A tas snibꞌej Dios dꞌa ebꞌ anima
Sbꞌit jun tic vin̈aj David.
15
Mamin Jehová, ¿mach ebꞌ syal scajnajecꞌ dꞌa a cajnubꞌ? ¿Mach pax ebꞌ syal yaj edꞌ dꞌa jun tzalan bꞌaj syaqꞌuem sbꞌa anima dꞌayach?2 Aton ebꞌ vachꞌ sbꞌeybꞌal yedꞌ ebꞌ sbꞌoan tojolal, ebꞌ an̈ej lolonel yel syal dꞌa smasanil scꞌool.
3 Ebꞌ max naanqꞌue esal lolonel, max yixtejlaj yamigo, max yal-laj specal ebꞌ cajan dꞌa slacꞌanil.
4 Ebꞌ spaticanel ebꞌ paticabꞌilel uuj, palta stzalaj scꞌool ebꞌ yedꞌ ebꞌ ay elcꞌoch dꞌa sat. Ebꞌ max qꞌuexan tas syalaꞌ, tzꞌeln̈ejcꞌoch tas syal ebꞌ chiꞌ, vachꞌchom scan ebꞌ dꞌa yalan̈ yuuj.
5 Ebꞌ tzꞌacꞌan stumin majanil, palta max scꞌanlaj yuneꞌ stumin ebꞌ chiꞌ. Ebꞌ max schon̈laj sbꞌa dꞌa es testigoal dꞌa spatic ebꞌ malaj smul. A ebꞌ icha chiꞌ sbꞌeybꞌal, val yel malaj bꞌaqꞌuin̈ ol acꞌjoc ganar ebꞌ.