3 Lahwi tuꞌ yanito yaꞌ Jacob hunteqꞌan ebꞌnaj ischejabꞌ bꞌey txꞌotxꞌ Seir, yul ismajul txꞌotxꞌ Edom, yunhe yalni ebꞌnaj tet naj Esaú, naj yuxhta yaꞌ Jacob tuꞌ, tato chiꞌapni yaꞌ. 4 Yalni yaꞌ Jacob tet ebꞌnaj ischejabꞌ tuꞌ: «Halwe tet wuxhta Esaú tuꞌan hakaꞌ tiꞌ: “Mam Esaú, haꞌ yaꞌ hawuxhta Jacob, kaw hinan yaꞌ yanikto isbꞌa yalanh hachejbꞌanil. Chalnipaxo yaꞌ tawet hakaꞌ tiꞌ: ‘Hanintiꞌan iskꞌatanh icham Labán kinehan yinh huneꞌ tiempohal xaꞌekꞌto tiꞌ. 5 Wal tinanh xin kaw ayxa inwakaxan, ay inburrohan yebꞌ inmeꞌan, aypaxo ebꞌnaj inchejabꞌan yebꞌ ebꞌix inchejabꞌan. Tinanh xin chiwatojan inchejabꞌan tawet wuxhta Esaú. Haꞌ huneꞌ chiwochehan xin tato kꞌul chu kinhachahnihan,’ xhi hawuxhta tuꞌ,” kexchi,» xhi yaꞌ Jacob tet ebꞌnaj.

6 Haxa yet ismeltzo ebꞌnaj ischejabꞌ yaꞌ Jacob, yalni ebꞌnaj tet yaꞌ:

—Makonhbꞌeyanh jilaꞌanh naj hawuxhta Esaú tuꞌ. Tinanh xin ayko naj yinh bꞌel yuto chul naj kaxhischabꞌ, tzujan xin kanhebꞌ ciento ebꞌnaj winaj yinta naj, xhi ebꞌnaj.

7 Hayet yabꞌen yaꞌ Jacob yalni ebꞌnaj hakaꞌ tuꞌ, kaw xiwkanh yaꞌ, yokkano yinh iskꞌul yaꞌ. Yok yaꞌ ispohno xol anma tzujan yinta tuꞌ yebꞌ ej noꞌ meꞌ, noꞌ wakax yebꞌpaxo noꞌ camello, kabꞌ majan eliko sunil, 8 yuto istxum yaꞌ hakaꞌ tiꞌ: «Ta chihul naj Esaú tuꞌ yaqꞌaꞌko howal yinh huneꞌ majan, wal huneꞌxa majan xin chikolchahoj,» xhi yaꞌ. 9 Lahwi tuꞌ yok yaꞌ txahlo tet Komam Dios, yalni yaꞌ hakaꞌ tiꞌ: «Mamin, isDiosal yaꞌ Abraham, inmam ichaman, yebꞌ isDiosal inmaman yaꞌ Isaac, hach hawal wetan tato kaw yilal inmeltzohan bꞌey inkonhobꞌan iskꞌatanh ej wikꞌalan. Hawalnipaxoj tato kaw chawayo hakꞌulal wibꞌanhan. 10 Mamin, mach wetojan ay iskꞌulchꞌanil hakꞌul yuto matzet welapnojan. Hayet inqꞌaxponikꞌtojan haꞌ Jordán tiꞌ, machi hunu tzet iqꞌbꞌil wuhan, kachannhe inqꞌojochan. Wal tinanh xin kaw kabꞌ majanxa tzet ayinan. 11 Tinanh xin Mamin, kaw chinqꞌanan tawet, kolinan yul isqꞌabꞌ wuxhta Esaú tuꞌan. Chinxiwan kꞌuxantaxka yul naj howal kat ispotxꞌni naj ebꞌix ix yebꞌ nixhte unin tiꞌ. 12 Hach halnhekano wetan tato chawayo hakꞌulal wibꞌanhan. Hawalnipaxoj tato kaw niman anma chipohchakanto yinh ej wuninalan hakaꞌ isbꞌisil arena ay istiꞌ haꞌ mar, machi hunu mak chu isbꞌisni,» xhi yaꞌ yinh istxah.

