A toukui turu
APOSOL
1
1-2 O Tiopilus,
alia e koloto lel uagu i tamölö.
Turu buku mam i tar alia u kolotein a mamanaka te katoi e Iesu tara pöata te hatanieien a toukui i tanen,
e antunana tara pöata ti lu sei pouts menaien i Kolö.
Mamuna te la sei uaien i Kolö,
nonei e hala sila naia u raranga turu Namnamei u Göagono turu aposol te hopö kap raien.
3 I murina te mate hakapaien,
ba nonei e roron butuna turu aposol i tanen tara man töa man pöata.
Nonei e kato sila naia a mamanaka teka tego haröto meraien u aposol,
nonei e töatöa hamanana.
Nori i tareien tara man tötöa man pöata iahana u tohats u maloto u lan,
ba nonei e hatei raneien a Nipepeito tere Sunahan.
4 Tara töa pöata e Iesu e nou gono mer u aposol me poeiena i taren,
“Möa tu laba naiam i Jerusalem,
hahaloseiam u Namnamei u Göagono te ranga nema e Tamar tego hala raien limiou,
alia u hatei has raien limiou.
Jesus Ascends to Heaven (Aposol 1:4-11)
5 E Jon e baptais ria u katuun u ramun,
kaba ema lehana noi ba limiou tena habaptais moua romana turu Namnamei u Göagono.”
E Iesu i lu sei menai i Kolö
6 Ba pöata ti gono hoboto pon ia u aposol ne Iesu ba nori e rangate ren me poeier,
“O Tsunono,
Alö e taguhu hamanasa tala ramoura a tei Israel tara pöata teka bara te pile peisa nariou a peisarara?”
7 Ba e Iesu e poeiena i taren,
“Ema limiou nei tego atei sileiam a pöata tsi u lan tsi u hiningal te haka mei e Tamar a nitsunono peisa i tanen.
8 Kaba limiou e luemou u Namnamei u Göagono tere Sunahan ba nonei te hala ranoui limiou a nitagala.
Ba limiou tena ranga hatei namoua lia i Jerusalem na i Judia na i Samaria na turu han hoboto i puta.”
9 E Iesu e ranga hakapa lasi ba nonei te lu sei menari i kolö i matar u aposol.
U köasi e hamous kap naien ba nori ema tara lele rien.
10 Nori i tara sei noa has uu i kolö tara makum te sila len,
ba huol a katuun e songots butu ria i rehiren,
u hasobö i taren e hiaka nitöa.
11 Ba huol a katuun teka e poeier,
“U katunura i Galili,
aha te tuol sile mi limiou bate tara sei uamiou i kolö?
E Iesu te lu sei me lilei i Kolö ena mar kopis pouts has uanama romana temar la uala len i Kolö.”
A katuun te palis e Judas
12 Ba u aposol e laban ner u Pokus tara Ruein Olip ti kaien me la poutsur i Jerusalem.
A maroro teka e antunaia temar tataala uaier u Jiu turu Lan u Göagono i taren.a
13 Pöata tina tukuien i Jerusalem ba nori e sei uaier tara rum iasa ti kaien.
Nori ere Pita mere Jon ne Jemis ne Endru,
ne Pilip ne Tomas ne Batolomio ne Matiu.
Na e Jemis a pien tere Alpius,
ne Saimon a katuun te tagala bei a han i tanen,
ne Judas a pien tere Jemis.
14 U katuun hoboto teka i gono hoboto bate singo nitöa uaier tere Sunahan.
Nori i ka gono has mer a touhaliou,
ne Maria e tsinana e Iesu,
na u toulana e Iesu has.
15-16 Tara pöata teka u katunun tsitsilo tere Iesu ti gono hoboto i antunaia turu 120 a katuun.
Be Pita e takeina me tuol na i mataren me poeiena,
“A matsi hahatoulana i tar,
u raranga te kana turu Buku u Göagono ega butu hamana koru.
U Namnamei u Göagono tere Sunahan e ranga silama tere tuburara e Devit i manasa me ranga nena e Judas,
a katuun te las rema u katuun ti pile kapiin e Iesu.
17 E Judas a töa has i tarara,
nonei e ka has ia tara toukui ti kaia ra.”
18 A moni tara markato a omi te katoeien,
i holei a töa makumun tsiktsiki.
Ba I murinen be Judas e rusuna ba torinen e tabutuna me talous hakapana.
19 U katuun hoboto i Jerusalem i hengoin a ka teka me ngöeri a makumun tsiktsiki teka i Akeldama.
A solo teka e poeiena “U Tsiktsiki te kamena u Rahatsing.”
20 Be Pita e poeiena,
“I koloto has naia turu Buku u Göagono turu Buk Sam,
‘A luma i tanen e tatei opingina romana,
na e möa nou ta katuun tega kaia i tanen.’
“Na u Buku u Göagono e pei hasena,
‘A tana katuun e tatei palise nen
bate lueiena a toukui i tanen.’
21-22 “A katuun te tataala gono meraiou ra tara mamana pöata ti hula la gono mei ra e Iesu,
te taniama tara pöata te baptais raia e Jon u katuun batena antunana tara pöata te laba raia ra e Iesu te lauaien i Kolö,
a katuun te tara hamatskö te takei pouts ia e Iesu tara tou mate i tanen,
a katuun teka ega tahongoia i tarara.”
23 Ba nori e hala ner a huol a solo,
a töa e Josep ti ngöei e Basabas na tana solo tanen e Jastus,
na tai ti ngöei e Matias.
24 Ba nori e singo uar tere Sunahan me poeier,
“O Tsunono,
alö a töa te atei silem a torir u katuun hoboto.
Haröto ramei lam esi te ngile mölö tara huol a katuun teka.
25 Nonei ega palisi e Judas tara toukui turu aposol te pile naien.
E Judas e rus ia tara toukui teka me la uana tara makumun nihahuna i tanen.”
26 Ba nori e hongo hoboter a man hihase tara huol,
ba u hihase tere Matias e talous mam nama,
ba nonei e hatahongo taleria tara maloto na töa a aposol ba u hihase i taren e onoto poutsuna.b