Bꞌit ayic tzꞌacꞌji ganar ebꞌ ajcꞌool
A vin̈aj David schecabꞌ Jehová ix bꞌitan jun bꞌit tic dꞌa Jehová ayic ix colchajel vin̈ dꞌa yol scꞌabꞌ ebꞌ ajcꞌool yedꞌ dꞌa yol scꞌabꞌ vin̈aj rey Saúl.
18
Mamin Jehová, tzach in xajanej, a ach tzacꞌ ipal dꞌayin.2 Mamin Jehová, ichato n̈aqꞌueen aj dꞌayin, ichato in cuartel aji, yujto in Columal ach. Ach in Diosal, a dꞌayach scot vip, a dꞌayach tzin col in bꞌa, in Tan̈vumal aji. In Columal ach, te ay a poder. Uuj max in yamchajlaj yuj ebꞌ ayoch ajcꞌolal dꞌayin.
3 Smojton val a bꞌitaji. Ayic svalan in bꞌa dꞌayach, dꞌa val elan̈chamel tzin a colcanel dꞌa yol scꞌabꞌ ebꞌ ajcꞌol yajoch dꞌayin.
4 A smay chamel ix oymaj dꞌa in patic. Man̈ jantacoc yaelal ix javi dꞌa vibꞌan̈ yic tzin sateli.
5 A chamel, ichato toxo ix spixoch slasu dꞌayin, ichato ix sbꞌo in yaalil bꞌaj ol in telvoc.
6 Mamin Jehová, ix val in bꞌa dꞌayach ayic ayinecꞌ dꞌa scal in somcꞌolal. Ach in Diosal, ix in cꞌan a colval. A dꞌa a templo ix abꞌ tas ix valaꞌ. Ix cꞌoch vav dꞌa a chiquin.
7 Ichato chiꞌ ix ecꞌ jun nivan quixcabꞌ. Yelcꞌolal ix ibꞌxi yibꞌ lum nivac vitz. Ix tzicubꞌtan̈aj val yuj yoval a cꞌool ach in Diosal.
8 Ichato ix elta tabꞌ dꞌa yol a n̈iꞌ, axo dꞌa yol a tiꞌ ichato ix elta jun cꞌacꞌ te ov. Ichato ix elta tzipipoc tzacꞌacꞌ dꞌa yol a tiꞌ chiꞌ.
9 Ix a jac satchaan̈, ix ach emuli. Ayoch nivac qꞌuicꞌal asun dꞌa yalan̈ oc ayic ach emul chiꞌ.
10 Ay ach qꞌue dꞌa yibꞌan̈ jun querubín, ix ach bꞌat jen̈en̈oc, ix ach bꞌat bꞌachachoc dꞌa yibꞌan̈ icꞌ.
11 Cꞌubꞌan ach el bꞌaj te qꞌuicꞌqꞌuinal. Ix a cꞌubꞌejel a bꞌa dꞌa scal qꞌuicꞌal asun bꞌudꞌjinaquel yuj a aꞌ.
12 Ay cꞌacꞌ ix laj elta copnaj dꞌa ichan̈ icha val lebꞌlon. Ix cot sacbꞌat dꞌa scal asun yedꞌ tzacꞌacꞌ.
13 Mamin Jehová, ecꞌ achto dꞌa yibꞌan̈ smasanil, ix el av, icha val scꞌan̈ cꞌu dꞌa satchaan̈. Ix cot sacbꞌat yedꞌ tzacꞌacꞌ.
14 Ix acꞌanbꞌat a jul-labꞌ chiꞌ, axo ebꞌ ajcꞌool ix saclemcanbꞌat ebꞌ yuuj. Ix a julanbꞌat jun cꞌacꞌ tzꞌecꞌ copnaj dꞌa scal ebꞌ, ix pechchaj ebꞌ yuuj.
15 Mamin Jehová, yuj schaan̈il ix ach avaji, yuj pax jun icꞌ te ov ix aqꞌuelta, ix checlaj yich aꞌ mar. Yuj pax chiꞌ ix checlaj yich yolyibꞌan̈qꞌuinal tic.
