E Iesu e takei poutsia tara tou mate i tanen
16
Pöata te kapaia u Lan u Göagono,
bere Maria Matalina mere Salome ne Maria e tsinana e Jemis e holer a man uapi a man masi hanigantöa tegina sapeien u tuenrei tere Iesu.
Mak 16:1-20
2 Ba tara bongbong koru turu lan tutuun turu wik,
a pitala e butu hakapa noama,
ba nori e la uaier tara kioun mate.
3 Nori i hiarangrangata me poeier,
“Esi tena hategele ba beranoi ra a hatu te tupena a matana kiou?”
4 Pöata ti tara len ba nori e tarer,
a hatu pan koru i hategele ba hakapein.
5 Pöata ti tasuien tara kioun mate ba nori e tarer a töa tson a hitots te kamei u hasobö u hiakan töa e gumia tara pal matou.
Ba nori e asingotor me matout korur.
6 Kaba nonei e ranga meraien me poeiena,
“Alimiou goma asingotomi na goma matoutmi.
Alimiou e sakiemiou e Iesu na i Nasaret ti nila naia tara kuruse?
Nonei ema ka lel nei.
Nonei e takei pouts hakapa lala.
Taraiam tara makum ti hopöeien.
7 Kaba la mula,
na hatei raiam u katunun tsitsilo i tanen na e Pita,
u raranga teka:
Nonei e mam ranou limiou i Galili,
alimiou ena tare mouen i Galili,
temar hatei noahas meraien limiou.”
8 Ba nori e lakasar me bus ba ner a kioun mate,
taraha nori i asingoto koru me toltololo mer a nimatout.
Ba nori ema hateieri ta töa ta katuun,
taraha nori i matout koru.
E Iesu e butuia tere Maria Matalina
9 a I murina te takeia e Iesu tara tou mate i tanen,
turu lan tutuun turu wik,
ba nonei e butu mam na tere Maria Matalina,
a tahol te tsuga ba mam naien a tohit a liliahanei a omi.
10 Be Maria e la uana turu katuun ti roron ka gono mei e Iesu i hahuri bate taber.
11 Ba nonei e poeiena i taren,
“E Iesu e töatöana,
alia e tare gumen.”
Pöata ti hengoeien a ka teka ba nori e hahamana naren.
E Iesu e butuia tara huol a katunun tsitsilo
12 Ba i murinen ba nonei e butuna tara huol a katunun tsitsilo ti tataala uen tara man makumun kui,
kaba peisanen e butu halhal koru.
13 Ba nori e kopis poutsur mena hatei raier a palai ti roron ka gono meien.
Kaba nori i hahamana has raien.
E Iesu e butuia tara maloto na töa a katunun tsitsilo
14 Ba i murinen be Iesu e butuna tara maloto na töa a katunun tsitsilo tara pöata ti nou ien.
Ba nonei e ranga hatagala mera nen,
taraha nori ima hamana korui,
nori i hahamaneir u katuun ti tareien i murina te takei poutsien.
15 Ba nonei e poeiena i taren,
“La uaiam turu han hoboto i puta batena rarariemiou u Bulungana u Niga turu katuun hoboto.
16 A katuun te hamanana na te lueiena a baptais te lu poutse riou romana.
Kaba a katuun tema hamana nei e rus noa romana turu Kout tere Sunahan.
17 Na u katuun te hamanar e katoeier romana a man mirakol tara nitagala tere Sunahan te markato uana teka:
nori e poeier romana a solor bate tsuga ba raier u liliahanei u omi.
Na nori e ranga ria romana tara man ranga man tsimus tema atei sileri.
18 Na te pile naroien a kökötsi ba nori te ueier u ramun te kato hamatiena a katuun,
nori ema antunan mate roi.
Nori e hatakoperoua a limaren turu katuun te ka mer a siki ba nori te niga pouts riou.”
E Sunahan e lu pouts menai e Iesu i Kolö
19 A Tsunono e Iesu e ranga hakapa meraien be Sunahan e lu pouts mena neien i Kolö,
tena gum ien tara pal matou tere Sunahan.
20 Bu katunun tsitsilo e lar mena habulungana ner U Bulungana na tara Nitöatöa turu han hoboto.
Ba Tsunono e kato sila nana a man mirakol i taren te harötein a man raranga i taren e manana.
Mak 16:21-21