2 Haxa yet yapni naj bꞌey huneꞌ cheqꞌanhlaj yilni huneꞌ kꞌuh. Iskawilal huneꞌ kꞌuh tuꞌ ay ox majan noꞌ meꞌ lanhan isxew yu ebꞌnaj chitanhen noꞌ, yuto haꞌ bꞌey tuꞌ chukꞌ noꞌ haꞌ. Huneꞌ kꞌuh tuꞌ ayko huneꞌ chꞌen niman chꞌen ismajiloj. 3 Hayet chiskutxbꞌaniko ebꞌnaj ismeꞌ bꞌey tuꞌ kat yinilo ebꞌnaj huneꞌ chꞌen chꞌen ayko ismajilo kꞌuh tuꞌ, kat yaqꞌni ebꞌnaj haꞌ yukꞌuꞌ noꞌ. Tzujan tuꞌ xin kat yanipaxkaniko ebꞌnaj chꞌen ismajiloj. 4 Isqꞌambꞌen naj Jacob tet ebꞌnaj:

—Hex amigo, ¿bꞌaytuꞌwal ay hex? xhi. Istaqꞌwi ebꞌnaj:

—Bꞌey Harán ayonhanh, xhi ebꞌnaj. 5 Isqꞌambꞌenpaxo naj:

—¿Heyohtami naj Labán iskꞌahol yaꞌ Nacor? xhi naj. Istaqꞌwi ebꞌnaj:

—Hoꞌ johtajanh yaꞌ, xhi ebꞌnaj.

6 Yalnipaxo naj:

—¿Kꞌulmi ye yaꞌ? xhi naj. Istaqꞌwi ebꞌnaj:

—Hoꞌ kꞌul ye yaꞌ, xhi ebꞌnaj. Lahwi tuꞌ yalni ebꞌnaj tet naj Jacob:

—Ilkꞌanabꞌtoj lah, lanhan yul ix Raquel iskutzꞌin yaꞌ Labán, yebꞌ ismeꞌ ismam, xhi ebꞌnaj.

7 Yalni naj Jacob tet ebꞌnaj:

—Kaw sahabꞌto lah ¿estam maxhto chemajche hemeꞌ tiꞌ? ¿Estam tonhe cheyaqꞌ ukꞌu haꞌ noꞌ kat hetanhen noꞌ hunepoxa? xhi naj.

8 Istaqꞌwi ebꞌnaj tet naj:

—Machoj, wal xin chijechmahanh yul hunmajanxa noꞌ meꞌ kat jinilojanh yebꞌ ebꞌnaj chitanhen noꞌ tuꞌ ismajil huneꞌ kꞌuh tiꞌ kat yukꞌni noꞌ haꞌ, xhi ebꞌnaj.

9 Hayet lanhan istzotel naj Jacob yebꞌ ebꞌnaj, yapni ix Raquel yebꞌ ismeꞌ ismam yuto haꞌ ix chitanhen noꞌ. 10 Lanhantotikꞌa yilni naj Jacob yapni ix Raquel yebꞌ ismeꞌ naj Labán, naj isnoh ismiꞌ naj, isto naj yinolo ismajil huneꞌ kꞌuh tuꞌ, yok naj yaqꞌno yaꞌ noꞌ meꞌ tuꞌ. 11 Lahwi tuꞌ isqꞌambꞌen naj hanikꞌ ye iskꞌul ix, istzꞌohni naj isqꞌotx ix, yichiko naj yoqꞌi. 12 Haxa yet yalni naj Jacob tato yunin ix Rebeca ye naj yebꞌ tato isnoh ismiꞌ naj ye naj Labán, ismam ix Raquel tuꞌ, isto ix yinh anhe yalno tet ismam.

13 Hayet yabꞌen naj Labán tzet yal ix Raquel yinh naj Jacob, yunin yanabꞌ naj, isto naj yinh anhe chawal yinh naj Jacob. Islaqꞌnayo naj naj, istzꞌohnipaxo naj isqꞌotx naj, yinito naj naj Jacob tuꞌ yatut. Lahwi tuꞌ yichiko naj Jacob yalni tet naj yinh sunil tzet yaqꞌle naj. 14 Yalni naj Labán tet naj:

—Yinh kaw yeli juxhta kobꞌa, xhi naj.

Hunxa ixahaw yehayo naj Jacob iskꞌatanh naj Labán. 15 Yalni naj Labán tet naj hakaꞌ tiꞌ:

—¿Tom yu juxhtato kobꞌa yuxin tonhe chaxhmunla wintajan? Wal xin hal wetan hanta hatohol chawiqꞌa, xhi naj.

16 Naj Labán tuꞌ ay kawanh iskutzꞌin naj, ix bꞌabꞌel Lea isbꞌi ix, wal ix iskabꞌ xin Raquel isbꞌi ix. 17 Ix Lea machi kaw yip isbꞌaqꞌ sat ix ismujli yajaꞌ kaw kꞌulchꞌan, walpaxo ix Raquel kaw kawla ix ix, machi hunu mak hakaꞌ iskꞌulchꞌanil ix. 18 Wal naj Jacob kaw okkano yanma naj yinh ix Raquel, yuxinto yal naj tet naj Labán hakaꞌ tiꞌ:

—Chinmunlahan hujebꞌo habꞌil tawintaj kat hawaqꞌni ix Raquel hakutzꞌin wixalojan, xhi naj.