13 Isway yaꞌ huneꞌ aqꞌbꞌal bꞌey tuꞌ. Issayni yaꞌ sabꞌehal chaqꞌ tet yuxhtaj xol sunil tzet aya. 14 Issaynilo yaꞌ noꞌ chiw, 20 (hunkꞌalkꞌonh) noꞌ winaj, yebꞌ 200 noꞌ ix, yebꞌ noꞌ meꞌ, 20 (hunkꞌalkꞌonh) noꞌ winaj, 200 noꞌ ix. 15 Issaynipaxo yaꞌ 30 (lahonhebꞌ iskawinaj) noꞌ miꞌe camello yebꞌ nixhte yunin, yebꞌ 40 (kawinaj) noꞌ ix wakax, yebꞌ 10 (lahonhkꞌonh) noꞌ winaj wakax ayko yinh kabꞌ oxebꞌ habꞌil, yebꞌ 10 (lahonhkꞌonh) noꞌ burro winaj yebꞌ 20 (hunkꞌalkꞌonh) noꞌ ix burro. 16 Lahwi tuꞌ yaniko yaꞌ hunun majan noꞌ yul isqꞌabꞌ ebꞌnaj chejabꞌ, yalni yaꞌ tet ebꞌnaj hakaꞌ tiꞌ:

—Bꞌabꞌanhwe haywanho hex yebꞌ xin nahat cheyute xolbꞌal hunun majan ej no noqꞌ tiꞌ, xhi yaꞌ.

17 Yalni yaꞌ tet naj bꞌabꞌi hakaꞌ tiꞌ:

—Hayet chaxhischahno wuxhta tuꞌan, ta xin chisqꞌambꞌe naj tawet, “¿Mak hawahaw? ¿Bꞌay chaxhtohi?” yebꞌ xin, “¿Mak ay yet hunteqꞌan no noqꞌ iqꞌbꞌil hawu tiꞌ?” Ta xhi naj. 18 Chawal tet naj hakaꞌ tiꞌ: “Mamin, hunteqꞌan ej no noqꞌ tiꞌ chaqꞌ yaꞌ Jacob hamatanoj. Wal yaꞌ Jacob tuꞌ, tzujan yaꞌ jintajanh,” kexchi, xhi yaꞌ.

19 Yalnipaxo yaꞌ Jacob tuꞌ tet naj iskabꞌ yebꞌ tet naj yox yebꞌ tet sunil ebꞌnaj iqꞌnhe hunun majan ej no noqꞌ tuꞌ hakaꞌ tiꞌ:

—Hayet chechahno naj Esaú tuꞌ, haktikꞌapax tuꞌ chu heyalno tet naj. 20 Cheyalnopaxo hakaꞌ tiꞌ: “Wal yaꞌ Jacob, tzujan yaꞌ jintajanh,” kexchi, xhi yaꞌ.

Hak tuꞌ yute yaꞌ Jacob yuto istxum yaꞌ hakaꞌ tiꞌ: «Haꞌ hunteqꞌan sabꞌehal chiwatojan tet wuxhta tuꞌan, haꞌ chiꞌaqꞌni tzalahokanh iskꞌul naj kat yel ishowal naj winhan, haxinwal kꞌul chu kinischahnojan naj yet chinapnihan iskꞌatanh naj,» xhi yaꞌ Jacob. 21 Hak tuꞌ yu isbꞌabꞌito ebꞌnaj chejabꞌ yebꞌ hunteqꞌan sabꞌehal tuꞌ, wal yaꞌ Jacob xin, kantokano yaꞌ huneꞌxa aqꞌbꞌal wayo bꞌey tuꞌ.

