Ebꞌnaj yuninal yaꞌ Abraham yebꞌ huneꞌxa yixal chiyij Cetura
25
Wal yaꞌ Abraham xin, yiqꞌpaxo yaꞌ huneꞌxa yixal chiyij isbꞌi Cetura. 2 Haꞌ xin ebꞌnaj iskꞌahol yaꞌ yebꞌ ix, haꞌ ton ebꞌnaj tiꞌ: naj Zimram, naj Jocsán, naj Medán, naj Madián, naj Isbac yebꞌ naj Súa. 3 Naj Jocsán, haꞌ naj ismam naj Seba yebꞌ naj Dedán. Haꞌ xin anma pohchakanh yinh naj Dedán, haꞌ ton ebꞌnaj tiꞌ: ebꞌnaj asureo, ebꞌnaj letuseo yebꞌ ebꞌnaj leumeo. 4 Haxa ebꞌnaj iskꞌahol naj Madián, haꞌ ton ebꞌnaj tiꞌ: naj Efa, naj Efer, naj Hanoc, naj Abida yebꞌ naj Elda. Sunil hunteqꞌan ebꞌnaj tiꞌ yinh ix Cetura titnaj ebꞌnaj.5 Wal yaꞌ Abraham, haꞌ tet yaꞌ Isaac yakano yaꞌ sunil tzet aya. 6 Walpaxo tet hunteqꞌanxa ebꞌnaj iskꞌahol yaꞌ, yuninal kawanhxa yixal yaꞌ, sabꞌehalnhe yaqꞌ yaꞌ tet ebꞌnaj. Yet itzitzto yaꞌ Abraham tuꞌ ispohnilo yaꞌ ebꞌnaj yinh yaꞌ Isaac, yaꞌ iskꞌahol yaꞌ. Ischejnito yaꞌ ebꞌnaj yul ismajul huneꞌ txꞌo txꞌotxꞌ kaw nahat, ayko yinh yetkꞌulal bꞌay chiꞌahilo tzꞌayik.
Iskamikal yaꞌ Abraham yebꞌ yet ismujlax yaꞌ
7-8 Wal yaꞌ Abraham kaw ichamxa yaꞌ, kaw 175 ishabꞌilal yaꞌ yinh sunil. Lahwi tuꞌ xin iskam yaꞌ. Ismujlax yaꞌ bꞌay mujan yaꞌ Sara. 9 Ismujlax isnimanil yaꞌ yul huneꞌ chꞌen nhachꞌen bꞌey Macpela yu yaꞌ Isaac yebꞌ naj Ismael, ebꞌnaj iskꞌahol yaꞌ. Haꞌ huneꞌ chꞌen nhachꞌen tuꞌ ayayo chꞌen yetkꞌulal bꞌay chiꞌahilo tzꞌayik, yinh txꞌotxꞌ Mamre, sat istxꞌotxꞌ naj Efrón, naj iskꞌahol naj Zohar, naj hitita. 10 Haꞌ huneꞌ txꞌo txꞌotxꞌ tuꞌ, haꞌ ton txꞌotxꞌ isloqꞌ yaꞌ Abraham yet yalanhtokano tet ebꞌnaj hitita. Haꞌ bꞌey tuꞌ alaxikto isnimanil yaꞌ Sara yixal yaꞌ, haꞌ bꞌey tuꞌ xin alaxpaxikto isnimanil yaꞌ.a 11 Yet iskam yaꞌ Abraham kaw yakanayo Komam Dios iskꞌulal yibꞌanh yaꞌ Isaac. Yehayo yaꞌ bꞌey huneꞌ kꞌuh chihal-lax Huneꞌ mak itzitz chinilnihan.b
Ebꞌnaj yuninal naj Ismael
12 Haꞌ ebꞌnaj tiꞌ iskꞌahol naj Ismael, naj iskꞌahol yaꞌ Abraham yebꞌ ix Agar, ix ah Egipto ischejabꞌ yaꞌ kamom Sara. 13 Hak tiꞌ ye istxolal yet ispitzkꞌa ebꞌnaj hakaꞌ tiꞌ: naj Nebaiot, haꞌ naj bꞌabꞌel winaj, tzujan tuꞌ xin ispitzkꞌa naj Cedar, naj Adbeel, naj Mibsam, 14 naj Misma, naj Duma, naj Massa, 15 naj Hadar, naj Tema, naj Jetur, naj Nafis yebꞌ naj Cedema. 16 Hak tuꞌ isbꞌi ebꞌnaj 12 (kabꞌlahonhwanh) iskꞌahol naj Ismael. Haꞌtikꞌa hunteqꞌan isbꞌi ebꞌnaj tuꞌ haꞌ ayko yinh istxꞌotxꞌ yebꞌ iskonhobꞌ hunun majan ebꞌnaj. Haꞌ xin hunun ebꞌnaj tuꞌ ok yahawilo yinh hunun majan anma.
17 Wal naj Ismael kam naj yet 137 habꞌil naj. 18 Sunil ebꞌnaj yuninal naj Ismael tuꞌ ehayo ebꞌnaj yul ismajul txꞌotxꞌ ayayo xolbꞌal txꞌotxꞌ Havila yebꞌ txꞌotxꞌ Shur, satakꞌti txꞌotxꞌ Egipto, bꞌay chito isbꞌelal txꞌotxꞌ Asiria. Haꞌ tuꞌ ehayo ebꞌnaj, walka kaw kaj il-lax ebꞌnaj yu hunteqꞌanxa yuxhtaj.
