—Aqꞌ wuninan, ta matxin qꞌaꞌkꞌulmi inkaman, xhi ix.

2 Yajaꞌ kaw tit ishowal yaꞌ Jacob yinh ix, yalni yaꞌ tet ix:

—¿Tom Dios hinan chawila? Wal xin haꞌ Komam Dios mach chiꞌaqꞌni pitzkꞌahoti hawunin, xhi yaꞌ.

3 Yalni ix tet yaꞌ:

—Wal tinanh xin wayanh yebꞌ ix Bilha, ix inchejabꞌan, haxinwal ay hawuninal yebꞌ ix. Yet chipitzkꞌa yunin ix xin, hakojtam winhan chipitzkꞌahi. Haꞌ xin yunin ix tuꞌ wuninan chukoj, xhi ix.

4 Hak tuꞌ yu yaqꞌni ix Raquel ischejabꞌ tuꞌ yixalo yaꞌ Jacob. 5 Lahwi tuꞌ ispitzkꞌati nichꞌan unin yinh ix Bilha. Haxa yet yapni istiempohal xin, iswatxꞌi iskꞌul ix. 6 Yalni ix Raquel hakaꞌ tiꞌ: «Nichꞌan unin mapitzkꞌa tiꞌ Dan chiyij isbꞌi, yuto yabꞌe Komam Dios tzet inqꞌanan. Yilnipaxo Komam tzet wekojan yuxin mayaqꞌ Komam nichꞌan wunintiꞌan,» xhi ix.

7 Lahwi tuꞌ ispitzkꞌa huneꞌxa yunin ix Bilha yebꞌ yaꞌ Jacob. 8 Hayet ispitzkꞌa nichꞌan unin tuꞌ yalni ix Raquel hakaꞌ tiꞌ: «Nichꞌan unin tiꞌ Neftalí chiyij isbꞌi, yuto kaw ayko howal koxolanh yebꞌ ix innohtiꞌan, yajaꞌ xin haninan manqꞌojihan yinh ix,» xhi ix.

9 Haxa yet yilni ix Lea tato matxa yunin ix yebꞌ yaꞌ Jacob, yaqꞌnipaxo ix ischejabꞌ Zilpa yixalo naj. 10 Hayet ispitzkꞌa huneꞌ nichꞌan iswinaj unin ix Zilpa yebꞌ yaꞌ Jacob, 11 yalni ix Lea hakaꞌ tiꞌ: «Kaw kꞌul winhbꞌalan, yuxin Gad chiꞌok isbꞌiho nichꞌan unin tiꞌ,» xhi ix.

12 Tzujan tuꞌ ispitzkꞌa huneꞌxa yunin ix Zilpa yebꞌ yaꞌ Jacob. Hayet ispitzkꞌa nichꞌan unin tuꞌ, 13 yalni ix Lea hakaꞌ tiꞌ: «Kaw ay tzalahilal, wal tinanh chalaꞌ ebꞌix wet ixalan tato kaw tzalahilal wehan, yuxin Aser chiyij isbꞌi nichꞌan unin tiꞌ,» xhi ix.

14 Yet hunel xin, to naj Rubén xol munil yinh istiempohal yah ixim trigo, yilcha hunteqꞌan teꞌ lobꞌehal chiyij mandrágora yu naj. Yinito naj teꞌ tet ismiꞌ ix Lea. Haxa yet yilni ix Raquel teꞌ lobꞌehal tuꞌ, yalni ix tet ix Lea:

—Aqꞌ teꞌ lobꞌehal mayiti hawunin tuꞌ wetan, xhi ix.

15 Yajaꞌ taqꞌwi ix Lea tet ix:

—Maxawilo wichamilan, ¿tom xin chawipaxilo teꞌ mandrágora tiꞌ wetan hawalni? xhi ix. Istaqꞌwi ix Raquel tet ix:

—Wal xin tato chawaqꞌ teꞌ mandrágora tuꞌ wetan, chaxhwayo yebꞌ yaꞌ Jacob huneꞌ aqꞌbꞌal tiꞌ, xhi ix.

16 Haxa yinh qꞌejbꞌiyal xin yet yul yaꞌ Jacob yinh ismunil, yelti ix Lea ischahno yaꞌ, yalni ix tet yaꞌ:

—Yinh huneꞌ aqꞌbꞌal tiꞌ chaxhwayo inkꞌatanhan yuto mawaqꞌan teꞌ mandrágora tet ix Raquel, teꞌ mayiti wuninan. Mawaqꞌan teꞌ tet ix yunhe haway inkꞌatanhan, xhi ix.

