná, naj iskꞌahol naj Zibeón, naj heveo. 3 Yiqꞌnipaxo naj ix Basemat, iskutzꞌin naj Ismael. Ix Basemat tuꞌ yanabꞌ naj Nebaiot ye ix. 4 Haꞌ xin iskꞌahol naj pitzkꞌa yebꞌ ix Ada, haꞌ ton naj Elifaz. Haxa iskꞌahol naj Esaú pitzkꞌa yebꞌ ix Basemat haꞌ ton naj Reuel. 5 Walpaxo yuninal naj Esaú pitzkꞌa yebꞌ ix Aholibama, haꞌ ton naj Jeús, naj Jaalam yebꞌ naj Coré. Haꞌ ebꞌnaj tiꞌ yuninal naj Esaú pitzkꞌana yet ay naj bꞌey txꞌotxꞌ Canaán.6 Lahwi tuꞌ yinito naj Esaú ebꞌix yixal yebꞌ ej iskꞌahol, yebꞌ ej iskutzꞌin yebꞌ sunil mak ay iskꞌatanh. Isto naj bꞌey huneꞌxa txꞌo txꞌotxꞌ yunhe ishitzilo naj yinh yuxhta Jacob. Yinipaxto naj sunil ej isnoqꞌ yebꞌ sunil tzet ay naj bꞌey Canaán. 7 Wal xin kaw ay tzet ay ebꞌnaj, yuxin matxa chu yehayo iskawanhil, yebꞌ xin kaw hantanhepaxo isnoqꞌ ebꞌnaj, yuxin matxa chabꞌe tzet chislo noꞌ. 8 Yu huneꞌ tuꞌ, yuxin to naj Esaú, naj chiyijpaxo Edom, bꞌey hunteqꞌan wonhan yul ismajul txꞌotxꞌ Seir.
9 Haꞌ ebꞌnaj tiꞌ, yuninal naj Esaú, ebꞌnaj mam ichame bꞌay titkano ebꞌnaj edomita, ebꞌnaj ehayo bꞌey hunteqꞌan wonhan yul ismajul txꞌotxꞌ Seir. 10 Hak tiꞌ isbꞌi ebꞌnaj yuninal naj Esaú hakaꞌ tiꞌ: Naj Elifaz, yunin ix Ada yebꞌ naj Esaú ye naj. Naj Reuel, yunin ix Basemat yebꞌ naj Esaú ye naj. 11 Haxa ebꞌnaj yuninal naj Elifaz haꞌ ebꞌnaj tiꞌ: naj Temán, naj Omar, naj Zefo, naj Gatam yebꞌ naj Cenaz. 12 Wal naj Elifaz yiqꞌpaxo naj huneꞌ iskabꞌ yixal chiyij Timna. Haꞌ xin huneꞌ yunin ix pitzkꞌa yebꞌ naj Elifaz tuꞌ Amalec yij isbꞌi. Haꞌ ebꞌnaj tuꞌ titna yinh ix Ada, huneꞌ ix yixal naj Esaú. 13 Haxa ebꞌnaj yuninal naj Reuel, haꞌ ton ebꞌnaj tiꞌ: naj Nahat, naj Zera, naj Sama yebꞌ naj Miza. Haꞌ ebꞌnaj tuꞌ titna yinh ix Basemat, huneꞌxa yixal naj Esaú. 14 Haxa ebꞌnaj yuninal naj Esaú yebꞌ huneꞌxa yixal chiyij Aholibama xin, hak tiꞌ isbꞌi ebꞌnaj: naj Jeús, naj Jaalam yebꞌ naj Coré. Wal ix Aholibama tuꞌ iskutzꞌin naj Aná ye ix, yebꞌ ismam icham ix ye naj Zibeón.
15 Haꞌ xin ebꞌnaj ok yahawo konhobꞌ titna yinh yuninal naj Esaú, haꞌ ton ebꞌnaj tiꞌ. Ebꞌnaj titna yinh yuninal naj Elifaz naj isbꞌabꞌel kꞌahol naj Esaú haꞌ ton naj Temán, naj Omar, naj Zefo, naj Cenaz, 16 naj Coré, naj Gatam, yebꞌ naj Amalec. Ebꞌnaj tuꞌ ok yahawilo yinh ebꞌnaj titna yinh yuninal naj Elifaz bꞌey txꞌotxꞌ Edom. Haꞌ ebꞌnaj tuꞌ titna yinh ix Ada, yixal naj Esaú. 17 Wal ebꞌnaj ok yahawilo yinh ebꞌnaj titna yinh naj Reuel iskꞌahol naj Esaú haꞌ ebꞌnaj tiꞌ: naj Nahat, naj Zera, naj Sama yebꞌ naj Miza. Haꞌ ebꞌnaj tuꞌ ok yahawilo yinh ebꞌnaj titna yinh yuninal naj Reuel bꞌey txꞌotxꞌ Edom, yinh ix Basemat titna ebꞌnaj, ix yixal naj Esaú. 18 Walpaxo ebꞌnaj ok yahawilo konhobꞌ titna yinh hunxa yixal naj Esaú, ix Aholibama, iskutzꞌin naj Aná, haꞌ ebꞌnaj tiꞌ: naj Jeús, naj Jaalam yebꞌ naj Coré. 19 Haꞌ sunil ebꞌnaj tuꞌ titna yinh naj Esaú, naj chiyijpaxo Edom, haꞌ ebꞌnaj ok yahawilo yinh hunun majan anma tuꞌ.