22 Yinhtikꞌa huneꞌ aqꞌbꞌal tuꞌ ahwano yaꞌ Jacob, yinito yaꞌ ebꞌix kawanh yixal yebꞌ ebꞌix kawanh chejabꞌ, yebꞌ ebꞌnaj 11 (hunlahonhwanh) iskꞌahol. Yanikanikꞌto yaꞌ ebꞌix yebꞌ yunin tuꞌ qꞌaxebꞌikꞌto haꞌ Jaboc, ekꞌto ebꞌix bꞌay kawil yehati yich haꞌ. 23 Yanipaxikꞌto yaꞌ sunil tzet iqꞌbꞌil yu. 24 Haxa yet iskankano yaꞌ Jacob ischukil, yapni huneꞌ naj yaqꞌleno howal yebꞌ yaꞌ masanta yet sajbꞌiloj. 25 Yajaꞌ hayet yilni huneꞌ naj tuꞌ ta mach chiqꞌoji naj yinh yaꞌ Jacob, ismaqꞌnilo naj iswiꞌ isbꞌul yaꞌ. Ishekꞌmo iswiꞌ isbꞌul yaꞌ Jacob tuꞌ yet yaqꞌlen yaꞌ howal yebꞌ huneꞌ naj tuꞌ. 26 Lahwi tuꞌ yalni naj tet yaꞌ Jacob:

—Bꞌejtzo hinan yuto lanhan issajbꞌiloj lah, xhi naj. Yalni yaꞌ Jacob tet naj:

—Tato mach chaqꞌankano iskꞌulal wibꞌanhan mach chaxhinbꞌejtzohan, xhi yaꞌ.

27 Isqꞌambꞌen huneꞌ naj tuꞌ:

—¿Tzet habꞌi? xhi naj. Istaqꞌwi yaꞌ Jacob:

—Jacob inbꞌihan, xhi yaꞌ.

28 Yalnipaxo naj tet yaꞌ Jacob:

—Wal tinanh matxa Jacob habꞌi. Wal xin Israel chawijkanoj, yuto maxawaqꞌle howal yebꞌ Komam Dios, yebꞌ ebꞌnaj winaj, hach xin makaxhqꞌoji, xhi naj.

29 Isqꞌambꞌenpaxo yaꞌ Jacob tet naj:

—Wal tinanh xin halkano tzet habꞌi wetan, xhi yaꞌ. Yajaꞌ taqꞌwi huneꞌ naj tuꞌ hakaꞌ tiꞌ:

—¿Tzet yinh yuxin chaqꞌambꞌe inbꞌihan? xhi naj.

Lahwi tuꞌ isqꞌannikano naj iskꞌulal Komam Dios yibꞌanh yaꞌ Jacob bꞌey tuꞌ.

30 Yaniko yaꞌ Jacob Penuel isbꞌiho huneꞌ txꞌo txꞌotxꞌ tuꞌ, yuto yal yaꞌ hakaꞌ tiꞌ: «Kaw mawilan sat Komam Dios, yajaꞌ xin itzitz intohan,» xhi yaꞌ.

31 Lahwi tuꞌ yel yaꞌ Jacob bꞌey tuꞌ, haxa yet lanhanxa iskankano txꞌotxꞌ Penuel yu yaꞌ, yahilo tzꞌayik. Kaw xin chikotxxi yaꞌ yuto hekꞌmo iswiꞌ isbꞌul yaꞌ. 32 Yu huneꞌ tuꞌ yuxin ebꞌnaj yikꞌal yaꞌ Israel mach chiskꞌux ebꞌnaj istxꞌanhal iswiꞌ isbꞌul ej no noqꞌ tinanh, yuto haꞌ iswiꞌ isbꞌul yaꞌ Jacob tuꞌ maqꞌlaxi.