4 Lahwi tuꞌ yanito yaꞌ Jacob yiqꞌomal ix Raquel yebꞌ ix Lea, yapni ebꞌix bꞌay chistanhe yaꞌ ismeꞌ. 5 Haxa yet yapni ebꞌix, yalni yaꞌ tet ebꞌix:

—Wal tinanh kaw xawilan tato matxa xahano chinyilan hemam hakaꞌ yet yalanhtokanoj. Yajaꞌ wal Komam Dios, isDiosal inmaman aynhetikꞌakꞌo inkꞌatanhan. 6 Hex kaw hex heyila tato kaw kꞌulnhetikꞌa yu inmunlahan yinta hemam, 7 walpaxo yaꞌ xin kaw chiꞌetli yaꞌ winhan, yuto kaw 10 (lahonhel) ishelobꞌtanhe yaꞌ intoholan. Wal Komam Dios machi hunelo kinisbꞌejikojan Komam yul isqꞌabꞌ isyaꞌtajil chiswatxꞌe yaꞌ winhan. 8 Wal xin hayet yalni yaꞌ hakaꞌ tiꞌ: “Sunil noꞌ tzꞌibꞌinhtanhe chipitzkꞌahi, haꞌ noꞌ chiwaqꞌan hatoholoj,” xhi yaꞌ. Hayet yalni yaꞌ hakaꞌ tuꞌ, sunil noꞌ nixhte pitzkꞌahi kaw tzꞌibꞌinhtanhe noꞌ. Hunelxa xin yalpaxo yaꞌ: “Sunil noꞌ hiribꞌtanhe, haꞌ noꞌ chiwaqꞌan hatoholoj,” xhi yaꞌ. Hayet yalnipaxo yaꞌ hakaꞌ tuꞌ, sunil noꞌ nixhte chipitzkꞌahi kaw hiribꞌtanhe noꞌ. 9 Hak tuꞌ yu yinilo Komam Dios ismeꞌ hemam tuꞌ, yaqꞌni Komam noꞌ wetan, xhi yaꞌ tet ebꞌix.

10 Yalnipaxo yaꞌ:

—Haxa yet hunel xin, yet ayko noꞌ meꞌ yinh istiempohal issajchi, wilnihan yinh inwayikan tato sunil ej noꞌ winaj meꞌ tzꞌibꞌinhtanhe yebꞌ ej noꞌ hiribꞌtanhe, yebꞌ noꞌ txꞌiꞌal yelawil aykoj, haꞌ noꞌ sajchi yebꞌ noꞌ ix. 11 Lahwi tuꞌ yalni yángel Komam Dios wetan hakaꞌ tiꞌ: “Jacob,” xhi naj. Walnihan xin: “Ay hinan lah,” kinchihan. 12 Yalni naj wetan: “Ilkꞌanabꞌi, sunil ej noꞌ winaj meꞌ tzꞌibꞌinhtanhe yebꞌ ej noꞌ hiribꞌtanhe, yebꞌ xin ej noꞌ tꞌuhkixhtanhe yelawil aykoj, haꞌ noꞌ chisajchi yebꞌ ej noꞌ ix, yuto chiwilan sunil tzet chaxhyute naj Labán. 13 Hanintiꞌan Dios hinan. Hanan inye hinbꞌahan tawet bꞌey txꞌotxꞌ Bet-el, bꞌay hajobꞌayo aceite yibꞌanh huneꞌ chꞌen chꞌen halinhbꞌankanokanh, yebꞌ bꞌay hataqꞌweko hunteqꞌan tzotiꞌ tawibꞌanh. Wal tinanh xin ahanhwanoj, elanh sat huneꞌ txꞌo txꞌotxꞌ tiꞌ kat hameltzo bꞌay pitzkꞌanaj hach,” xhi wetan, xhi yaꞌ Jacob tet ebꞌix.

14 Hayet yabꞌen ix Raquel yebꞌ ix Lea yinh tzet yal yaꞌ, yalni ebꞌix:

—Wal honhtiꞌanh matxa tzet ayonhanh iskꞌatanh komam tuꞌanh, yebꞌ xin ¿tom ayto komajulanh chaqꞌ yaꞌ? 15 Wal xin hakaꞌxa komon anma jehanh yul sat yaꞌ. Txonhbꞌil xin konhyutehanh yaꞌ tawet yet komohyihanh yebꞌ hach. Islohnipaxayto yaꞌ kotoholanh, xhi ebꞌix. 16 Yalnipaxo ebꞌix:

—Sunil isqꞌalomal komam tuꞌanh xayilo Komam Dios, tinanh xin jetxa ye yebꞌ juninal. Wal xin yije sunil tzet chal Komam Dios tawet, xhi ebꞌix tet yaꞌ.^a

17-18 Lahwi tuꞌ iskutxbꞌanayo yaꞌ Jacob sunil tzet aya yu ismeltzo yaꞌ bꞌey txꞌotxꞌ Canaán, bꞌay ay yaꞌ Isaac, ismam yaꞌ. Yanahto yaꞌ ebꞌix yixal yebꞌ ej yuninal yibꞌanh ej noꞌ camello. Yinipaxto yaꞌ sunil tzet aya yebꞌ sunil isnoqꞌ yiqꞌ istoholo ismunil bꞌey txꞌotxꞌ Padan-aram. 19 Wal icham Labán, ayto icham yiqꞌalo xil ismeꞌ, yuxin machi icham yet isbꞌey ix Raquel yelqꞌanoti istioxh icham ay yul yatut. 20 Wal yaꞌ Jacob ewanta el yaꞌ bꞌey tuꞌ, matzet yal yaꞌ tet icham Labán, icham arameo, tato chipaxto yaꞌ. Hak tuꞌ yu yaqꞌni subꞌchaho yaꞌ icham. 21 Yelkanh yaꞌ Jacob tuꞌ iskꞌatanh icham Labán, yinito yaꞌ sunil tzet aya. Kaw yinh anhe xin qꞌaxpokꞌto yaꞌ yibꞌanh haꞌ Éufrates. Isto yaꞌ bꞌey hunteqꞌan wonhan chiyij Galaad.

22 Oxebꞌxa tzꞌayik isto yaꞌ Jacob tuꞌ, yabꞌenilo icham Labán tato paxto yaꞌ. 23 Lahwi tuꞌ isto icham yebꞌ ebꞌnaj iskꞌahol istzujnoyo yaꞌ Jacob tuꞌ. Haxa yinh ishuj tzꞌayik xin, istzujcha yaꞌ yu icham bꞌey hunteqꞌan wonhan chiyij Galaad. 24 Haꞌtikꞌa yinh huneꞌ aqꞌbꞌal tuꞌ isye isbꞌa Komam Dios tet icham Labán, icham arameo, yul iswayik. Yalni Komam tet icham hakaꞌ tiꞌ: «Labán, kaw abꞌe tzet chiwalan, mach howo chawute hatzotel tet yaꞌ Jacob,» xhi Komam tet icham yul iswayik.

25 Wal yaꞌ Jacob bꞌey txꞌotxꞌ Galaad tuꞌ iswatxꞌekanh yaꞌ qꞌap mantiado yatutoj, yehayo yaꞌ bꞌey tuꞌ hayebꞌ tzꞌayikal, yuxin haꞌ bꞌey tuꞌ tzujcha yaꞌ yu icham Labán. Hayet yapni icham Labán bꞌey hunteqꞌan wonhan chiyij Galaad tuꞌ iswatxꞌenpaxokanh icham qꞌap mantiado yatutoj, yebꞌ ebꞌnaj tzujan yintaj. 26 Lahwi tuꞌ yalni icham tet yaꞌ Jacob:

—¿Tzet yinh xin maxawute huneꞌ tiꞌ? ¿Tzet yinh yuxin makaxhetli winhan, maxawiniti ebꞌix inkutzꞌintiꞌan hakaꞌ chu yilaxti hunu presowom? 27 ¿Tzet yinh xin yinh ewanta kaxhtita? Machi xin tzet hawal wetan. Wal xin estam hawal wetan tato chaxhtita, kaw yinh tzalahilalmi kintaqꞌlikanojan tawet. Wekꞌtzemihan hunu qꞌinh, okmi tinabꞌ yebꞌ teꞌ arpa. 28 Wal xin matxa intzꞌohan isqꞌotx ebꞌix inkutzꞌintiꞌan yebꞌ ej yunin ebꞌix. Huneꞌ maxawute tiꞌ, mach kꞌuloj. 29 Hex tiꞌ chu kexintanhtzenilojan, yajaꞌ yet may aqꞌbꞌal matzotel isDiosal hamam wetan hakaꞌ tiꞌ: “Labán, kaw abꞌe tzet chiwalan, mach howo chawute hatzotel tet yaꞌ Jacob,” xhi isDiosal hamam tuꞌ wetan, xhi icham. 30 Yalnipaxo icham:

—Wal xin kꞌultikꞌa tato chawoche chaxhto iskꞌatanh hamam tuꞌ, yajaꞌ ¿tzet yinh xin hawelqꞌati intioxhan? xhi icham.