Yinhtikꞌa huneꞌ aqꞌbꞌal tuꞌ xin way yaꞌ Jacob yebꞌ ix Lea. 17 Ispitzkꞌati huneꞌxa nichꞌan unin yinh ix, yuto yabꞌe Komam Dios istxah ix, ishoꞌxa huneꞌ nichꞌan tuꞌ. 18 Hayet ispitzkꞌa nichꞌan yunin ix tuꞌ, yalni ix: «Nichꞌan unin tiꞌ Isacar chiyij isbꞌi, yuto mayaqꞌ Komam Dios ispaj selel wetan yu waqꞌan ix inchejabꞌan yixalo wichamilan,» xhi ix.

19 Lahwi tuꞌ ispitzkꞌa naj iswaj yunin ix Lea yebꞌ yaꞌ Jacob. 20 Hayet ispitzkꞌa nichꞌan unin tuꞌ, yalni ix hakaꞌ tiꞌ: «Haꞌ Komam Dios maꞌaqꞌni huneꞌ matan tiꞌ wetan. Wal tinanh kaw ekꞌbꞌalto chitzalaho wichamilan winhan yuto wajwanhxa wuninan yebꞌ yaꞌ, yuxin Zabulón chiꞌok isbꞌiho nichꞌan wunintiꞌan,» xhi ix. 21 Haxa yet islahobꞌal xin, ixxa nichꞌan yunin ix Lea pitzkꞌahi, Dina yako ix isbꞌihoj.

22 Haxa yet yekꞌto tiempo xin isnahniti Komam Dios ix Raquel, yaqꞌni Komam yunin ix. 23 Hayet ispitzkꞌa isbꞌabꞌel yunin ix tuꞌ, yalni ix hakaꞌ tiꞌ: «Wal tinanh matxa chiꞌel intxꞌixobꞌalan yuto mayaqꞌ Komam Dios wuninan. 24 Hantam saqꞌal ta chaqꞌ Komam hunuxa wuninan,» xhi ix. Yuxin nichꞌan yunin ix Raquel tuꞌ, José yako ix isbꞌihoj.

25 Haxa yet tzujanilxa xin, yet ispitzkꞌa naj José, yunin ix Raquel, yalni yaꞌ Jacob tet icham Labán:

—Wal tinanh chinpaxtojan bꞌey inkonhobꞌan. 26 Chintohan yebꞌ wuninalan yebꞌ ebꞌix wixaltiꞌan, yuto yu ebꞌix yuxin kinmunlahan tawintaj. Wal xin chonhpaxtojanh. Hach tiꞌ kaw hawohtaj tzet yu inmunlahan tawintaj, xhi yaꞌ.

27 Istaqꞌwi icham Labán tet yaꞌ:

—Kaw chinqꞌanan tawet, kananhkano inkꞌatanhan yuto xaꞌintxumilojan tato hawu yuxin ayayo iskꞌulal Komam Dios wibꞌanhan. 28 Wal xin hal wetan hanta chawoche hawiqꞌaꞌ, chaxhintolahan, xhi icham.

29 Yalni yaꞌ Jacob hakaꞌ tiꞌ:

—Kaw hawohtaj tato kaw kꞌul yu inmunlahan tawintaj yebꞌ ta kaw kꞌul yu intanhenan hanoqꞌ. 30 Yet wulan kaw haykꞌonhixhto hanoqꞌ, wal tinanh xin kaw tzetkꞌaxa noꞌ. Hataxtikꞌa xin yet wulan yichiko Komam Dios yanayo isyaxil tawibꞌanh, ¿bꞌaqꞌinhkꞌanabꞌ xin chinichikojan inmunlahan yinh kaw wetan yebꞌ yinh yet wuninalan? xhi yaꞌ.

