—Chiwochehan chaxhto haqꞌanaꞌ huneꞌ ix qꞌopo tiꞌ wixalojan, xhi naj.

5 Wal yaꞌ Jacob yabꞌe yaꞌ tato yilo naj Siquem ispixan iskutzꞌin tuꞌ, yajaꞌ xin machi yu yalni yaꞌ tet ebꞌnaj iskꞌahol yuto ayto ebꞌnaj tanhe noqꞌ. 6 Wal naj Hamor, to naj iskꞌatanh yaꞌ Jacob qꞌanwal yinh ix Dina.

7 Haxa yet ismeltzo ebꞌnaj isnoh ix Dina tanhe noqꞌ, yal-lax tet ebꞌnaj yinh tzet utelax ix Dina. Hayet yabꞌen ebꞌnaj huneꞌ tuꞌ, kaw ok bꞌiskꞌulal yinh iskꞌul ebꞌnaj, yebꞌ xin kaw ok ishowal ebꞌnaj yinh iskꞌul, yuto huneꞌ tuꞌ kaw txꞌojkano yul sat yuninal yaꞌ Jacob yet isway naj Siquem yebꞌ ix iskutzꞌin yaꞌ. ¡Ayxikꞌa mach yute naj Siquem huneꞌ tuꞌ! 8 Yajaꞌ xin tzotel naj Hamor tet ebꞌnaj isnoh ix Dina, yalni naj hakaꞌ tiꞌ:

—Naj Siquem, inkꞌaholtiꞌan, kaw ayko yanma naj yinh ix heyanabꞌ, yuxin manhulan qꞌanwal yinh ix, yu yok ix yixalo inkꞌaholan. 9 Kaw kꞌul ta chexok jet konhobꞌojanh, hak tuꞌ xin chu komohyihanh yebꞌ hekutzꞌin yebꞌ xin chu hemohyipaxo yebꞌ kokutzꞌinanh. 10 Kananhwekano koxolanh, ehanhwe sat kotxꞌotxꞌanh. Chu hetxonhwi yebꞌ chu heloqꞌwi koxolanh, chu heloqꞌnipaxo hetxꞌotxꞌ jetanh, xhi naj.

11 Yalnipaxo naj Siquem tet ismam ix Dina yebꞌ tet ebꞌnaj isnoh ix hakaꞌ tiꞌ:

—Kaw chinqꞌanan teyet, aqꞌwe ix wixalojan, wal xin chiwaqꞌan sunil tzet cheyoche. 12 Waxanhka kaw ekꞌbꞌalto niman tzet chiwaqꞌan yibꞌanh hakaꞌ tzet chaqꞌ anma, yebꞌpaxo xin kaw niman sabꞌehal chiwaqꞌan teyet. Yuxin kaw chinqꞌanan teyet, aqꞌwe ix wetan kat inmohyihan yebꞌ ix, xhi naj.

13 Yajaꞌ yu ipiko naj yinh ix yel istxꞌixobꞌal ix yu naj Siquem tuꞌ, yuxin yal ebꞌnaj iskꞌahol yaꞌ Jacob tet naj yebꞌ tet ismam naj, yaniko ebꞌnaj leqꞌtiꞌal. 14 Yalni ebꞌnaj hakaꞌ tiꞌ:

—Mach chu jaqꞌni Janabꞌanh tet hunu mak maxhto ayoko circuncisión yinh, yuto ta chijaqꞌanh ix hawixaloj kaw txꞌixobꞌal huneꞌ tuꞌ. 15 Wal xin chijaqꞌanh ix hawixaloj tato chischah hewiꞌ huneꞌ tiꞌ: Yilal heyaqꞌni circuncidar hebꞌa yebꞌ sunil ebꞌnaj winaj ay yul hekonhobꞌ. 16 Ta cheyije huneꞌ tuꞌ, chu hemohyi yebꞌ ej kokutzꞌinanh yebꞌ xin chu komohyihanh yebꞌ hekutzꞌin kat kokankanojanh texol, haxinwal hunxanhe konhobꞌal chonhelikoj. 17 Yajaꞌ tato mach cheyije huneꞌ circuncisión tiꞌ, chonhelanh sat hetxꞌotxꞌ tiꞌ, kat jinitojanh janabꞌ tiꞌanh, xhi ebꞌnaj.