31 Istaqꞌwi yaꞌ Jacob:

—Machi walan intitan tawet yuto kinxiwan, kꞌuxantaxka hawinikanilo ebꞌix hakutzꞌin tiꞌ wetan walnihan, xhi yaꞌ. 32 Yalnipaxo yaꞌ:

—Tato ay hunu mak koxol tiꞌanh iqꞌnhe hatioxh tuꞌ, ¡kamojabꞌi! Tinanh xin yinh sat sunil juninal tzujan jinta tiꞌ chasayiloj tato ay hunu hatzet ye tuꞌ witijan. Ta ay chiꞌilcha hawu, itoj, xhi yaꞌ.

Wal yaꞌ Jacob tuꞌ mach yohtajo yaꞌ tato ix Raquel elqꞌanti istioxh ismam tuꞌ.

33 Lahwi tuꞌ yokto icham Labán yul qꞌap qꞌap watxꞌebꞌilayo yatuto yaꞌ Jacob. Yokpaxto icham bꞌay ay ix Lea yebꞌ bꞌay ay ebꞌix kawanh chejabꞌ, machi xin ilcha istioxh icham yu. Lahwi tuꞌ yokpaxto icham bꞌay ay ix Raquel. 34 Wal ix Raquel yebꞌato ix hunteqꞌan tioxh tuꞌ yalanh isxhila noꞌ camello, yay tzꞌonhno ix yibꞌanh. Wal icham Labán tuꞌ kaw issay icham sunil bꞌay ay ix Raquel, yajaꞌ maxhtikꞌa ilcha yu icham. 35 Yalni ix tet ismam:

—Mam, machojabꞌ chitit hahowal yu mach chinah linhnojan yinh hasat, yuto lanhan wilnihan intxꞌahwobꞌalan, xhi ix. Wal icham Labán, kaw issay icham sunil bꞌay ay ix Raquel tuꞌ, yajaꞌ maxhtikꞌa ilcha hunteqꞌan tioxh tuꞌ yu icham. 36 Yet yilni yaꞌ Jacob huneꞌ tuꞌ kaw tit ishowal yaꞌ, yalni yaꞌ tet icham:

—¿Tzet istxꞌojal inwatxꞌehan tawinh? ¿Tzet inmulan tawet, yuxin kaw anhe makaxhhul kinhatzujuyojan? 37 Wal xin kaw maxapichꞌ sunil tzet ayinan. Tato ay hunu tzet ye tuꞌ hawet yehi maꞌilcha hawu, ayo yinh sat wuninaltiꞌan yebꞌ yinh sat hakꞌahol, haꞌojabꞌ ebꞌnaj xin chihalni mak ay ismul. 38 Kaw 20 (hunkꞌal) habꞌil kinmunlahan tawintaj, yulbꞌal hunteqꞌan habꞌil tuꞌ machi hunu yunin hameꞌ yebꞌ hachiw tonhe eli, yebꞌ machi hunu hameꞌ inkꞌuxtojan. 39 Mach hunelo tiꞌ witijan ej noꞌ ispotxꞌno noqꞌ tawet, wal xin intohlakojan noꞌ tawet. Yebꞌ xin tato ay noꞌ chiꞌelqꞌalaxto yet tzꞌayikal maka aqꞌbꞌalil, haqꞌan istohol noꞌ wetan. 40 Hayet chintanhenan hameꞌ tuꞌ, chiweta wanmahan xol qꞌaꞌ, haxa yet aqꞌbꞌalil xin etza chinkaman yu chew. Ay aqꞌbꞌalil tiꞌ mach kinwayan. 41 Hak tuꞌ yu wetan wanmahan 20 (hunkꞌal) habꞌil takꞌatanh. Kinmunlahan 14 (kanhlanhebꞌ) habꞌil yinh ebꞌix hakutzꞌin. Inmunlapaxojan wajebꞌ habꞌil yinh intanhenan ej hanoqꞌ. Kaw 10 (lahonhel) xin hahel intoholan. 42 Wal xin tato mach ayko isDiosal yaꞌ Abraham wetbꞌihojan, huneꞌ Dios bꞌay chiyiyo isbꞌa inmaman, yaꞌ Isaac, yinh kaw isyelal maxhtikꞌa nichꞌano tzet ayinan inpaxtijan yu hawekꞌnajil. Wal xin kaw yil Komam Dios inbꞌiskꞌulalan yebꞌ xin yet wetan wanmahan inmunlahan tawintaj, kaxhiskachnipaxo Komam Dios yet ewi tato mach howo chu hatzotel wetan, xhi yaꞌ.

