U Namnamei u Göagono tere Sunahan e kouluma
2
Pöata te butuma u Lan u Göagono ti ngöei u Pentikos,
u katuun tere Iesu Kristo i ka hoboto ia tara töa makum.
2 Ba töa a ka te olongo here mei u ualupu pan e songots butu nama i Kolö,
memi saputu hobotena a iahana luma ti gumien.
3 Ba nori e tareier a ka te here ii u kulupu na te here ii u mia e la kalakalana mena tö ria i bakuna man tötöa man katuun hoboto.
4 Ba nori e saputu hoboto meier u Namnamei u Göagono tere Sunahan,
te haranga raien na te hala raien a niatei na nitagala tegi antunan ranga uaien tara man taina man ranga.
5 U Jiu u para koru ti kamei u nihamana u kapan koru turu han hoboto ti kaia i Jerusalem tara pöata teka.
6 Ba pöata ti getaia u katunun tsitsilo,
ba u katuun u parpara e piata hoboto ruma me asingoto koru ner ti hengo menaien ti ranga uaien tara man ranga hoboto i taren.
7 Ba nori e asingoto korur me rangatar,
“Alia e poeiegu u katuun te rangar a tei Galili.
8 Ga e hana bara man tötöa te hengoera a man ranga i tarara?
9 Ara u katununa tara man provins i Patia na i Midia na i Ilam na i Mesapotemia na i Judia na i Kapadosia na i Pontas na i Eisia.
10-11 Na i Pritsia na i Pampilia na i Itsip na tara man makum i Libia te sukusuku uana i Sairini.
Na palair u katunura i Rom,
u Jiu hamana na pala halhal ti lu hasi u lotu turu Jiu,
na palair u katunura i Krit na i Arebia.
Ara hoboto e hengo raren ba nori te ranga ria turu mar ranga i tarara bate hatei ner a man toukui pan te katoe e Sunahan!”
12 Ba nori e asingoto hobotor me lagi hakhakatsir me hia rangrangatar,
“Aha nonei koru te markato uana teka?”
13 Kaba palai i ranga hamatsingolo raien me poeier,
“U katuun teka e tutu mer a uain.”
E Pita e ranga ia turu katuun
14 Kaba e Pita e tuol gono mer a maloto na töa a aposol me ranga hapanina me poeiena turu katuun,
“U katunura i Judia na limiou hoboto te ka mia i Jerusalem,
hengo mia i tar ba limiou te atei haniga miou.
15 Alam ema tutu memi a uain temar ranga ua milimiou,
taraha a ka e bongbong noana.a
16 E möa,
a ka teka e ranga mam noani e Joel a propet tere Sunahan i manasa me poeiena:
17 ‘E Sunahan e poeiena,
Tara pöata i murimuri te sukusukun kapa noa romana a pöata hoboto,
alia e katoe gou a ka teka:
Alia e hala nagou u Namnamei i tar turu katuun hoboto.
A galapien tson i tamilimiou na galapien touhaliou has ena ranga nariou romana u rangan propet.
U hitots i tamilimiou ena tare riou a man hiharöto,
na u tsonpan ena sinasohe riou a man sinasoho.
18 E manana.
Na tara man tsonun kukui puku na touhalioun kukui puku has
alia e hala nagou u Namnamei i tar,
ba nori tena ranga nariou u rangan propet.
19 Na lia te haröto nagou a man hiharöto iasa i kolö
na manka te butu noua i puta
turu tsiktsiki u rahatsing na u tula na u ruhu pan.
20 I mam te butu noua u Lan u kapan koru tara Tsunono
a pitala e kuhil nou
na tsihou e rörö here noi u rahatsing.
21 A Tsunono e taguhu ranou u katuun te singo uaier i tanen,
ba nori tema tatei omi roi.’”
E Sunahan e mar ranga uu teka.
22 “Alimiou u katunura i Israel,
hengoeiam u raranga i tar.
E Iesu na i Nasaret nonei a katuun te hopö kapiin e Sunahan.
Na e Sunahan e haleien a nitagala ba nonei te katoeiena a man mirakol pan i matamilimiou,
na manka teka e harötein te mana uana e Iesu.
Alimiou e atei sile miou a ka teka,
taraha nonei e butuia tara han teka.
23 A katuun teka i hala rai limiou,
e kukute noahasena a man hakats tere Sunahan te kato mam noahaseien i manasa,
ba limiou e kato hamatie men,
taraha alimiou u tagala sileiam u katuun u omi gi nila naien tara kuruse.
24 Kaba e Sunahan e hatakei poutseien tara tou mate i tanen.
E Sunahan e purese banai e Iesu a kits tara tou mate i tanen,
taraha a tou mate ema antuna korui tega pile kap menaien e Iesu.
