Yet isqꞌanni yaꞌ Isaac iskꞌulal Komam Dios yibꞌanh naj Jacob yebꞌ naj Esaú
27
Wal yaꞌ Isaac kaw ichamxa, yebꞌ xin matxa chu yilni. Yet hunel xin yal yaꞌ tet naj Esaú, naj isbꞌabꞌel kꞌahol, hakaꞌ tiꞌ:—Kꞌahol, xhi yaꞌ. Istaqꞌwi naj:
—Kaw icham inxahan, kaw toxa chinkaman. 3 Tinanh xin ito halitꞌbꞌal kat hato halitꞌnokanh hunu no noqꞌ. 4 Lahwi tuꞌ kat hawatxꞌen noꞌ, kaw xuqꞌ chawute hakaꞌ chiwochehan. Chilahwi tuꞌ xin kat hawaqꞌni noꞌ inkꞌuxuꞌan, kat inqꞌannikanojan iskꞌulal Komam Dios tawibꞌanh yet yalanhto maxhto chinkaman, xhi yaꞌ.
5 Wal yaꞌ Rebeca xin tonhe yabꞌe yaꞌ tzet yal yaꞌ Isaac tuꞌ tet naj Esaú. Yuxin hayet lanhantotikꞌa isto naj uste noqꞌ tuꞌ, 6 yalni ixnam tet naj Jacob:
—Wunin, kaw mawabꞌehan yalni hamam tet hawuxhta Esaú hakaꞌ tiꞌ: 7 “As litꞌkanh hunu no noqꞌ, kat hawatxꞌen nichꞌano tzet chinlohan kaw xuqꞌ chu, kat inqꞌannikanojan iskꞌulal Komam Dios tawibꞌanh yalanhto maxhto chinkaman,” xhi yaꞌ tet hawuxhta tuꞌ, xhi ixnam. 8 Yalni ixnam:
—Yuxin, wal tinanh wunin, kaw abꞌe tzet chiwaltiꞌan. 9 Asiꞌ bꞌay ay noꞌ meꞌ kat hawiniti kakꞌonho noꞌ nixhte chiw kaw bꞌaqꞌich, kat inwatxꞌenan noꞌ tet hamam kaw xuqꞌ chu hakaꞌ choche yaꞌ. 10 Lahwi tuꞌ kat hawinito noꞌ iskꞌuxuꞌ yaꞌ, haxinwal chisqꞌankano yaꞌ iskꞌulal Komam Dios tawibꞌanh yalanhto maxhto chikam naj, xhi ixnam tet naj.
11 Istaqꞌwi naj tet ismiꞌ:
—Wal naj wuxhta tuꞌan kaw ay xil isnimanil naj, wal hinpaxojan xin, machoj. 12 Hayet chinistzabꞌnojan inmamtuꞌan chohtanheholo yaꞌ tato maxhtaj naj wuxhta tuꞌan, kat isnahnolo yaꞌ tato chinetlihan yinh yaꞌ, hak tuꞌ xin chinistzꞌaktiꞌnhekanojan yaꞌ. Maxhtaj iskꞌulal chisqꞌanaꞌ yaꞌ wibꞌanhan, xhi naj.
13 Yalnipaxo ismiꞌ naj tet hakaꞌ tiꞌ:
—Wunin, wal xin matzet chal hakꞌul, tato chaxhtzꞌaktiꞌnhekano hamam tuꞌ wibꞌanhan chiꞌaykanoj. Wal xin yije tzet chiwalan, as iti noꞌ, xhi ixnam. 14 Isto naj Jacob yinoti noꞌ chiw tuꞌ, lahwi tuꞌ yaqꞌni naj noꞌ tet ismiꞌ, yok ixnam iswatxꞌeno itah kaw xuqꞌ hakaꞌ choche icham. 15 Yinilti ixnam xil isqꞌap naj Esaú, naj isbꞌabꞌel yunin ixnam, qꞌap kaw kꞌul, yaniko ixnam yinh naj Jacob, yaꞌ iskabꞌ unin. 16 Lahwi tuꞌ yanipaxiko ixnam xil noꞌ chiw tuꞌ yinh isqꞌabꞌ naj yebꞌ yinh isnuqꞌ naj. 17 Yaqꞌni ixnam itah tuꞌ yebꞌ ixim pan tet naj Jacob, yinito naj tet ismam.
18 Yokto naj Jacob iskꞌatanh ismam, yalni naj hakaꞌ tiꞌ:
—Mam, xhi naj. Istaqꞌwi icham:
—Ay hinan lah, ¿mak hach kꞌahol? xhi icham.
19 Yalni naj Jacob:
—Esaú hinan, naj habꞌabꞌel kꞌahol, manwatxꞌehan tzet maxawala. Mam, ahanhtzꞌonhnoj, kꞌux nichꞌano ischibꞌehal no noqꞌ makinbꞌeyan inlitꞌaꞌan, kat haqꞌannikano iskꞌulal Komam Dios wibꞌanhan, xhi naj.
