Yet isto yaꞌ Isaac bꞌey konhobꞌ Gerar
26
Yinh huneꞌ tiempohal tuꞌ, hul huneꞌ niman wahil yul ismajul txꞌotxꞌ bꞌay ay yaꞌ Isaac, hakaꞌ huneꞌ wahil hul yet aytokꞌo yaꞌ Abraham. Yu huneꞌ wahil tuꞌ yuxin to yaꞌ Isaac bꞌey konhobꞌ Gerar, bꞌay ayko naj Abimelec isreyalo ebꞌnaj filisteo. 2 Haxa yet ay yaꞌ Isaac bꞌey tuꞌ isyeni isbꞌa Komam Dios tet yaꞌ, yalni Komam hakaꞌ tiꞌ: «Isaac, mach chaxhto bꞌey Egipto, wal xin kananhkano bꞌay chiwalan tawet, 3 wal haweh yul huneꞌ konhobꞌ tiꞌ. Haninan ayinikojan hawetbꞌihoj, chiwayojan inkꞌulalan tawibꞌanh, yuto tawet yebꞌ tet hawuninal chiwaqꞌan sunil hunteqꞌan txꞌo txꞌotxꞌ tiꞌ yunhe yijnikano isbꞌa tzet halbꞌilkano tet yaꞌ Abraham wuhan. 4 Haninan chiwaqꞌpohchahojan anma yinh hawuninal hakaꞌ isbꞌisil txꞌumel, hak tuꞌ isbꞌisil anma chipohcha yinh hawuninal tuꞌ, kat xin waqꞌnihan sunil hunteqꞌan txꞌo txꞌotxꞌ tiꞌ teyet. Haꞌ xin anma ay yul sunil ej konhobꞌ yul sat yibꞌanhqꞌinal tiꞌ chischah iskꞌulal yu yuninal hawuninal. 5 Chiwaqꞌan iskꞌulal inkꞌulan tawet, yebꞌ tet yuninal hawuninal, yuto kaw yijem yute isbꞌa yaꞌ Abraham iswatxꞌen tzet walan, yebꞌ yinh chejbꞌanile waqꞌan tet yaꞌ, isyijenpaxo yaꞌ inleyan yebꞌ xin kuybꞌanile waqꞌan tet yaꞌ,» xhi Komam.6 Wal yaꞌ Isaac kankano yaꞌ bꞌey konhobꞌ Gerar. 7 Ebꞌnaj ay yul huneꞌ konhobꞌ tuꞌ isqꞌambꞌe ebꞌnaj tzet ye yaꞌ yebꞌ ix Rebeca, yajaꞌ xin xiw yaꞌ yalni ta yixal yaꞌ ye ix. Wal ix Rebeca tuꞌ, kaw kꞌulchꞌan jilni ix, yuxin istxum yaꞌ Isaac tato chimpotxꞌlax yaꞌ ta chal yaꞌ tato yixal yaꞌ ye ix, yuxin yal yaꞌ ta yanabꞌ yaꞌ ye ix.
8 Kaw txꞌiꞌal tiempo ehayo yaꞌ Isaac bꞌey tuꞌ. Yet hunel xin tꞌanhxilto naj Abimelec yul huneꞌ wentanah, yilnito naj tato kaw chitzalako yaꞌ Isaac yinh ix Rebeca. 9 Hayet yilni naj Abimelec huneꞌ tuꞌ yanito naj yiqꞌomal yaꞌ Isaac, yalni naj tet yaꞌ hakaꞌ tiꞌ:
—Toꞌan hawixal ye huneꞌ ix tiꞌ. ¿Tzet yinh xin hawala tato hawanabꞌ ye ix? xhi naj. Istaqꞌwi yaꞌ Isaac:
—Walan tato wanabꞌan ye ix yuto kꞌuxantaxka chinhepotxꞌan yu ix, xhi yaꞌ. 10 Yajaꞌ xin yal naj Abimelec tet yaꞌ:
—¿Tzet yinh xin chawute huneꞌ tiꞌ? Kaw hanikꞌxanhe mach iqꞌlaxkanh hawixal tiꞌ yu hunu ebꞌnaj ay yul konhobꞌ tiꞌ, hakmi tuꞌ yu janiko komulanh, xhi naj. 11 Lahwi tuꞌ, yalni naj yabꞌeꞌ sunil anma ay yul konhobꞌ tuꞌ hakaꞌ tiꞌ:
—Tato ay hunu mak chiwatxꞌen hunu istxꞌojal yinh huneꞌ naj tiꞌ maka yinh yixal naj, chiꞌaqꞌlaxkamoj, xhi naj.
