28
Hayet yabꞌen icham Isaac huneꞌ tzet yal ixnam Rebeca tuꞌ, yawten icham, naj Jacob, isqꞌannikano icham iskꞌulal Komam yibꞌanh naj, yalnikano icham ischejbꞌanil naj hakaꞌ tiꞌ: «Mach chaxhmohyi yebꞌ ebꞌix ix ay bꞌey txꞌotxꞌ Canaán tiꞌ. 2 Wal xin, asiꞌ bꞌey Padan-aram bꞌey yatut hamam icham Betuel, kat hamohyi yebꞌ hunu ebꞌix iskutzꞌin naj Labán, naj isnoh hamiꞌ. 3 Haꞌojabꞌ Komam Dios, Komam kaw aykano yip, chiꞌanayo iskꞌulal tawibꞌanh. Haꞌojabꞌ Komam chꞌaqꞌni pohchaho hawuninal haxinwal tawinh chiꞌel txꞌiꞌal nimeta konhobꞌ. 4 Haꞌojabꞌ tawet yebꞌ tet hawuninal chaqꞌ Komam Dios tzet yalkano tet hamam icham Abraham, yet yalni Komam tato yahaw chuko yaꞌ yinh hunteqꞌan txꞌo txꞌotxꞌ bꞌay ayonh tiꞌ, yuto haꞌ Komam haltenkano txꞌotxꞌ tet hamam icham tuꞌ,» xhi yaꞌ.5 Hak tuꞌ yu ischejlaxto naj Jacob yu icham Isaac bꞌey txꞌotxꞌ Padan-aram. Lahwi tuꞌ isto naj Jacob, yapni naj bꞌey yatut naj Labán iskꞌahol icham Betuel, naj arameo. Naj Labán tuꞌ isnoh ixnam Rebeca ye naj, ixnam ismiꞌ naj Jacob yebꞌ naj Esaú.
Yet yiqꞌni naj Esaú hunxa yixal
6 Wal naj Esaú yil naj yet isqꞌannikano icham Isaac iskꞌulal yibꞌanh naj Jacob, yabꞌen naj yalni icham tato chito naj Jacob bꞌey Padan-aram issayaꞌ yixal bꞌey tuꞌ. Yabꞌenpaxo naj yalni icham tato mach chissay naj yixal xol ebꞌix ah Canaán yet isqꞌannikano icham iskꞌulal yibꞌanh naj Jacob. 7 Yilnipaxo naj Esaú tato isyije naj Jacob tzet yal ismam yebꞌ ismiꞌ yet isto naj bꞌey Padan-aram. 8 Hak tuꞌ yu yohtanhenilo naj Esaú tuꞌ tato mach chitzala iskꞌul yaꞌ Isaac yinh ebꞌix ah Canaán. 9 Wal naj Esaú, waxanhka ayxa kawanh yixal naj ah Canaán, yajaꞌ to naj iskꞌatanh naj Ismael, naj iskꞌahol yaꞌ Abraham, yiqꞌni naj huneꞌ iskutzꞌin naj, ix chiyij Mahalat, yanabꞌ naj Nebaiot.