20 Isqꞌambꞌen yaꞌ Isaac tet naj:
—Kꞌahol ¿tzet mayu halitꞌninakanh noꞌ yinh anhe? xhi yaꞌ. Istaqꞌwi naj Jacob:
—Haꞌ Komam Dios haDiosal, haꞌ makolwa winhan inlitꞌnihan noꞌ, xhi naj.
21 Yalnipaxo yaꞌ Isaac:
—Hitzanhiko inkꞌatanhan kat kaxhintzabꞌnihan yunhe wohtanhenilojan tato yeli hach tiꞌ Esaú, xhi yaꞌ.
22 Ishitziko naj Jacob iskꞌatanh ismam, lahwi tuꞌ yalni yaꞌ: «Huneꞌ yul nuqꞌe chiwabꞌetiꞌan, yul isnuqꞌ naj Jacob, walpaxo huneꞌ qꞌabꞌe chintzabꞌtiꞌan isqꞌabꞌ naj Esaú,» xhi yaꞌ.
23 Wal yaꞌ Isaac, mach istxum yaꞌ tato haꞌ naj Jacob, yuto yet istzabꞌni yaꞌ isqꞌabꞌ naj kaw ay xil isqꞌabꞌ naj hakaꞌ naj Esaú. Haxa yet lanhanxa isqꞌanni yaꞌ iskꞌulal Komam Dios yibꞌanh naj, 24 yalnipaxo yaꞌ Isaac hakaꞌ tiꞌ:
—Kaw yelmi ¿hachmi tiꞌ Esaú inkꞌaholan? xhi yaꞌ. Istaqꞌwi naj Jacob:
—Hoꞌ, Esaú hinan, xhi naj.
25 Yalnipaxo yaꞌ tet naj Jacob:
—Ati tzet chinloh tuꞌan kꞌahol, chinkꞌuxninojan ischibꞌehal no noqꞌ makaxhbꞌey halitꞌaꞌkanh tuꞌ, kat inqꞌannikanojan iskꞌulal Komam Dios tawibꞌanh, xhi yaꞌ. Lahwi tuꞌ, yaqꞌni naj Jacob tzet chislo ismam, yaqꞌnipaxo yaꞌ vino yukꞌuꞌ ismam. 26 Yalni yaꞌ Isaac tuꞌ:
—Kꞌahol, hitzanhti inkꞌatanhan kat hatzꞌohni inqꞌotxan, xhi yaꞌ. 27 Hayet ishitziko naj Jacob istzꞌohno isqꞌotx yaꞌ Isaac, ismam tuꞌ, isxuqꞌxen yaꞌ xil isqꞌap naj. Hak tuꞌ yu isqꞌannikano yaꞌ iskꞌulal Komam Dios yibꞌanh naj Jacob, yalni yaꞌ xin:
«Yinh kaw yeli huneꞌ tiꞌ sam inkꞌaholan,
hakaꞌ isxuqꞌal sam xolaj telaj bꞌay kaw ayayo isyaxil Komam Dios.
28 Yaqꞌabꞌ Komam haꞌ nhabꞌ chitit yul satkanh tawet,
kat xin yaqꞌni txꞌo txꞌotxꞌ sat hatzꞌunubꞌ kaw kꞌul.
Kaw chawiqꞌ ixim trigo yebꞌ teꞌ uva.
29 Kaw niman anma chiꞌok hachejabꞌoj yebꞌ xin chꞌay jahno ej nimeta konhobꞌ tasataj.
Chaxhoko yahawo ebꞌnaj hawuxhtaj kat yay jahno ebꞌnaj tasataj.
Haꞌ mak chaxhtzꞌaktiꞌnheni, chiꞌay isyaꞌtajil yibꞌanh,
haꞌ mak chiqꞌanni iskꞌulal tawibꞌanh,
chiꞌay iskꞌulal yibꞌanh,» xhi yaꞌ.
30 Hayet lahwi isqꞌannikano yaꞌ Isaac iskꞌulal yibꞌanh naj Jacob, yelti naj iskꞌatanh ismam tuꞌ. Kaw xin lanhantotikꞌa yelti naj yet yapni naj Esaú uste noqꞌ. 31 Yok naj iswatxꞌeno itah kaw xuqꞌ, yinito naj tet ismam tuꞌ, yalni naj hakaꞌ tiꞌ:
—Mam, ahanhwanoj, kꞌux ischibꞌehal no noqꞌ makinbꞌeyan inlitꞌaꞌan, chilahwi tuꞌ xin kat haqꞌannikano iskꞌulal wibꞌanhan, xhi naj Esaú tuꞌ.
32 Isqꞌambꞌen yaꞌ Isaac:
—¿Mak anmahil hach? xhi yaꞌ. Istaqꞌwi naj:
—Esaú hinan, haninan habꞌabꞌel kꞌahol, xhi naj.
33 Hayet yabꞌen yaꞌ huneꞌ tuꞌ kaw kꞌayilo iskꞌul yaꞌ, yalni yaꞌ xin:
—¿Mak xin najil mabꞌeykꞌo uste noqꞌ, mayiniti tzet chinlohan yet hunepixto tiꞌ? Wal xin kaw makinwaꞌan yu naj, manqꞌannikanojan iskꞌulal yibꞌanh naj yet maxhto chaxhhuli, wal xin haꞌ yibꞌanh naj tuꞌ manqꞌankanojan iskꞌulal, xhi yaꞌ.