12 Yinh huneꞌ habꞌil tuꞌ yako yaꞌ Isaac istzꞌunubꞌ bꞌey huneꞌ txꞌotxꞌ bꞌay ay tuꞌ, kaw xin nimankano issat istzꞌunubꞌ yaꞌ yiqꞌa yuto kaw yayo Komam Dios isyaxil yibꞌanh yaꞌ. 13 Wal yaꞌ Isaac tuꞌ kaw okkano yaꞌ qꞌalomal, kaw xin ay tzet ay yaꞌ. 14 Kaw hantanhekano ismeꞌ yaꞌ, yebꞌ iswakax yaꞌ yebꞌpaxo xin kaw txꞌiꞌal ischejabꞌ yaꞌ, yuxin kaw ok ishowal ebꞌnaj filisteo yinh yaꞌ. 15 Ay xin hunteqꞌan kꞌuh watxꞌebꞌilkano yu ebꞌnaj ischejabꞌ yaꞌ Abraham, ismam yaꞌ Isaac tuꞌ yet itzitzto icham. Haxa yet tzujanilxa isnohtzen ebꞌnaj filisteo hunteqꞌan kꞌuh tuꞌ yu txꞌo txꞌotxꞌ, ismajchenkano ebꞌnaj. 16 Lahwi tuꞌ yalni naj Abimelec tet yaꞌ Isaac hakaꞌ tiꞌ:
—Wal tinanh, elanh yul kokonhobꞌ tiꞌanh yuto kaw qꞌalom hachxa kosatajanh, xhi naj. 17 Hak tuꞌ yu yel yaꞌ Isaac yul konhobꞌ tuꞌ, isto yaꞌ bꞌey huneꞌ akꞌal yul ismajul txꞌotxꞌ Gerar, iswatxꞌenkanh yaꞌ qꞌap mantiado yatutoj. 18 Haꞌ bꞌey tuꞌ xin aypaxo hunteqꞌan kꞌuh holbꞌilkano yu ismam yaꞌ, yaꞌ Abraham. Yajaꞌ yet xakam yaꞌ isnohtzen ebꞌnaj filisteo, haꞌ hunteqꞌan kꞌuh tuꞌ ok yaꞌ Isaac isholoꞌ, yaniko yaꞌ isbꞌi hakaꞌtikꞌa isbꞌi yu ismam. 19 Yet hunel xin ishol ebꞌnaj ischejabꞌ yaꞌ Isaac huneꞌ kꞌuh sat akꞌal tuꞌ, yilcha huneꞌ isnuqꞌ ha haꞌ yu ebꞌnaj. 20 Yajaꞌ ebꞌnaj ah Gerar chitanhen ismeꞌ sat huneꞌ akꞌal tuꞌ yaqꞌlekanh howal ebꞌnaj yebꞌ ebꞌnaj chitanhen ismeꞌ yaꞌ Isaac yinh huneꞌ kꞌuh tuꞌ, yuto yal ebꞌnaj ah Gerar tuꞌ tato yet ebꞌnaj huneꞌ kꞌuh tuꞌ. Yuxin Esek yako yaꞌ Isaac isbꞌiho huneꞌ kꞌuh tuꞌ, haꞌ chaliloj kajlebꞌahil, yuto ah howal yu ebꞌnaj yinh. 21 Lahwi tuꞌ isholnipaxo ebꞌnaj ischejabꞌ yaꞌ Isaac huneꞌxa kꞌuh, yahpaxo howal yu ebꞌnaj, yuxin Sitna yako yaꞌ isbꞌiho huneꞌ kꞌuh tuꞌ, haꞌ chal yelapnoj ayleko howal xol.
22 Lahwi tuꞌ isto yaꞌ Isaac bꞌey huneꞌ txꞌo txꞌotxꞌ kaw nahat, isholnipaxo yaꞌ huneꞌxa kꞌuh bꞌey tuꞌ, yajaꞌ xin matxa yaqꞌ howal ebꞌnaj yinh, yuxin Rehobot yako yaꞌ isbꞌiho huneꞌ kꞌuh tuꞌ, haꞌ chal yelapnoj Aqꞌankꞌulal yuto yal yaꞌ Isaac hakaꞌ tiꞌ: «Wal tinanh, mayaqꞌ Komam Dios hamanil jet sat huneꞌ txꞌo txꞌotxꞌ tiꞌ yunhe koqꞌalombꞌikanh sat txꞌo txꞌotxꞌ tiꞌ,» xhi yaꞌ.