18 Wal naj Hamor yebꞌ iskꞌahol Siquem ischah iswiꞌ ebꞌnaj yinh tzet yal ebꞌnaj iskꞌahol yaꞌ Jacob. 19 Lahwi tuꞌ isto ebꞌnaj, yajaꞌ xin mach yechma naj Siquem txꞌiꞌal tiempo to yaqꞌ circuncidar isbꞌa naj yuto kaw ayko yanma naj yinh iskutzꞌin yaꞌ Jacob. Naj Siquem tuꞌ, haꞌ naj kaw ekꞌbꞌal yelapno ye xol ebꞌnaj yuxhtaj. 20 Isto naj yebꞌ ismam bꞌey yul ispultahil konhobꞌ bꞌay chiskutxbꞌa isbꞌa anma txonhwoj, yalni ebꞌnaj tet ebꞌnaj winaj ay yul konhobꞌ tuꞌ hakaꞌ tiꞌ:

21 —Hunteqꞌan ebꞌnaj winaj tiꞌ kaw kꞌul isnabꞌal ebꞌnaj, chikankano ebꞌnaj eho koxol, yebꞌ xin chu istxonhwi ebꞌnaj yul kokonhobꞌ. Wal xin ay kotxꞌotxꞌ bꞌay chiꞌeh ebꞌnaj. Hak tuꞌ xin chu komohyi yebꞌ ej iskutzꞌin ebꞌnaj, kat ismohyi ebꞌnaj yebꞌ ej kokutzꞌin. 22 Wal xin chikankano ebꞌnaj koxol, kat yok ebꞌnaj jet konhobꞌoj, yaj tato chijaqꞌ circuncidar kobꞌa hakaꞌ ebꞌnaj. 23 Yebꞌ xin sunil tzet ay ebꞌnaj yebꞌ ej isnoqꞌ ebꞌnaj jet chupaxikoj. Chikankano ebꞌnaj koxol yajaꞌ ta chikoyije huneꞌ tuꞌ, xhi naj.

24 Wal xin sunil ebꞌnaj tzꞌajanxa yinh ishabꞌilal, isyije ebꞌnaj yinh tzet yal naj Hamor yebꞌ iskꞌahol Siquem tuꞌ. Hak tuꞌ xin yu yaqꞌlax circuncidar sunil ebꞌnaj. 25 Haxa yinh yet yox tzꞌayik, yet yaꞌto ay sunil ebꞌnaj yu circuncisión tuꞌ, isto naj Simeón yebꞌ naj Leví, ebꞌnaj iskꞌahol yaꞌ Jacob, isnoh ix Dina. Ispotxꞌni ebꞌnaj yu yespada sunil ebꞌnaj winaj ay yul konhobꞌ tuꞌ yuto mach yu iskolni isbꞌa ebꞌnaj. 26 Ispotxꞌnipaxo ebꞌnaj naj Hamor yebꞌ naj Siquem, naj iskꞌahol naj Hamor tuꞌ, yinilti ebꞌnaj ix Dina yul yatut naj Siquem, ispaxto ebꞌnaj. 27 Lahwi tuꞌ yapnipaxo hunteqꞌanxa ebꞌnaj iskꞌahol yaꞌ Jacob, yekꞌto ebꞌnaj yibꞌanh kamom tuꞌ. Yinito ebꞌnaj sunil tzet ay yul konhobꞌ tuꞌ, yuto ayko ishowal ebꞌnaj yinh iskꞌul yu el ispixan yanabꞌ ebꞌnaj. 28 Yito ebꞌnaj noꞌ meꞌ, yebꞌ ej noꞌ wakax yebꞌ ej noꞌ burro, yebꞌ sunil tzet ay yul konhobꞌ tuꞌ, yebꞌ tzet ay xolaj tzꞌunubꞌ. 29 Yelqꞌanpaxilti ebꞌnaj sunil tzet ay yulaj nha, yinipaxti ebꞌnaj sunil nixhte unin yebꞌ ebꞌix ix hakaꞌ presowom. 30 Hayet yilni yaꞌ Jacob huneꞌ tuꞌ, yalni yaꞌ tet naj Leví yebꞌ tet naj Simeón hakaꞌ tiꞌ:

—Yu huneꞌ maxeyute tiꞌ, kaw chiꞌok ishowal ebꞌnaj cananeo yebꞌ ebꞌnaj ferezeo winhan. Ebꞌnaj ayayo sat huneꞌ txꞌo txꞌotxꞌ tiꞌ, chiskutxbꞌako isbꞌa ebꞌnaj kat yanoko ebꞌnaj howal winhan, kat xin kinispotxꞌnojan ebꞌnaj yebꞌ wuninalan, yuto haywanhnhechꞌan ebꞌnaj winaj tzujan wintajan, xhi yaꞌ. 31 Istaqꞌwi ebꞌnaj kawanh tuꞌ:

—¿Tom xin tonhe chijilanh chetan naj janabꞌ tiꞌanh, hakaꞌ hunu ix ix txꞌoj ye iswiꞌ? xhi ebꞌnaj.