Yet isyeni isbꞌa Komam Dios tet naj Jacob bꞌey Bet-el
10 Wal naj Jacob, el naj sat txꞌotxꞌ Beerseba, isto naj yinh isbꞌel bꞌey txꞌotxꞌ Harán. 11 Haxa yet ayko naj yinh isbꞌel tuꞌ yay numna yinh naj, iskankano naj wayo bꞌey tuꞌ. Issayniti naj huneꞌ chꞌen chꞌen, yay hilno naj yaniko naj chꞌen isqꞌanho iswiꞌ. 12 Haxa yet iswaykanh naj xin, iswayken naj hakaꞌ tiꞌ: Yil naj huneꞌ qꞌoch chiꞌichito yoj sat txꞌotxꞌ masanta chiꞌahapno istel satkanh. Ay xin ebꞌnaj yángel Komam Dios chiꞌaytij yebꞌ xin chiꞌahto yul huneꞌ qꞌoch tuꞌ. 13 Yilnipaxo naj tato linhanayo Komam Dios iskꞌatanh, yabꞌen naj yalni Komam hakaꞌ tiꞌ: «Hanintiꞌan Dios hinan, isDiosal hamam icham Abraham, yebꞌ xin isDiosal hamam Isaac. Tawet yebꞌ tet anma chitit tawinh chiwaqꞌan huneꞌ txꞌo txꞌotxꞌ bꞌay hilanhachayo tiꞌ. 14 Haꞌ xin anma chipoh tawinh tuꞌ kaw nimankano isbꞌisil, hakaꞌ isbꞌisil pojoj. Chipujnakanto bꞌey txꞌotxꞌ ayahto yinh norte, yebꞌ txꞌotxꞌ ayayto yinh sur, yebꞌ txꞌotxꞌ ayikꞌto yinh yetkꞌulal bꞌay chꞌahilo tzꞌayikꞌ, yebꞌ txꞌotxꞌ ayilto yinh yetkꞌulal bꞌay chito tzꞌayik. Sunil anma ay yul sat yibꞌanhqꞌinal tiꞌ chischah iskꞌulchꞌanil inkꞌulan hawu yebꞌ yu anma chipoh tawinh. 15 Wal xin bꞌajxanhetuꞌwal chaxhtohi, ayinikojan hawetbꞌihoj. Mach chaxhinbꞌejkanojan masanto chiyij isbꞌa sunil tzet chiwalkanojan tawet tiꞌ, kat kaxhwaqꞌni meltzohojan sat huneꞌ txꞌotxꞌ tiꞌ,» xhi Komam tet naj yul iswayik.
16 Haxa yet yel iswayanh naj Jacob, istxumni naj hakaꞌ tiꞌ: «Yinh kaw yeli ay Komam Dios bꞌey tiꞌ, machi xin wohtajojan,» xhi naj. 17 Wal naj Jacob tuꞌ kaw xiw naj, istxumnipaxo naj: «Huneꞌ txꞌotxꞌ bꞌay ay intiꞌan kaw txahulkano txꞌotxꞌ. Haꞌ bꞌey tiꞌ ay Yatut Komam Dios. Bꞌey tiꞌ ay ispultahil satkanh,» xhi naj.
18 Haxa yet issajbꞌilo yinh hunxa tzꞌayik, kaw sahabꞌ ahwano naj, islinhbꞌankanh naj huneꞌ chꞌen chꞌen yako isqꞌanho iswiꞌ tuꞌ. Isjobꞌnayo naj aceite yibꞌanh chꞌen yunhe yokkano chꞌen yechelo yinh tzet yu bꞌey tuꞌ. 19 Bꞌey huneꞌ txꞌo txꞌotxꞌ tuꞌ aytikꞌa huneꞌ konhobꞌ chiyij Luz, yajaꞌ xin ishel naj isbꞌi txꞌotxꞌ, yaniko naj Bet-el,a isbꞌiho txꞌotxꞌ.
20 Haꞌ bꞌey tuꞌ yal naj hakaꞌ tiꞌ: «Ta Komam Dios chiꞌok wetbꞌihojan kat kinistanhenan yinh huneꞌ inbꞌeltiꞌan kat yaqꞌnipaxo tzet chinlohan yebꞌ xil inqꞌapan, 21 yebꞌpaxo xin tato kꞌul chu inmeltzohan bꞌey yatut inmaman hunelxa, wal tuꞌ haꞌ Komam Dios chiꞌok inDiosalojan. 22 Haꞌ huneꞌ chꞌen chꞌen manlinhbꞌakanhan hakaꞌ pilal tiꞌ, haꞌ chꞌen chiꞌok yatuto Komam Dios, kat waqꞌnihan indiezmohan yinh sunil tzet chaqꞌ Komam wetan,» xhi naj.