34 Hayet yabꞌen naj Esaú tzet yal ismam tuꞌ yok naj oqꞌo sikꞌlebꞌil. Yah yaw naj yinh kaw ip, yalni naj:
—Wal xin mahulnakꞌo hawuxhtaj mayaniko naj leqꞌtiꞌal wetan. Haꞌ xin yibꞌanh naj manqꞌankanojan iskꞌulal, hunteqꞌan iskꞌulal hawetxatikꞌa yehi, xhi yaꞌ.
36 Yalni naj Esaú:
—Toꞌan yuxin Jacob alaxiko isbꞌiho naj, wal xin iskayelxa tiꞌ kinyetanan naj. Yinh bꞌabꞌelal yilo naj huneꞌ wehobꞌalan yet bꞌabꞌel kꞌahole, haxa tinanh xin mayito naj hunteqꞌan iskꞌulal wettikꞌahan yehi, xhi naj. Yalnipaxo naj tet ismam:
—Mam ¿tom xin matxa chu haqꞌanni hunuxa iskꞌulal wibꞌanhan? xhi naj.
37 Istaqꞌwi yaꞌ Isaac tet naj Esaú:
—Wal xin mawalnahan tato chaxhokkanto yalanh yip naj hawuxhta tuꞌ. Mawalnipaxojan tato hach yebꞌ sunil hawuxhtaj chiꞌok ischejabꞌ naj. Mawalnipaxojan tato kaw chaqꞌ niman istrigo naj yebꞌ teꞌ uva. ¿Tzet xin tzꞌaj inqꞌanaꞌan tawibꞌanh kꞌahol? xhi yaꞌ.
38 Yalni naj Esaú:
—Mam ¿tom xin mach chu haqꞌanni hunuxa iskꞌulal wibꞌanhan? Wal xin kaw chinqꞌanan tawet, qꞌanpaxayo iskꞌulal Komam Dios wibꞌanhan tinanh, xhi naj. Yokpaxo naj oqꞌo yinh kaw ip.
39 Lahwi tuꞌ yalnikano yaꞌ Isaac hakaꞌ tiꞌ:
«Nahat chaxhelkano yinh ej txꞌo txꞌotxꞌ kaw kꞌul,
yebꞌ xin nahat chaxhelkano yinh bꞌay chaqꞌ haꞌ nhabꞌ.
40 Chakol habꞌa yu hawespada tet anma ayko ishowal tawinh,
kat xin hawokkano ischejabꞌo hawuxhtaj,
yajaꞌ haxa yet chawiqꞌnikanh hawip xin,
kat hakolni habꞌa tet naj,» xhi yaꞌ.a
Yet yelkanh naj Jacob tet naj Esaú
41 Hak tuꞌ yu yokkano ishowal naj Esaú yinh naj Jacob yu iskꞌulal qꞌanlaxkanayo yibꞌanh naj yu ismam. Istxumni naj Esaú hakaꞌ tiꞌ: «Kaw toxa chonhokanh yinh bꞌiskꞌulal yu iskamikal inmamtiꞌan, wal xin hatojabꞌ yet xakam yaꞌ, yet matxa kobꞌiskꞌulalanh yinh yaꞌ kat inpotxꞌnihan wuxhta Jacob tuꞌan,» xhi naj yul yet.
42 Haxa yet yabꞌenilo yaꞌ Rebeca tato choche naj Esaú ispotxꞌoꞌkamo yuxhta tuꞌ yawten ixnam naj Jacob, yalni ixnam tet naj:
—Wunin, naj Esaú hawuxhtaj, choche naj kaxhispotxꞌoꞌ kamoj yuto kaw ayko ishowal naj tawinh. 43 Wal tinanh wunin, abꞌe tzet chiwaltiꞌan, elanhkanh tet naj hawuxhta tiꞌ. Asiꞌ bꞌey txꞌotxꞌ Harán iskꞌatanh naj Labán innohan. 44 Wal haweh bꞌey tuꞌ hayebꞌo tiempo. Nixhtejal yelo ishowal naj yinh iskꞌul, 45 kat iskꞌayto yu naj yinh huneꞌ maxawatxꞌe tiꞌ, xhi ixnam. Yalnipaxo ixnam:
—Wal xin, wal haweh bꞌey tuꞌ, masanto yet chiꞌapni intzotiꞌan ta chaxhmeltzohi. Kaw mach isje inkꞌulan ta huneꞌnhe tzꞌayik chu hekam hekawanhil, xhi ixnam.
46 Yalni yaꞌ Rebeca tet yaꞌ Isaac:
—Kaw xatibꞌayo hunteqꞌan ebꞌix hitita yixal naj Esaú tiꞌ wuhan, tato chimohyipaxo naj Jacob yebꞌ hunu ebꞌix hitita ay bꞌey Canaán tiꞌ, majaltam inkaman, xhi ixnam.