E Iesu e takei poutsia tara tou mate
20
Tara bongbong koru turu lan tutuun turu wik te kuhil noaia a ka,
be Maria Matalina e la uana tara kioun mate.
Ba nonei e tarena a hatu ti hapili kap nai a kiou i lubana ii a matana a kiou.
2 Ba nonei e piata uana tere Saimon Pita na i tar mena poeiena i tamulam,
“Nori e lue lila e Iesu tara kiou,
alam ema atei silemi ime tena hake lilen!”
3 Ba lam mere Pita e laba namuma a han me la uaiem tara kiou.
4 Alam a huol u piata hoboto,
kaba lia u piata bani e Pita mena tuku mam gia tara kiou.
5 Ba lia e turu putagu me taregu u labalaba u lamelame e ka,
kaba lia uma tasu uai iogana.
6-7 Be Saimon Pita e piata hamurimurima me la sokö nitöa uana tara kiou,
mena tareiena u labalaba ti pitsei u tuenrei i tanen e opö na u labalaba ti pits hahise ii a bakuna e Iesu.
Kaba u labalaba teka ema opö gono mei u labalaba ti pitse ii u tuenrei i tanen.
Nonei e tapits peisa me opö pepeisana tara tana makum.
8 Ba lia tu tuku mam tara kiou e töan tasu hasigu me taregu a ka teka me hamanagu.
9 Kaba alam uma atei haniga sil koru noei u raranga turu Buku u Göagono te poeiena nonei ega takei poutsia tara tou mate i tanen.
10 Ba lam e la poutsum tara makum tu kaia lam.
E Iesu e butuia tere Maria Matalina
11 Kaba ae Maria e tuol ia tara matana kiou bate tabena.
Pöata te tabeien ba nonei e turu putana me tara uana iahana kiou.
12 Ba nonei e tarena a huol a angelo i ka mei u hasobö u hiaka nitöa,
nori i gum ia tara makum te opöia u tuenrei tere Iesu,
a töa e gum ia tara pala te baku uaien na tabi e gum ia tara pala te mou uaien.
13 Ba nori e rangate ren,
“A tsi tahol,
aha te tabe sile mölö?”
Be Maria e ranga palis ranen me poeiena,
“Nori e söate lila a Tsunono i tar,
na lia ema ateigi ime tena na hake lilen!”
14 E Maria e mar ranga uu teka ba nonei e habiritsina me tarena e Iesu te tuol uaien,
kaba nonei ema atei silei nonei e Iesu.
15 Be Iesu e rangate nen,
“A tsi tahol,
aha te tabe sile mölö?
Esi te sakie mölö?”
E Maria e pei talasi nonei a tson te taratara kapiin a kui,
ba nonei e poeiena i tanen,
“A tsi tsunono,
tu söata halhale len lö,
hatei mou lia ime tuna hakeien lö ba lia tena lue gouen.”
16 Be Iesu e poeiena i tanen,
“Maria!”
Ba e Maria e habirits uana i tanen me poeiena turu HaHibru,
“Rabonai!”
U mar ranga teka e poeiena,
“Tson Hihatuts.”
17 Be Iesu e poeiena i tanen,
“Möa tu pile kap naiou lia,
taraha alia ema la noa gi iasa tere Tamar.
Kaba alö go la tara man hahatoulana i tar,
u katuun te hamana ria i tar,
balö tena hatei ramen alia e la uagu iasa tere Tamar na e Tamamilimiou has.
Alia e la uagu tere Sunahan i tar na tere Sunahan has i tamilimiou.”
18 Be Maria Matalina e lana mena ranga meraiena u katunun tsitsilo me poeiena,
“Alia e tara hakape guma a Tsunono!”
Ba nonei e hatei has raneien u ranga te ranga memeien e Iesu.
E Iesu e butuia turu katunun tsitsilo i tanen
19 Nonei noahas turu lan,
alam u katunun tsitsilo u matoutir u Jiu,
me hapili raiem u tamana tara luma tu kaia lam.
A pitala e tsiruku hakapa nonei turu lan tutuun turu wik teka,
be Iesu e butuna me tuolna i gusu mulam me poeiena i tamulam,
“A masalohana e tatei ka gono mera noulimiou.”
Jesus appears to the disciples (Jon 20:19-31)
20 Nonei e ranga hakapa ba nonei e haröto ranei lam a man limanen na liklikinen.
Ba lam u katunun tsitsilo e sasaala koru mem tu tara menai lam a Tsunono.
21 Be Iesu e ranga lelna i tamulam me poeiena,
“A masalohana e tatei ka gono mera noulimiou.
E Tamar e tula mena mei lia i puta na lia te tula has ragou limiou.”
22 Nonei e mar ranga hakapa uu teka ba nonei e pihu uana i tamulam me poeiena,
“Lueiam u Namnamei u Göagono.
23 Te luba memoi limiou a man markato a man omi turu katuun,
ba markato a omi teka te taiana.
Tema luba ramoien limiou ba man markato a man omi teka tema antunan taia has noi.”
E Iesu mere Tomas
24 E Tomas,
nonei a töa i tamulam a maloto na huol ti ngö hasei “e Didimus,”
ema ka gono merai lam tara pöata te lama e Iesu.
25 Ba palair u katunun tsitsilo e hateie ren me poeier,
“Alam e tara hakape mula a Tsunono.”
Be Tomas e poeiena i taren,
“Tema tare goi lia u gahilina tara nila i limanen,
na tema tupa nagoi lia a kabeler tara man makum turu nila,
na tema tupa nagoi lia a limar i liklikinen,
alia ema antunan hamana gi.”
26 U töa u wik e la hakapa,
ba lam u katunun tsitsilo i tanen e ka pon mia i luma,
na tara pöata teka e Tomas e ka gono meraiou lam.
A man tamana i pili,b
kaba e Iesu e tasuma memi tuol pon na i gusu mulam me poeiena,
“A masalohana e tatei ka gono mera noulimiou.”
27 Ba nonei e poeiena tere Tomas,
“Hakeia a kabelemölö teka,
balö te taram tara man limar,
hasoa nema a limamölö bate tupa namen iogana i liklikir.
Möa tu hahamana,
alö go hamana.”
28 Be Tomas e ranga palis uana i tanen me poeiena,
“O Tsunono na e Sunahan i tar!”
29 Be Iesu e poeiena i tanen,
“Alö e hamana mem te tara mena milö alia.
A nikalala pan turu katuun tima tarei lia kaba nori e hamana noa hasir.”
A ka ti koloto sile ii u buku teka
30 E Iesu e kato hasi a man taina a man mirakol a man parpara koru i matar u katunun tsitsilo i tanen kaba lia ima koloto hakapa naien iahana u buku teka.
31 A man raranga teka i koloto sile ii tego hamana mena milimiou e Iesu nonei e Mesaia,
a Pien Tson tere Sunahan.
Na te hamana mia limiou i tanen ba limiou te lu sila has namoua a nitöatöa tara solo nen.