43 Lahwi tuꞌ yalni icham Labán tet yaꞌ Jacob hakaꞌ tiꞌ:

—Sunil tzet ay bꞌey tiꞌ wetan yehi, ebꞌix tiꞌ, inkutzꞌinan ebꞌix, ebꞌnaj yunin ebꞌix tiꞌ, inkꞌaholpaxojan ebꞌnaj, yebꞌ xin sunil ej noꞌ meꞌ tiꞌ wetan noꞌ, yajaꞌ ¿tzet tzꞌaj wuteꞌan ebꞌix inkutzꞌintiꞌan yebꞌ ej yunin? 44 Wal tinanh xin kowatxꞌeꞌ huneꞌ kotrato bꞌey tiꞌ, haꞌ xin chiꞌok yechelo koxolbꞌal kokawanhil, xhi icham.

45 Lahwi tuꞌ islinhbꞌankanh yaꞌ Jacob huneꞌ chꞌen chꞌen ok yecheloj. 46 Yalni yaꞌ tet ebꞌnaj iskꞌahol yebꞌ tet ebꞌnaj iskꞌahol icham Labán:

—¡Kutxbꞌawe chꞌen chꞌen! xhi yaꞌ. Yok ebꞌnaj iskutxbꞌano chꞌen chꞌen tuꞌ, istenbꞌan ebꞌnaj chꞌen. Tzujan tuꞌ yok ebꞌnaj waꞌo iskawilal chꞌen. 47 Yaniko icham Labán isbꞌi huneꞌ txꞌotxꞌ tuꞌ yinh yabꞌxubꞌal hakaꞌ tiꞌ, Jegar Sahaduta. Walpaxo yaꞌ Jacob, Galaad yako yaꞌ isbꞌiho txꞌotxꞌ.

48 Lahwi tuꞌ yalni icham Labán:

—Haꞌ huntenan chꞌen chꞌen tiꞌ, haꞌ chꞌen chiꞌok testigohal koxol kokawanhil, xhi icham. Yuxin Galaad ok isbꞌiho huneꞌ txꞌo txꞌotxꞌ tuꞌ, 49 yebꞌpaxo xin Mizpa ok isbꞌiho txꞌotxꞌ, yuto yal icham Labán hakaꞌ tiꞌ:

—Haꞌojabꞌ Komam Dios chꞌok koxolbꞌal kokawanhil, yet matxa bꞌaqꞌinh chijil kosat hununonh. 50 Tato chaweta ebꞌix inkutzꞌintiꞌan, maka tato chasay haywanhoxa hawixal, walka machi hunu mak testigo koxol, yajaꞌ wal Komam Dios xin, haꞌ chiꞌok testigohal jinh, xhi icham.

51-52 Yalnipaxo icham:

—Wal xin, haꞌ huntenan chꞌen chꞌen tiꞌ yebꞌ huneꞌ chꞌen manlinhbꞌakanhan hakaꞌ pilal tiꞌ, haꞌ chꞌen maꞌok mohonal koxol yunhe mach chonhpalkꞌonikto yul komohon hununonh, hak tuꞌ xin mach chu kowatxꞌen hunu istxꞌojal jinh. 53 Haꞌojabꞌ isDiosal hamam icham, yaꞌ Abraham yebꞌ isDiosal inmam ichaman, yaꞌ Nacor, haꞌojabꞌ chiꞌilni tzet chonhelikoj, xhi icham. Istaqꞌwi yaꞌ Jacob:

—Hakojabꞌ tuꞌ, xhi yaꞌ. Yaqꞌni bꞌinaho yaꞌ isbꞌi Komam Dios, isDiosal yaꞌ Isaac bꞌay chiyiyo isbꞌa. 54 Lahwi tuꞌ ispotxꞌni yaꞌ Jacob no noqꞌ xahanbꞌalil iswiꞌ huneꞌ wonhan tuꞌ, yawten yaꞌ icham yebꞌ ej iskꞌahol waꞌo bꞌey tuꞌ, iswaꞌ ebꞌnaj. Iskankano ebꞌnaj huneꞌxa aqꞌbꞌal wayo bꞌey tuꞌ.

55 Haxa yet hunxa tzꞌayik xin, kaw sahabꞌ ahwano icham Labán, istzꞌohnikano icham isqꞌotx ebꞌnaj yunin ebꞌix iskutzꞌin, istzꞌohnipaxo icham isqꞌotx ebꞌix iskutzꞌin tuꞌ. Isqꞌannikano icham iskꞌulal yibꞌanh ebꞌix yebꞌ yunin. Ismeltzo icham yatut.