25 E tuburara e Devit e rangein e Iesu i manasa me poeiena tere Sunahan:
‘Alia u tara nitöani a Tsunono i matar.
Nonei e kana tara pal matou i tar
ba lia tema tatei matout gi.
26 A torir e sasaalana na u raranga i tar e haröto nena a nisasaala i tar.
Na peisar e hahanei nitöa sile nou a tou takei pouts.
27 Taraha,
alö ema laba namoi u namnamei i tar bate kakana tara makum turu mate.
E möa.
Alö ema haniga namoi tego koreme uu a tsomi i tamölö.
E möa.
28 Alö u haröte ii lia a maroro te la uana tara nitöatöa.
Na lö e kato hasasaala korue mou lia,
taraha alö e ka gono memou lia.’
E Devit temar ranga uu teka.”
29 E Pita e ranga lel me poeiena,
“A matsi hahatoulana i tar,
alia e ranga halesala negu e Devit a King i tarara na i manasa e mate hakapa ba nori e honge ren tara kiou,
na kioun mate i tanen e ka noa hasina i romana.
30 Nonei a propet,
na nonei e atei sil e Sunahan e haleien u raranga te mana uu iasa.
E Sunahan e ranga hatagala hamana mam noani tega hatuol menaien ta töa tara hun katuun tere Devit turu gumgum u kapan.
31 E Devit e atei sil a ka teka ba nonei e ranga mam nena e Mesaia a katuun te hopö kapiin e Sunahan.
Ba nonei e poeiena,
e Mesaia ega takei poutsia tara tou mate i tanen.
E markato uana teka,
‘E Sunahan ema laba naien ba nonei te kakana tara makum turu katuun ti mate.
E möa.
A tuenrei nen ema koreme ii.’
32 Nonei e Iesu teka e Sunahan e hatakei poutseien,
na alam u tara hoboteien ba lam te habulungana namen.
33 Na nonei e la hakapa uu iasa mena gumna i rehina e Sunahan,
be Sunahan e hale neien u Namnamei u Göagono te ranga mam naien i manasa.
Na,
a ka te tare milimiou na te hengoe milimiou nonei u Namnamei teka te hala rameien lam.
34-35 E Devit ema la sei uai i Kolö,
kaba nonei e pei,
‘A Tsunono e pei tara Tsunono i tar:
Gum ia tara pal matou i tar,
e antunana tara pöata te kato ragoua lia u pakö i tamölö
u kaan tötö i tamölö.’
36 “Bora,
hatei raiam a tei Israel:
E Sunahan e katoeien a Tsunono na Mesaia,
nonei e Iesu a katuun ti hahalosi ra ti nila namia limiou tara kuruse.”
37 Pöata ti hengoeia u katuun u raranga teka,
ba nori e toku korur be ranga meier e Pita na u palair u aposol me poeier,
“A matsi hahatoulana,
aha tego kati lam?”
38 Be Pita e poeiena i taren,
“Hapolasa ba neiam a man markato a man omi na man hakats a man omi i tamilimiou ba limiou tena habaptais mia tara solona e Iesu Kristo ba man markato a man omi i tamilimiou te luba nariou ba limiou te lue miou u Namnamei u Göagono i tanen.
39 U Bulungana u Niga teka e la uana i tamilimiou na tara galapien has i tamilimiou i murimuri.
Na nonei e la has uana turu katuun hoboto te ka ria turu han i lehana na turu katuun hoboto te ngö rena e Sunahan.”
40 Be Pita e hatei has raneien u raranga u parpara lel me ranga hataatagina i taren me poeiena,
“Haneiam!
Alimiou e namots lu hase miou a nihahuna te la uanama turu katunura i romana.”
41 U katuun ti hengoe u ranga i tanen bate sasaala meren i baptaisir.
E sukusukuia turu 3,000 turu katuun ti baptaisir nonei turu lan teka temi hahonoto gono mer u katunun tsitsilo.
42 Nori i ha hengo hanigan töaia turu hihatuts turu aposol bate singo gono meraren tere Sunahan,
na nori i nou gono has mer u aposol.
U katuun ti hamana i ka haniga hoboto
43 Ba u aposol e katoeier u mirakol u parpara,
ba u katuun e matout korur.
44 U katuun ti hamana i ka hoboto bate hiamolamola ner a mamanaka i taren.
45 Nori i haholin a manka i taren bate molamola naier a moni turu katuun hoboto ti möa ta moni.
46 Turu mamana u lan nori i la hoboto uu tara Luman Lotu Pan tina singo hoboto uaien na nori i nou hoboto mei u hakats u niga na nisasaala pan.
47 Nori i solosei nitöani e Sunahan bate ka mer a niniganiga turu katuun ti ka hoboto meraien.
Na turu mamana u lan a Tsunono e halasei susuli u hihase turu katuun u tsimus ti hamanaia tere Iesu Kristo.