Cꞌanoj vachꞌcꞌolal dꞌa Dios
Sbꞌit jun tic vin̈aj David.
17
Mamin Jehová, abꞌ in lolonel te yel tic, cotan̈ qꞌuelan dꞌayin ayic svalan in bꞌa dꞌayach. Acꞌcot tzꞌeyan a chiquin dꞌa in lesal tic, yujto man̈ in cꞌajanoc valan esal lolonel.2 A ach ton tzalaꞌ to malaj in mul, ojtac val to tojol in pensar.
3-4 Ojtac masanil tas tzin naꞌa, vachꞌchom dꞌacꞌvalil. Ix in a bꞌeycꞌolej, palta malaj jabꞌoc chucal ix ilchaj uuj dꞌayin. Toxo ix in naꞌ to malaj tas chuc ol valaꞌ. Icha syal a lolonel, najat ix in elcan dꞌa sbꞌeal ebꞌ comonxon̈ej smacꞌan ebꞌ yetanimail.
5 Tecꞌtecꞌ svutej in bꞌa in bꞌat dꞌa yol a bꞌe. Malaj bꞌaj ix in el bꞌesnaj dꞌay.
6 Ach in Diosal, sval in bꞌa dꞌayach, yujto tzabꞌn̈ej tas svalaꞌ. Mamin acꞌcot tzꞌeyan a chiquin dꞌayin dꞌa tas sval tic.
7 A ebꞌ sayanecꞌ a colval, tza col ebꞌ dꞌa ebꞌ yajcꞌool, tzin nibꞌej to tza chꞌox a vachꞌcꞌolal dꞌayin, aton juntzan̈ satubꞌtac.
8 Yaꞌilej in, icha syutej junoc mach syailan yol sat, icha chiꞌ tzin utej. Cꞌubꞌej in el icha val syutej nocꞌ caxlan̈ smoyanqꞌue yuneꞌ.
9 Colinel dꞌa ebꞌ chuc scot dꞌayin. Colin dꞌa ebꞌ milumcham anima tzꞌoch oyan dꞌa in patic chiꞌ.
10 Max ocꞌlaj scꞌol ebꞌ chuc chiꞌ dꞌa ebꞌ yetanimail, te acꞌumtacn̈ej slolon ebꞌ.
11 Lacꞌan tzacꞌan ebꞌ dꞌa in patic, ix oymaj ebꞌ dꞌa in patic vichan̈, toxon̈ej stan̈vej ebꞌ in yecan telvoc dꞌa sat luum.
12 Lajan ebꞌ icha junoc nocꞌ choj votzꞌanemi, ayic tzꞌelta jucnaj nocꞌ syam schibꞌej.
13 Mamin Jehová, ochan̈ vedꞌoc, mac sat ebꞌ ayoch ajcꞌolal dꞌayin yic stelvi ebꞌ. Acꞌlabꞌej qꞌuen espada tzin a colanel dꞌa yol scꞌabꞌ ebꞌ chuc chiꞌ.
14 Mamin Jehová, colinel yedꞌ a poder dꞌa yol scꞌabꞌ ebꞌ anima an̈ej tastac ay dꞌa yolyibꞌan̈qꞌuinal tic sgana syicꞌcani. Acꞌcot syaelal ebꞌ, jun yaelal yictaxon ebꞌ yaji. Ochocabꞌ locan ebꞌ yuninal ebꞌ yedꞌ yixchiquin ebꞌ yedꞌoc.
15 A inxo jun, yujto tojol in pensar, yuj chiꞌ ol ach vilaꞌ. Ayic ol in pitzvocqꞌue vaan, man̈xalaj tas ol snibꞌej in cꞌool, yujto ol in tzalaj val dꞌa ichan̈.