E Iesu e butuia tara tohit a katunun tsitsilo
21
I murina a manka teka e Iesu e butu lelia turu katunun tsitsilo i tanen tara Ramun i Galili te ngö haseri a Ramun i Taibirias.
Nonei e mar butu u teka.
2 Alam mere Saimon Pita,
ne Tomas ti ngö hasei “e Didimus,”
ne Natanielina i Kena i Galili,
na lam a galapien tson tere Sebedi,
na huol lel has a aposol i ka gonogono hoboto.
Jesus at the Sea of Galilee (Jon 21:1-25)
3 Be Saimon Pita e poeiena i tamulam,
“Alia ena hagalagu.”
Ba lam e poeiem i tanen,
“Alam e la gono has memou lö.”
Ba lam e sua talam mena hagala halanim,
kaba lam uma soohe mei ta töa ta iena.
4 A pitala e katsin butuma,
be Iesu emi tuolna i kotolana.
Kaba alam uma mareien.
5 Ba nonei e poeiena i tamulam,
“A galapien,
alimiou e sooho hase muma ta iena?”
Ba lam e poeiem,
“E möa.”
6 Ba nonei e poeiena,
“Lapo menami a abe tara pal matou,
ba limiou te soohe mou ta iena.”
Ba lam e lapo nem a abe mema antunan las hasei nami a abe tara tolaala,
taraha a abe e saputu homi nitöani u iena me katsin takala tununa.
7 Ba lia e poeiegu tere Saimon Pita,
“Nonei a Tsunono!”
Ba pöata te hengoeia e Pita u ranga teka,
ba nonei e hasei boroborena u hasobö i tanen me kurapa uana turu ramun me ape sunguna.
8 Kaba a palai i la gono mema a tolaala bate las tala naruma a abe a saputu tara iena,
taraha nori ima lehana bana ii a kotolana,
u tolima u maloto a ngaha puku.
9 Pöata tu sung hakapa ma lam,
ba lam e tarem u tula te kamei a matsi iena ti höia i tanen,
na beret has e ka.
10 Be Iesu e poeiena i tamulam,
“La memuma ta iena te soohe muma limiou.”
11 Be Pita e sei pouts uana tara tolaala me las hasungena a abe iena a saputu.
A para koru a iena a kapan,
e antunaia tara 153,
kaba a abe ema takala ii.
12 Be Iesu e poeiena i tamulam,
“La muma mi nouiam.”
Kaba alam uma rangatanai nonei esi,
taraha alam u atei sil nonei a Tsunono.
13 Be Iesu e hanou ranei lam a beret na iena.
14 Nonei a hatopisana a pöata teka te butuia e Iesu turu katunun tsitsilo i tanen i murina te takei pouts ien tara tou mate.
E Iesu mere Pita
15 Pöata tu nou hakapaia lam,
be Iesu e poeiena tere Saimon Pita,
“O Saimon,
a pien tere Jon,
alö e ngil hase moulia?
U ngil i tamölö e pan saluhe ba nena u ngil turu katuun teka?”
Be Pita e poeiena i tanen,
“Aa,
o Tsunono.
Alö e atei silem alia e ngil korue goulö.”
Be Iesu e poeiena i tanen,
“Ha nou ri u tunan sipsip i tar.”
16 Be Iesu e rangata hahuol lelena e Pita me poeiena,
“O Saimon,
a pien tere Jon,
alö e ngil hase moulia?”
Be Pita e poeiena i tanen,
“O Tsunono,
Alö e atei silem alia e ngil korue goulö.”
Ba e Iesu e poeiena,
“Tara kapir u sipsip i tar.”
17 Ba e Iesu e rangata hatopiseiena e Pita me poeiena,
“O Saimon,
a pien tere Jon,
alö e ngil hase moulia?”
Ba torina e Pita e tiama koru tala mei te rangata hatopisa uu e Iesu me poeiena,
“Alö e ngile moulia?”
Ba nonei e poeiena tere Iesu,
“O Tsunono,
alö e atei silem a mamanaka hoboto,
na lö e atei sil hasem alia e ngil korue goulö.”
Be Iesu e poeiena i tanen,
“Hanouri u sipsip i tar.
18 U mana koru alia e ranga hamana megou lö,
a pöata tu hitots noaia lö,
alö u hula la mei u ngil peisa i tamölö.
Kaba pöata te tsonpan mia romana lö,
balö te hasoa nemou a limamölö ba palair u katuun te kitse riou lö bate na piou naria lö tara makum tema ngilin la uamilö.a”
19 E Iesu e mar ranga uu teka bate haröto nena temar solosei mena nei romana e Pita e Sunahan tara pöata te atung hamate rien romana.
Be Iesu e poeiena i tanen,
“Kukute mou lia.”
E Iesu mere Jon
20 Be Pita e habirits uana i muriren me tare noulia,
tu kukute mera meien lia,
alia tu ngil korui e Iesu.
(Alia a katuun tu habuaia tere Iesu tara kannou me poeiegu,
“O Tsunono,
esi nonei te haröto nanou lö turu katuun te paköe riou lö?”)
21 Ba pöata te tareia e Pita alia,
ba nonei e poeiena tere Iesu,
“O Tsunono,
aha te butuna romana tara katuun teka?”
22 Be Iesu e poeiena i tanen,
“Te ngile gia lia nonei ega töatöa nitöa e antunana tara pöata te kopis pouts guma romana lia,
a ka teka ema ka uanei i tamölö.
Kukute mou lia!”
23 Ba u raranga e tala uana turu katuun hoboto tere Iesu te pei menaien alia ema antunan mate gi romana.
Kaba e Iesu ema pe ii alia e Jon ema mate gi romana.
E möa.
Nonei e pei lasi,
“Te ngile goua lia nonei ega töatöa nitöa e antunana tara pöata tena kopis pouts guma romana lia,
a ka teka ema ka uanei i tamölö.”
24 Alia e Jon,
a katunun tsitsilo tere Iesu te koloto negu a manka teka.
Alia u tara peisein a matar balia te hatei nagen,
na lam e atei silem te mana uana u raranga teka.
25 Kaba e Iesu e kato hasi a man palaina a manka a man parpara.
Na sanena a manka teka gi koloto hakapa hoboter,
ba han i puta teka te moa nou ta makum tegi haka raia a man buku teka.