Yet ispitzkꞌa naj Jacob yebꞌ naj Esaú
19 Hak tiꞌ ye istzotiꞌal yaꞌ Isaac, yaꞌ iskꞌahol yaꞌ Abraham. 20 Yet ismohyi yaꞌ Isaac yebꞌ ix Rebeca kaw 40 (kawinaj) habꞌil yaꞌ. Wal ix Rebeca tuꞌ iskutzꞌin naj Betuel ye ix, naj arameo, yebꞌ xin yanabꞌ naj Labán yepaxo ix, ebꞌnaj ay bꞌey txꞌotxꞌ Padan-aram. 21 Wal ix Rebeca tuꞌ machi yunin ix, yuxin txahli yaꞌ Isaac tet Komam Dios yinh ix. Kaw xin yabꞌe Komam istxah yaꞌ, hak tuꞌ yu ispitzkꞌa yunin ix. 22 Haxa yet ayxa tzet ye ix Rebeca tuꞌ chabꞌen ix yaqꞌlen howal kawanh nixhte unin maxhto chipitzkꞌa tuꞌ, yuxin istxum ix hakaꞌ tiꞌ: «¿Tzet yinh xin hak tuꞌ chute isbꞌa? Ayxikꞌa machi kinhulnahan yul sat yibꞌanhqꞌinal tiꞌ,» xhi ix yul yet ischukil. Lahwi tuꞌ isto ix yalno huneꞌ isbꞌiskꞌulal tuꞌ yinh istxah tet Komam Dios. 23 Yalni Komam tet ix hakaꞌ tiꞌ:
«Ay kabꞌebꞌ nime konhobꞌ ijbꞌiliko hawu,
haꞌ xin kabꞌebꞌ konhobꞌ tuꞌ kaw chaqꞌle howal yalanhto maxhto chipitzkꞌahi.
Ay huneꞌ kaw ekꞌbꞌal yip sat huneꞌxa.
Naj bꞌabꞌel chiꞌok naj yalanh yip naj iskabꞌ,» xhi Komam tet ix.c
24 Lahwi tuꞌ yapni istzꞌayikal iswatxꞌi iskꞌul ix Rebeca, kaw xin kawanh nixhte yunin ix pitzkꞌahi. 25 Naj nichꞌan bꞌabꞌel pitzkꞌahi, Esaú yij isbꞌi naj, naj tiꞌ kaw kaj chimchonhe naj yebꞌ xin kaw ay xil isnimanil naj. 26 Lahwi tuꞌ, ispitzkꞌapaxo hunxa naj, hayet ispitzkꞌa naj tiꞌ tzabꞌaniko naj yinh isyutz yoj naj bꞌabꞌel pitzkꞌa tuꞌ, yuxin Jacob yij isbꞌi naj. Hayet ispitzkꞌa kawanh yunin ix Rebeca tuꞌ, kaw 60 (oxkꞌal) habꞌil yaꞌ Isaac.
Yet yaqꞌni naj Esaú huneꞌ yehobꞌal yinh bꞌabꞌel kꞌahole tet naj Jacob
27 Wal kawanh nixhte unin tuꞌ kaw chꞌibꞌkanh. Naj Esaú kaw istzan naj yekꞌ xolaj qꞌebꞌtaj yebꞌ xin kaw helan naj uste noqꞌ. Walpaxo naj Jacob kaw yulnhanhe ay naj yebꞌ xin kaw chewchotanhe naj. 28 Wal icham Isaac kaw chitzala icham yinh naj Esaú yuto kaw choche icham iskꞌuxuꞌ no noqꞌ chistzabꞌ naj. Walpaxo ix Rebeca xin haꞌ yinh naj Jacob bꞌay kaw chitzala ix.
29 Yet hunel xin lanhan iswatxꞌen naj Jacob tzet chislo yet yapni naj Esaú, kaw xin chisiki naj. 30 Yalni naj tet yuxhta tuꞌ hakaꞌ tiꞌ:
—Kaw chinqꞌanan tawet, aqꞌ nichꞌano tzet chaloh kajkꞌomkꞌonhe jilni tuꞌ wetan, yuto kaw chinkaman yu nhochahilal,d xhi naj.
31 Istaqꞌwi naj Jacob tuꞌ tet naj:
—Kꞌultikꞌa, yaj tato chawaqꞌ huneꞌ hawehobꞌal yet bꞌabꞌel kꞌahole wetan, xhi naj.
32 Istaqꞌwipaxo naj Esaú, yalni naj:
—Kaw chil hasat, lanhan inkaman yu nhochahilal, tzikꞌanabꞌ xin chiꞌokniko huneꞌ tuꞌ wuhan, xhi naj. 33 Yalnipaxo naj Jacob:
—Kaw yelmi chawala, xhi naj. Istaqꞌwi naj Esaú:
—Hoꞌ chiwaqꞌan tawet, kaw chabꞌe Komam Dios, xhi naj. Hak tuꞌ yu yaqꞌnikano naj huneꞌ yehobꞌal yet bꞌabꞌel kꞌahole tet naj Jacob. 34 Lahwi tuꞌ yaqꞌni naj Jacob huneꞌ itah tuꞌ yebꞌ pan tet naj Esaú, yok naj waꞌoj. Haxa yet islahwi iswaꞌ naj Esaú tuꞌ, yahwano naj isto naj. Kaw xin matzet chalilo huneꞌ yehobꞌal naj yet bꞌabꞌel kꞌahole tuꞌ yul sat.