31 Yalnipaxo icham Labán tet yaꞌ:

—¿Hanta xin kaw chawoche chaxhintolahan? xhi icham. Istaqꞌwi yaꞌ:

—Mach chawaqꞌ intoholan, wal xin chintanhehan hameꞌ tuꞌ hunelxa yajaꞌ ta chischah hawiꞌ huneꞌ tiꞌ. 32 Wal tinanh chintohan bꞌay ay hameꞌ kat inpohnilojan sunil ej noꞌ nixhte qꞌejinh, yebꞌ noꞌ chiw tzꞌibꞌinhtanhe yebꞌ noꞌ hiribꞌtanhe. Haꞌ noꞌ chiꞌok intoholojan. 33 Haxa yet chaxhhul xin kat hawilni hantaxa inmeꞌan, hak tuꞌ xin chu hawohtanheniloj tato hanintiꞌan istoholalnhetikꞌa chinwatxꞌehan. Yajaꞌ tato ay noꞌ chiw mach hiribꞌtanhehoj yebꞌ mach tzꞌibꞌinhtanhe ayko xol noꞌ wetan yebꞌ xin tato ay noꞌ meꞌ mach qꞌejinhoj, chalilo chal tuꞌ tato elqꞌabꞌil noꞌ wuhan xol noꞌ hawet, xhi yaꞌ Jacob tuꞌ.

34 Istaqꞌwi icham Labán tet yaꞌ hakaꞌ tiꞌ:

—Kꞌultikꞌa hakaꞌ hawalni tiꞌ, xhi icham. 35 Wal icham Labán yinhtikꞌa huneꞌ tzꞌayik tuꞌ ok icham issikꞌalo noꞌ winaj chiw yebꞌ noꞌ ix chiw tzꞌibꞌinhtanhe yebꞌ hiribꞌtanhe, yebꞌ noꞌ qꞌejinh meꞌ xol noꞌ meꞌ tuꞌ. Yaqꞌni icham noꞌ istanheꞌ ebꞌnaj iskꞌahol. 36 Lahwi tuꞌ isto ebꞌnaj yebꞌ noꞌ bꞌey huneꞌ txꞌo txꞌotxꞌ kaw nahat, oxebꞌ tzꞌayik yuteto ebꞌnaj isbꞌel, ishitzilo ebꞌnaj yinh yaꞌ Jacob.

Walpaxo yaꞌ Jacob tuꞌ okpaxo yaꞌ istanheꞌ hunteqꞌanxa ismeꞌ icham Labán.

37 Lahwi tuꞌ yok yinh isnabꞌal yaꞌ Jacob istzokꞌnilo isqꞌabꞌ teꞌ álamo, yebꞌ teꞌ almendra yebꞌ xin teꞌ castaño. Tzꞌibꞌkiltanhe yutelo yaꞌ istzꞌumal teꞌ, yuxin haꞌ bꞌay el istzꞌumal teꞌ tuꞌ, saj elikoj. 38-39 Lahwi tuꞌ islinhbꞌankanh yaꞌ teꞌ sata bꞌay chukꞌ noꞌ meꞌ tuꞌ ha haꞌ, yuto hayet chiꞌapni noꞌ ukꞌu haꞌ tuꞌ kat issajchi noꞌ, hak tuꞌ xin sunil nixhte yunin noꞌ chipitzkꞌahi tzꞌibꞌinhtanhe, yebꞌ hiribꞌtanhe, yebꞌ tꞌuhkixhtanhe yeko yechel. 40 Wal yaꞌ Jacob tuꞌ chispohilo yaꞌ sunil noꞌ nixhte tzꞌibꞌinhtanhe yebꞌ noꞌ hiribꞌtanhe chipitzkꞌa yul ispeyabꞌ icham Labán, kat yanikto yaꞌ noꞌ yul ispeyabꞌ. Hak tuꞌ yu ispoh ismeꞌ yaꞌ Jacob tuꞌ. 41 Hayet chilnipaxo yaꞌ Jacob issajchi noꞌ kaw bꞌaqꞌich, kat islinhbꞌankanh yaꞌ hunteqꞌan te teꞌ iswatxꞌe tuꞌ sata bꞌay chukꞌ noꞌ haꞌ. Yuxin hayet chisajchi noꞌ chil noꞌ hunteqꞌan te teꞌ tuꞌ. 42 Yajaꞌ hayet chilni yaꞌ issajchi noꞌ bꞌajtanhe, mach chislinhbꞌakanh yaꞌ teꞌ yinh sat noꞌ, yuxin haꞌ noꞌ nixhte bꞌajtanhe chipitzkꞌa tuꞌ yet icham Labán ye noꞌ. Wal noꞌ kaw bꞌaqꞌich xin yet yaꞌ Jacob chuko noꞌ. 43 Hak tuꞌ yu yokkano yaꞌ Jacob qꞌalomal, kaw nimankano ismeꞌ yaꞌ, iscamello yaꞌ yebꞌ noꞌ burro. Kaw txꞌiꞌalpaxo ebꞌnaj ischejabꞌ yaꞌ yebꞌ ebꞌix ischejabꞌ yaꞌ.