Yet yanayo Komam Dios iskꞌulal yibꞌanh yaꞌ Jacob bꞌey Bet-el
35
Yet hunel xin yal Komam Dios tet yaꞌ Jacob hakaꞌ tiꞌ: «Jacob, elanh sat huneꞌ txꞌo txꞌotxꞌ tiꞌ, kat hato bꞌey txꞌotxꞌ Bet-el. Haꞌ tuꞌ xin chaxhehi, kat hawatxꞌen bꞌay chawaqꞌ haxahanbꞌal wetan, bꞌay inye hinbꞌahan tawet yet hawelkanh tet hawuxhta Esaú,» xhi Komam tet yaꞌ. 2 Lahwi tuꞌ yalni yaꞌ Jacob tet ebꞌix yixal, yebꞌ tet yuninal yebꞌ tet sunil mak tzujan yintaj:—Wal tinanh iwelo sunil ej tioxh ayko texol, kat heyaxhni kat hehelnilo xil heqꞌap. 3 Wal tinanh tonhwe bꞌey txꞌotxꞌ Bet-el, yuto haꞌ bꞌey tuꞌ chinwatxꞌehan hunu bꞌay chiwaqꞌan inxahanbꞌalan tet Komam Dios, Komam kolwa winhan yet ayinikojan yinh ej isyaꞌtajil. Komam aynhetikꞌakꞌo inkꞌatanhan bꞌajxanhetuꞌwal chintohan, xhi yaꞌ.
4 Hayet yabꞌen anma huneꞌ tuꞌ, yaqꞌni sunil ej istioxh tet yaꞌ Jacob. Yinipaxilti ebꞌix ix yome,a yaqꞌni ebꞌix tet yaꞌ. Ismujni yaꞌ hunteqꞌan tuꞌ yich huneꞌ teꞌ niman hih ayko iskawilal Siquem tuꞌ. 5 Wal ebꞌnaj ay yul hunteqꞌan konhobꞌ ayko iskawilal bꞌay ayayo yaꞌ Jacob, yako Komam Dios huneꞌ xiwkilal yinh ebꞌnaj, yuxin mach ok tzujno ebꞌnaj yaniko howal yinh ebꞌnaj iskꞌahol yaꞌ Jacob yet yel ebꞌnaj bꞌey tuꞌ.
6 Yapni yaꞌ Jacob yebꞌ sunil mak tzujan yinta tuꞌ bꞌey konhobꞌ Luz, chiyijpaxo Bet-el, yul ismajul txꞌotxꞌ Canaán. 7 Haꞌ bꞌey tuꞌ iswatxꞌe yaꞌ bꞌay yaqꞌ isxahanbꞌal tet Komam Dios. Yaniko yaꞌ El-Bet-elb isbꞌiho txꞌotxꞌ, yuto yet yelkanh yaꞌ tet yuxhtaj isyeni isbꞌa Komam tet yaꞌ bꞌey tuꞌ. 8 Haꞌ bꞌey tuꞌ xin kamna ixnam Débora, ixnam aqꞌni chꞌibꞌo ix kamom Rebeca. Ismujlax ixnam Débora tuꞌ yich huneꞌ teꞌ niman hih iskawilal Bet-el tuꞌ. Yaniko yaꞌ Jacob isbꞌi bꞌay mujlax ixnam Débora hakaꞌ tiꞌ: Teꞌ hih bꞌay yu oqꞌil.
9 Yet yehayo yaꞌ Jacob bꞌey Canaán, yet ispeto yaꞌ bꞌey txꞌotxꞌ Padan-aram, isyeni isbꞌa Komam Dios tet yaꞌ. Yet yanayo Komam iskꞌulal yibꞌanh yaꞌ,c
10 yalni Komam hakaꞌ tiꞌ:
«Hach tiꞌ Jacob habꞌi yajaꞌ, matxa hako tuꞌ chawija,
wal xin Israel chiꞌokkano habꞌihoj,» xhi Komam.
Lahwi ishelni Komam isbꞌi yaꞌ,
11 yalnipaxo Komam hakaꞌ tiꞌ:d «Hanintiꞌan huneꞌ Dios kaw aykano yip,
kaw txꞌiꞌalojabꞌ hawuninal yebꞌ xin yuninal hawuninal.
Tawinh chiꞌel huneꞌ niman konhobꞌ yebꞌ hunteqꞌanxa ej konhobꞌ,
kat xin yelto ebꞌnaj rey xol ej yuninal ebꞌnaj hawuninal.
12 Haꞌ xin txꞌo txꞌotxꞌ waqꞌan tet yaꞌ Abraham yebꞌ tet yaꞌ Isaac,
haꞌ txꞌotxꞌ chiwaqꞌan tawet yebꞌ tet hawuninal,» xhi Komam.