20 Ebꞌnaj iskꞌahol naj Seir naj horeo, naj ayayo sat txꞌotxꞌ bꞌay apni naj Esaú tuꞌ, haꞌ ton ebꞌnaj tiꞌ: naj Lotán, naj Sobal, naj Zibeón, naj Aná, 21 yebꞌ naj Disón, naj Ezer yebꞌ naj Disán. Haꞌ ebꞌnaj tuꞌ ok yahawilo yinh ebꞌnaj horeo, ebꞌnaj tit yinh yuninal naj Seir, bꞌey txꞌotxꞌ Edom. 22 Wal ebꞌnaj titna yinh yuninal naj Lotán, haꞌ ton naj Hori yebꞌ naj Hemam. Ix Timna, yanabꞌ naj Lotán ye ix. 23 Wal ebꞌnaj iskꞌahol naj Sobal, haꞌ ton ebꞌnaj tiꞌ: naj Alván, naj Manahat, naj Ebal, naj Sefo yebꞌ naj Onam. 24 Walpaxo ebꞌnaj iskꞌahol naj Zibeón haꞌ ton naj Aja yebꞌ naj Aná. Naj Aná tuꞌ haꞌ naj ilchanti huneꞌ ha haꞌ bꞌey txꞌotxꞌ desierto, yet lanhan istanhen naj isburro ismam Zibeón tuꞌ. 25 Wal naj Aná ay huneꞌ iskꞌahol naj chiyij Disón yebꞌ huneꞌ iskutzꞌin naj chiyij Aholibama. 26 Haxa ebꞌnaj iskꞌahol naj Disón, haꞌ ebꞌnaj tiꞌ: naj Hemdán, naj Esbán, naj Itrán yebꞌ naj Querán. 27 Wal ebꞌnaj iskꞌahol naj Ezer, haꞌ ebꞌnaj tiꞌ: naj Bilhán, naj Zaaván yebꞌ naj Acán. 28 Wal ebꞌnaj iskꞌahol naj Disán, haꞌ ton naj Uz, yebꞌ naj Arán.
29 Ebꞌnaj yahaw konhobꞌ xol ebꞌnaj horeo, haꞌ ton ebꞌnaj tiꞌ: naj Lotán, naj Sobal, naj Zibeón, naj Aná, 30 naj Disón, naj Ezer yebꞌ naj Disán. Haꞌ ebꞌnaj tuꞌ ok yahawo yinh hunun majan yikꞌal, xol ebꞌnaj horeo bꞌey txꞌotxꞌ Seir.
31 Wal ebꞌnaj ok reyal bꞌey txꞌotxꞌ Edom, yet yalanhto maxhto isreyal ebꞌnaj Israel, haꞌ ton ebꞌnaj tiꞌ: 32 naj Bela, naj iskꞌahol naj Beor. Haꞌ xin iskonhobꞌ naj Bela tuꞌ chiyij Dinaba. 33 Haxa yet iskam naj Bela yok naj Jobab reyalo selelo naj. Naj Jobab tuꞌ, iskꞌahol naj Zera ye naj, haxa xin iskonhobꞌ naj chiyij Bosra. 34 Haxa yet iskam naj Jobab yok naj Husam reyalo selelo naj. Haꞌ xin iskonhobꞌ naj Husam tuꞌ chiyij Temán. 35 Haxa yet iskam naj Husam yok naj Hadad reyalo isselelo naj. Naj Hadad tuꞌ, iskꞌahol naj Bedad ye naj, naj qꞌoji yinh naj Madián bꞌey txꞌotxꞌ Moab. Haꞌ xin iskonhobꞌ naj Hadad tuꞌ chiyij Avit. 36 Haxa yet iskam naj Hadad yok naj Samla reyalo selelo naj. Haꞌ xin iskonhobꞌ naj Samla tuꞌ chiyij Masreka. 37 Haxa yet iskam naj Samla, yok naj Saúl reyalo selelo naj, haꞌ xin iskonhobꞌ naj Saúl chiyij Rehobot, huneꞌ konhobꞌ ayayo istiꞌla ha haꞌ. 38 Haxa yet iskam naj Saúl yok naj Baal-hanán reyal selelo naj. Naj Baal-hanán tuꞌ iskꞌahol naj Acbor ye naj. 39 Haxa yet iskam naj Baal-hanán yok naj Hadad reyal isselelo naj. Haꞌ xin iskonhobꞌ naj Hadad tuꞌ chiyij Pau, wal yixal naj, Mehetabel isbꞌi ix, iskutzꞌin naj Matred ye ix, yuxin ismam icham ix ye naj Mezaab.
40 Hak tiꞌ isbꞌi hunun majan ej anma tit yinh naj Esaú, yebꞌ xin hakaꞌtikꞌa isbꞌi ebꞌnaj tuꞌ hak tuꞌ ok yinh hunun majan yikꞌal ebꞌnaj, haꞌ ton ebꞌnaj tiꞌ: Naj Timna, naj Alva, naj Jetet, 41 naj Aholibama, naj Ela, naj Pinón, 42 naj Cenaz, naj Temán, naj Mibzar, 43 yebꞌ naj Magdiel, yebꞌpaxo naj Iram. Haꞌ ton hunteqꞌan ebꞌnaj tuꞌ ok yahawilo yinh anma titna yinh naj Edom. Hakaꞌtikꞌa isbꞌi ebꞌnaj, hak tuꞌ ok yinh iskonhobꞌ ebꞌnaj. Wal naj Esaú, Edom hunxa isbꞌi naj.