A schucalil ebꞌ anima
(Sal 53)
Sbꞌit jun tic vin̈aj David.
14
A ebꞌ chuc spensar sna ebꞌ to malaj Dios. Junlajanxon̈ej ix aj sjuanel spensar ebꞌ. Yelxo val te chuc scꞌulej ebꞌ. Malaj mach scꞌulan vachꞌil.2 Ato dꞌa satchaan̈ qꞌuelanemta Jehová dꞌa anima, yic syilaꞌ tato ay ebꞌ syacꞌoch spensar dꞌay, yic syilpaxi tato naan yuj ebꞌ.
3 A juntzan̈ bꞌeybꞌal chuc sbꞌeybꞌalej ebꞌ smasanil. Junlajanxon̈ej tzꞌaj sjuvibꞌat ebꞌ. Malaj junoc mach bꞌoan vachꞌ bꞌeybꞌal. Toton malaj val junoc mach.
4 Icha val to malaj spensar ebꞌ scꞌulan chucal chiꞌ. A ebꞌ chiꞌ satanel ebꞌ yetchon̈abꞌ, icha val to svael ebꞌ yaj ebꞌ, max yal-laj sbꞌa ebꞌ dꞌa Jehová.
5 Ste ibꞌxi ebꞌ yuj xivelal, yujto a Dios ayecꞌ yedꞌ ebꞌ vachꞌ sbꞌeybꞌal.
6 Snibꞌej ebꞌ syixtejbꞌat tas nabꞌil yuj ebꞌ emnaquil, palta a Jehová scolan ebꞌ emnaquil chiꞌ.
7 Comonoc a dꞌa tzalan Sion scot co colnabꞌil a on̈ israel on̈ tic. Ayic ol yacꞌanxi svachꞌcꞌolal Dios dꞌa quibꞌan̈, ol tzalaj val co cꞌool a on̈ yin̈til on̈ vin̈aj Jacob tic. Ol el lenaj ol quilaꞌ.