13 Hayet lahwi istzotel Komam yebꞌ yaꞌ Jacob tuꞌ, isto Komam. 14 Lahwi tuꞌ islinhbꞌankanh yaꞌ huneꞌ chꞌen chꞌen hakaꞌ hunu pilal bꞌay tzotel Komam tuꞌ tet yaꞌ. Isjobꞌnayo yaꞌ aceite yebꞌ vino yibꞌanh chꞌen. 15 Yuxin Bet-el yako yaꞌ isbꞌiho huneꞌ txꞌo txꞌotxꞌ tuꞌ.
Yet iskam ix Raquel
16 Lahwi tuꞌ yel yaꞌ Jacob yebꞌ sunil mak tzujan yinta tuꞌ bꞌey Bet-el, isto yaꞌ bꞌey txꞌotxꞌ Efrata, yajaꞌ aytom yiktajo legua yapni ebꞌnaj bꞌey Efrata tuꞌ iswatxꞌi iskꞌul ix Raquel, kaw xin yaꞌta yaqꞌle ix. 17 Hayet ayko ix yinh isyaꞌil tuꞌ, yalni ix iyawom hakaꞌ tiꞌ: «Mach chaxhxiwi yuto mapitzkꞌa hunxa hawinaj unin,» xhi ix. 18 Hayet lanhanxa iskam ix Raquel yu nichꞌan yunin tuꞌ yalnikano ix tato Benoni chiyijkano isbꞌi. Wal yaꞌ Jacob ishel yaꞌ isbꞌi nichꞌan iskꞌahol tuꞌ, yaniko yaꞌ Benjamín isbꞌihoj.
19 Hak tuꞌ yu iskam ix Raquel, ismujlax ix istiꞌ bꞌeh chito bꞌey txꞌotxꞌ Efrata, txꞌotxꞌ chiyij Belén tinanh. 20 Lahwi tuꞌ istenbꞌankanh yaꞌ chꞌen chꞌen yibꞌanh bꞌay muji ix Raquel, haꞌ xin huneꞌ yechel tuꞌ ixtanhto tinanh.
21 Wal yaꞌ Israel islah yaꞌ isbꞌel, yapni yaꞌ yintalto huneꞌ torre bꞌey txꞌotxꞌ Edar, yehayo yaꞌ bꞌey tuꞌ. 22 Yet ayxayo yaꞌ Israel sat huneꞌ txꞌotxꞌ tuꞌ, isto naj Rubén iskꞌatanh huneꞌxa ix yixal yaꞌ Jacob chiyij Bilha, ix ischejabꞌ ix Raquel. Isway naj yebꞌ ix. Wal yaꞌ Israel yabꞌelo yaꞌ huneꞌ tuꞌ.
Ebꞌnaj iskꞌahol yaꞌ Jacob
Ebꞌnaj iskꞌahol yaꞌ Jacob 12 (kabꞌlahonhwanh) ebꞌnaj. 23 Haꞌ xin ebꞌnaj iskꞌahol yaꞌ Jacob pitzkꞌana yebꞌ ix Lea haꞌ ton ebꞌnaj tiꞌ: Naj Rubén, haꞌ naj bꞌabꞌel kꞌahole, tzujan tuꞌ naj Simeón, naj Leví, naj Judá, naj Isacar yebꞌ naj Zabulón. 24 Walpaxo ebꞌnaj iskꞌahol yaꞌ pitzkꞌa yebꞌ ix Raquel, haꞌ ton naj José yebꞌ naj Benjamín. 25 Walpaxo ebꞌnaj iskꞌahol yaꞌ yebꞌ ix Bilha ischejabꞌ ix Raquel, haꞌ ton naj Dan yebꞌ naj Neftalí. 26 Haxapaxo ebꞌnaj iskꞌahol yaꞌ yebꞌ ix Zilpa, ix ischejabꞌ ix Lea, haꞌ ton naj Gad yebꞌ naj Aser.
Haꞌ ebꞌnaj tuꞌ iskꞌahol yaꞌ Jacob pitzkꞌana bꞌey txꞌotxꞌ Padan-aram.
Yet iskam yaꞌ Isaac
27 Wal yaꞌ Jacob, to yaꞌ yilaꞌ ismam, haꞌ ton yaꞌ Isaac bꞌey konhobꞌ Mamre, chiyijpaxo isbꞌi Arba yebꞌ Hebrón. Haꞌ bꞌey tuꞌ ekꞌlena yaꞌ Abraham, haꞌ tuꞌ xin aypaxayo yaꞌ Isaac. 28 Wal yaꞌ Isaac 180 habꞌil yaꞌ yet iskami. 29 Kaw ichamilxa kam yaꞌ. Kam yaꞌ hakaꞌ yu iskamto ebꞌnaj yichmam yaꞌ. Ismujlax yaꞌ yu ebꞌnaj iskꞌahol, haꞌ ton naj Esaú yebꞌ yaꞌ Jacob.