Lesal yic scacꞌoch Dios yipoc co cꞌool
Aton jun bꞌit namami sbꞌitaji. Sbꞌit jun tic vin̈aj David.
16
Ach in Diosal, tan̈vej in val, an̈ej dꞌayach tzin col in bꞌa.2 Mamin Jehová, sval dꞌayach to Vajal ach. Masanil vachꞌil ay dꞌayin, a dꞌayach scoti.
3 Te vachꞌ yic ebꞌ tzach cꞌanabꞌajan dꞌa scal ebꞌ a chon̈abꞌ. In gana tzin aj dꞌa scal ebꞌ.
4 Ol te qꞌuibꞌchaan̈ syaelal ebꞌ sbꞌatcan dꞌa spatic junoc comon dios. Max vacꞌochlaj in bꞌa vacꞌan schiqꞌuil nocꞌ silabꞌ yedꞌ ebꞌ dꞌa scomon dios chiꞌ. Max val-laj in bꞌa dꞌa sdiosal ebꞌ chiꞌ.
5 Mamin Jehová, an̈ej dꞌayach svicꞌ masanil vachꞌil. A achton tzacꞌ masanil tas snibꞌej in cꞌool. Dꞌa yol a cꞌabꞌ ayecꞌ in qꞌuinal.
6 A val bꞌaj ix echtejcan in macbꞌen, yelxo te vachꞌ. Man̈xo jantacoc svachꞌil tas ix acꞌcan chiꞌ dꞌayin.
7 Mamin Jehová, sval vachꞌ lolonel dꞌayach yujto a ach tzacꞌ in razón, tza cꞌaybꞌan pax in pensar dꞌacꞌvalil.
8 Masanil tiempo naan achn̈ej vuuj. Yujto ayachn̈ej ecꞌ vedꞌoc, yuj chiꞌ malaj tas tzin icꞌani.
9 Yuj chiꞌ ste tzalaj in cꞌool tzin bꞌitani. Malaj tas tzin naꞌa, yujto tzach vacꞌoch yipoc in cꞌool.
10 Man̈ ol in actejcanlaj dꞌa scal ebꞌ chamnac, man̈ ol a cha cꞌabꞌat in nivanil tic, a in cꞌanabꞌajum in tic dꞌayach.
11 Tzacꞌ vojtaquejel sbꞌeal qꞌuinal, tzacꞌan tzalajbꞌoc in cꞌool ayic ayinecꞌ edꞌoc. Ayn̈ej tzalajcꞌolal dꞌa a tzꞌey dꞌa masanil qꞌuinal.