19 Istaqꞌwi naj Labán tet naj:

—Kꞌultikꞌa, ayxam yok ix hawixaloj satata tet hunuxa nan winajil chiwatojan ix, wal xin kananhkano inkꞌatanhan, xhi naj.

20 Hak tuꞌ yu ismunla naj Jacob hujebꞌ habꞌil yinta naj Labán yu yiqꞌni naj ix Raquel, yajaꞌ kaw hanikꞌnhechꞌan tiempohal hujebꞌ habꞌil tuꞌ yul sat naj, yuto kaw ayko yanma naj yinh ix. 21 Lahwi yekꞌto hujebꞌ habꞌil tuꞌ yalni naj Jacob tet naj Labán:

—Wal tinanh maꞌapni istiempohal wiqꞌnihan ix Raquel yuto matzꞌajna hujebꞌ habꞌil inmunlahan yinh ix hakaꞌ yu walnihan tawet, xhi naj.

22 Lahwi tuꞌ yawten naj Labán sunil ej mak ayayo yatut iskawilal, yekꞌtzen naj huneꞌ mohyilal tuꞌ. 23 Yajaꞌ haxa yet aqꞌbꞌalil xin, haꞌ ix Lea yito naj Labán yixalo naj Jacob, isway naj Jacob tuꞌ yebꞌ ix. 24 Wal naj Labán issah naj huneꞌ ix chejabꞌ chiyij Zilpa tet ix Lea tuꞌ, yu yok ix ischejabꞌo ix. 25 Haxa yet issajbꞌilo yinh hunxa tzꞌayik, yilniti naj Jacob tato ix Lea way iskꞌatanh naj, yuxin ok naj yalaꞌ tet naj Labán hakaꞌ tiꞌ:

—¿Tzet yinh yuxin hak tuꞌ makinhawutehan? ¿Tom maxhtaj yinh ix Raquel kinmunlahan hujebꞌ habꞌil tawintaj? Wal xin ¿tzet yinh xin chaxhetli winhan? xhi naj.

26 Yalni naj Labán tet naj:

—Wal koxol tiꞌanh mach chu ismohyi ix tzujan unin tato maxhto chimohyi ix bꞌabꞌel. 27 Wal xin yije huneꞌ semana qꞌinh yet mohyilal tiꞌ yebꞌ ix Lea, lahwi tuꞌ kat hawiqꞌnipaxo ix Raquel, yaj yilal hamunla hujebꞌxa habꞌil wintajan, xhi naj Labán tuꞌ.

28 Hayet yabꞌen naj Jacob huneꞌ tuꞌ istaqꞌwenpaxiko naj hujebꞌxa habꞌil munil yibꞌanh yu yiqꞌnipaxo naj ix Raquel. Haxa yet yekꞌto issemanahil qꞌinh yet huneꞌ mohyilal tuꞌ, yaqꞌni naj Labán ix Raquel yixalo naj Jacob. 29 Issahnipaxo naj Labán huneꞌ ix chejabꞌ chiyij Bilha tet ix Raquel yu yokkano ix ischejabꞌo ix. 30 Hak tuꞌ yu yiqꞌnipaxo naj Jacob ix Raquel tuꞌ. Kaw xin ekꞌna chitzala naj yinh ix satapaxo yinh ix Lea, waxanhka kaw hujebꞌto habꞌil munla naj yinta naj Labán tuꞌ.

31 Hayet yilni Komam Dios tato mach xahano chiꞌil-lax ix Lea yu yaꞌ Jacob, yanayo Komam iskꞌulal yibꞌanh ix yuxin ay yunin ix, wal ix Raquel xin maxhtikꞌa yunin ix. 32 Ispitzkꞌati nichꞌan unin yinh ix Lea, haxa yet yapni istiempohal xin, iswatxꞌi iskꞌul ix. Haꞌ xin nichꞌan unin tuꞌ, Rubén yako ix isbꞌihoj. Yalni ix hakaꞌ tiꞌ: «Haꞌ Komam Dios maꞌilni inbꞌiskꞌulalan, wal tinanh kaw xahan chinyilaꞌan wichamilan,» xhi ix.

33 Haxa yet yekꞌto tiempo xin ispitzkꞌa hunxa yunin ix, Simeón yako ix isbꞌihoj. Yalni ix hakaꞌ tiꞌ: «Yil Komam Dios tato hinbꞌil hinan, yuxin mayaqꞌ Komam huneꞌxa wunintiꞌan,» xhi ix. 34 Lahwi tuꞌ ispitzkꞌapaxo huneꞌxa yunin ix, Leví yako ix isbꞌihoj, yalni ix hakaꞌ tiꞌ: «Wal tinanh kaw ekꞌbꞌal chinyochehan wichamilan yuto oxwanhxa wuninan,» xhi ix.

35 Lahwi tuꞌ ispitzkꞌa hunxa yunin ix, Judá yako ix isbꞌiho naj, yalni ix hakaꞌ tiꞌ: «Wal tinanh inbꞌitnhenxahan isbꞌi Komam Dios,» xhi ix. Lahwi tuꞌ isbꞌejni yuninwi ix.