23 Lahwi tuꞌ yelpaxo yaꞌ Isaac bꞌey tuꞌ, isto yaꞌ bꞌey txꞌotxꞌ Beerseba. 24 Haxa yet aqꞌbꞌalil xin isyeni isbꞌa Komam Dios tet yaꞌ, yalni Komam hakaꞌ tiꞌ:
«Haninan isDiosal hamam Abraham,
mach chaxhxiwi yuto ayinikojan hawetbꞌihoj.
Wal xin yu yaꞌ Abraham inchejabꞌan,
yuxin chiwayojan iskꞌulal tawibꞌanh,
kat xin waqꞌnipaxo pohchahojan hawuninal,» xhi Komam tet yaꞌ.
25 Lahwi tuꞌ islatzꞌbꞌankanh yaꞌ Isaac chꞌen chꞌen bꞌay chaqꞌ isxahanbꞌal tet Komam Dios. Iswatxꞌenkanh yaꞌ qꞌap mantiado yatutoj, yehayo yaꞌ bꞌey tuꞌ, yokpaxo ebꞌnaj ischejabꞌ yaꞌ isholno huneꞌ kꞌuh bꞌey tuꞌ.
Yet iswatxꞌen yaꞌ Isaac yebꞌ naj Abimelec huneꞌ istrato
26 Yet hunel xin el naj rey Abimelec sat txꞌotxꞌ Gerar isto naj tzotelo tet yaꞌ Isaac, tzujan xin kawanh yamigo naj yintaj, haꞌ ton naj Ahuzat, yebꞌ naj Ficol, naj iscapitán issoldado naj. 27 Hayet yapni ebꞌnaj, yalni yaꞌ Isaac tet ebꞌnaj hakaꞌ tiꞌ:
—Hex tiꞌ mach heyoche kinheyilaꞌan, kinhetzunbꞌenilojan sat hetxꞌotxꞌ, tinanh xin ¿tzet yinh xin chexhul kinheyilaꞌan? xhi yaꞌ.
28 Istaqꞌwikanh ebꞌnaj tet yaꞌ:
—Chijilanh tato kaw ayko Komam Dios hawetbꞌihoj, yuxin chijochehanh jalaꞌanh tawet ta chikowatxꞌe hunu kotrato. 29 Huneꞌ trato tuꞌ haꞌ ton huneꞌ tiꞌ: Machojabꞌ hunu istxꞌojal chawatxꞌe jinhanh yuto hanhonhtiꞌanh machi hunu istxꞌojal kowatxꞌehanh tawinh. Wal xin kaw kꞌul jute kokꞌulanh tawinh yebꞌ xin aqꞌankꞌulal yu kaxhjinilojanh sat kotxꞌotxꞌanh. Wal tinanh xin kaw ayayo iskꞌulal Komam Dios tawibꞌanh, xhi ebꞌnaj.
30 Lahwi tuꞌ yekꞌtzen yaꞌ Isaac huneꞌ qꞌinh, iswaꞌ ebꞌnaj apni ilno yaꞌ tuꞌ. 31 Haxa yet hunxa tzꞌayik kaw sahabꞌ ahwano ebꞌnaj, istaqꞌwenkano yaꞌ Isaac yebꞌ naj Abimelec huneꞌ trato tuꞌ yinh, istaqꞌlikano ebꞌnaj tet hunun, yokkano ebꞌnaj amigohal.
32 Yinhtikꞌa huneꞌ tzꞌayik tuꞌ apni ebꞌnaj ischejabꞌ yaꞌ Isaac yalaꞌ tato ilcha ha haꞌ yu ebꞌnaj yet isholni ebꞌnaj huneꞌ kꞌuh. 33 Yaniko yaꞌ Isaac isbꞌi huneꞌ kꞌuh tuꞌ hakaꞌ tiꞌ, Seba. Yu huneꞌ tuꞌ yuxin Beerseba isbꞌi huneꞌ konhobꞌ tuꞌ tinanh.