Yet yaqꞌni nimankꞌulal naj Esaú yinh yaꞌ Jacob
33
Hayet yilnito yaꞌ Jacob yul naj Esaú yebꞌ 400 ebꞌnaj winaj, yok yaꞌ ispohno xol nixhte unin. Yaniko yaꞌ yunin ix Lea tet, yanipaxiko yaꞌ yunin ix Raquel tet, lahwi tuꞌ yaniko yaꞌ yunin ebꞌix kawanh chejabꞌ tet. 2 Istxolbꞌan yaꞌ ebꞌix yebꞌ ej yunin tuꞌ hakaꞌ tiꞌ: Ebꞌix kawanh chejabꞌ yebꞌ yunin ok ebꞌix sataj. Tzujan isto ix Lea yebꞌ yunin, haxa yinh islahobꞌal xin ok tzujno ix Raquel yebꞌ yunin, haꞌ ton naj José. 3 Isbꞌabꞌi yaꞌ Jacob sata ebꞌix yebꞌ yunin tuꞌ. Kaw hujel xin ay kꞌonhno yaꞌ, yaypaxo xulno yaꞌ sat txꞌotxꞌ masanta apni yaꞌ iskawilal yuxhta tuꞌ. 4 Haxa yet yilnito naj Esaú yuxhta tuꞌ, isto naj yinh anhe ischahno yaꞌ. Yok laqꞌno naj yinh yaꞌ, istzꞌohni naj isqꞌotx yaꞌ, yok ebꞌnaj oqꞌo iskawanhil. 5 Hayet yilni naj Esaú ebꞌix ix tuꞌ yebꞌ yunin, isqꞌambꞌen naj tet yaꞌ Jacob:—¿Mak anmahil hunteqꞌan tiꞌ? xhi naj. Istaqꞌwi yaꞌ Jacob:
—Wuninalan xayaqꞌ Komam Dios, xhi yaꞌ.
6 Lahwi tuꞌ ishitziko ebꞌix kawanh chejabꞌ yebꞌ yunin iskꞌatanh naj Esaú. Yay xulno ebꞌix sata naj, yay xulno ebꞌix sat txꞌotxꞌ. 7 Ishitzpaxiko ix Lea yebꞌ yunin, yaypaxo xulno ix sata naj. Lahwi tuꞌ ishitzpaxiko naj José yebꞌ ix Raquel, yay xulno sata naj. 8 Isqꞌambꞌen naj Esaú:
—¿Mak ay yet sunil ej no noqꞌ manchahan yul bꞌeh? xhi naj. Istaqꞌwi yaꞌ Jacob hakaꞌ tiꞌ:
—Hunteqꞌan no noqꞌ tuꞌ chinsahan noꞌ tawet yunhe hatzala winhan, xhi yaꞌ.
9 Hayet yabꞌen naj Esaú yalni yaꞌ Jacob hakaꞌ tuꞌ, yalni naj:
—Machoj wuxhtaj, hanintiꞌan ay tzet ay hinan, wal xin mach chawaqꞌ noꞌ wetan, xhi naj.
10 Yajaꞌ yal yaꞌ Jacob tet naj hakaꞌ tiꞌ:
—Tato kaw yeli machi hahowal winhan, chah ej no noqꞌ chiwaqꞌan sabꞌehalo tawet tiꞌ. Hayet chaxhwilnitiꞌan hakojtam haꞌ Komam Dios chiwilan yuto kaw kꞌul chu kinhachahnihan. 11 Yuxin chinqꞌanan tawet tato chachah insabꞌehaltiꞌan. Wal xin kaw qꞌalom hinan yu Komam Dios, sunil hunteqꞌan chawil tiꞌ wetan, xhi yaꞌ.
Yu kaw yal yaꞌ Jacob tato chischah naj Esaú sabꞌehal tuꞌ, yuxin ischah naj tet yaꞌ. 12 Lahwi tuꞌ yalni naj Esaú:
—Wal tinanh xin tonhwej. Haninan chinbꞌabꞌihan tesataj, xhi naj Esaú.
13 Istaqꞌwi yaꞌ Jacob:
—Wuxhtaj, kaw hawohtaj tato mach chitecha bꞌel yu nixhte unin, yebꞌ xin aypaxo noꞌ nixhte meꞌ yebꞌ noꞌ nixhte wakax. Tato kaw chinlahikojan intohan yinh inbꞌeltiꞌan, yinhnhem huneꞌ tzꞌayik chikamilo noꞌ sunil yu sikilal. 14 Wal xin bꞌabꞌanhto insatajan, wal hinan nixhtejal intohan yinta ej no noqꞌ tiꞌ, yuto kaw nanhkꞌulal chibꞌelwi noꞌ. Nixhtejal intopaxojan yebꞌ nixhte unin, masanta chonhapnihanh takꞌatanh bꞌey txꞌotxꞌ Seir, xhi yaꞌ Jacob.
15 Istaqꞌwi naj Esaú:
—Kꞌultikꞌa, yajaꞌ chiwakanojan haywanho ebꞌnaj tzujan wintatiꞌan kolwal tawinh, xhi naj. Istaqꞌwi yaꞌ Jacob:
—Machoj, matzet chal hakꞌul, xhi yaꞌ.
16 Wal naj Esaú yinhtikꞌa huneꞌ tzꞌayik tuꞌ apni naj bꞌey txꞌotxꞌ Seir. 17 Walpaxo yaꞌ Jacob palan isto yaꞌ bꞌey txꞌotxꞌ Sucot. Iswatxꞌenkanh yaꞌ qꞌap mantiado yatuto bꞌey tuꞌ. Iswatxꞌenpaxokanh yaꞌ islexhpat no noqꞌ tuꞌ, yuxin Sucot ok isbꞌiho huneꞌ txꞌo txꞌotxꞌ tuꞌ.
18 Wal yaꞌ Jacob, kaw kꞌul yu yapni yaꞌ yul ismajul txꞌotxꞌ Canaán yet yel yaꞌ sat txꞌotxꞌ Padan-aram. Yehayo yaꞌ satakꞌti konhobꞌ Siquem ay yul ismajul Canaán. 19 Lahwi tuꞌ isloqꞌni yaꞌ huneꞌ istxꞌotxꞌ bꞌey tuꞌ yinh 100 (hokꞌal) plata melyu. Huneꞌ txꞌo txꞌotxꞌ tuꞌ isloqꞌ yaꞌ txꞌotxꞌ tet ebꞌnaj iskꞌahol naj Hamor, naj ismam naj Siquem. Haꞌ bꞌey tuꞌ xin iswatxꞌekanh yaꞌ qꞌap mantiado yatutoj. 20 Lahwi tuꞌ iswatxꞌenkanh yaꞌ bꞌay yaqꞌ isxahanbꞌal tet Komam Dios. Yaniko yaꞌ isbꞌi huneꞌ xahanbꞌal tuꞌ hakaꞌ tiꞌ, El-Elohe-Israel, chal yelapnoj, Komam Dios, haꞌ isDiosal yaꞌ Israel.