16 Ach in Diosal, masanto dꞌa satchaan̈ ix acꞌcot a colval dꞌayin, ichato ix in icꞌqꞌueta dꞌa yol jun a aꞌ te jul yich.
17 Ix in a colan dꞌa ebꞌ ajcꞌool te ay yip, malaj tzin och dꞌa ebꞌ, yelxo val te tecꞌan ebꞌ dꞌa vichan̈.
18 Ix och bꞌulnaj ebꞌ dꞌayin ayic ay in och dꞌa ilcꞌolal, a achxo Jehová ix ach och vedꞌoc.
19 Ix in icꞌanelta bꞌaj lodꞌan, ix in acꞌancanoch bꞌaj levan. Ix in a coloꞌ yujto xajan in uuj.
20 Mamin Jehová, ix acꞌ spac dꞌayin, yujto tojol ix vutej in bꞌa. Ix acꞌ a vachꞌcꞌolal dꞌayin, yujto malaj in mul,
21 yujto ix in cꞌanabꞌajej a bꞌeybꞌal. Ach in Diosal, maj in cꞌulejlaj chucal yic svicꞌcanel in bꞌa dꞌayach.
22 Masanil a cꞌaybꞌubꞌal, naann̈ej vuuj, malaj bꞌaqꞌuin̈ sbꞌat a lolonel satcꞌolal vuuj.
23 Vachꞌn̈ej in bꞌeybꞌal dꞌa ichan̈. Ix in yaꞌilej in bꞌa yic max in bꞌat dꞌa chucal.
24 Yujn̈ejton chiꞌ ix acꞌ spac dꞌayin yujto tojol svutej in bꞌa, malaj pax in mul dꞌa yol a sat ach Jehová.
25 Mamin, a ebꞌ tzach cꞌanabꞌajani, ol elcꞌoch syal a lolonel dꞌa ebꞌ. A ebꞌ vachꞌ spensar, vachꞌ pax tzutej a pensar dꞌa ebꞌ.
26 Vachꞌ tzutej a bꞌa dꞌa ebꞌ vachꞌ sbꞌeybꞌal, palta tza chꞌox a jelanil a tenanecꞌ spensar ebꞌ ixtum anima.
27 Tza col ebꞌ emnaquil, axo ebꞌ syicꞌchaan̈ sbꞌa, tziqꞌuemta ebꞌ.
28 Mamin Jehová, a achton tzacꞌ saquilqꞌuinal dꞌayin. Ach in Diosal, a achton tzicꞌcanel qꞌuicꞌalqꞌuinal dꞌayin.
29 Yuj a colval ix in saclemejbꞌat ebꞌ soldado, ix in cꞌaxpajecꞌ dꞌa yibꞌan̈ smuroal juntzan̈ chon̈abꞌ.
30 Ach Jehová Dios, yelxo val te vachꞌ a bꞌeybꞌal. A a lolonel ix acꞌcani, smoj ton val malaj co chabꞌcꞌolal dꞌay. Tza colel masanil mach yipcꞌolal aj yuuj.
31 Mamin Jehová, malaj junocxo Dios, a achn̈ej. ¿Tocval ay junocxo colvajum icha ach tic?
32 Ach Dios, a ach tzacꞌn̈ej vip. A ach tzin a cuchbꞌej dꞌa jun bꞌe te vachꞌ.
33 Icha val sbꞌey junoc nocꞌ cꞌultaquil chej, icha val chiꞌ tzꞌaj in bꞌey uuj. Dꞌa sattac vitz yeqꞌui, tecꞌtecꞌ vaj uuj.
34 A ach tzin a cꞌaybꞌej dꞌa oval, tzacꞌanpax vip yic tzin pacchitan junoc jul-labꞌ nabꞌa bronce.
35 Mamin, a ach tzin a tan̈vej, tzin a colani. A a vachꞌ cꞌabꞌ tzin yamanqꞌue lin̈an. Yujn̈ej a vachꞌcꞌolal ix in icꞌchaan̈.
36 Vachꞌ ix utej in bꞌe a bꞌoani yic vachꞌ max in el-laj n̈ernajoc.
37 Ix in pech ebꞌ ayoch ajcꞌolal dꞌayin, ix yamchaj ebꞌ vuuj. Maj in ochlaj vaan masanto ix cham ebꞌ vuuj.
38 Chocꞌ ix vutejcan ebꞌ yic vachꞌ man̈xo ol qꞌue vaan ebꞌ. Ix telvi ebꞌ dꞌa scal voc.
39 A achton tzacꞌ vip yic svacꞌan oval. A ebꞌ schichon scꞌol dꞌayin, tzacꞌ yaqꞌuem sbꞌa ebꞌ dꞌayin.
40 A ach tza pechel ebꞌ ayoch ajcꞌolal dꞌayin. Yuj chiꞌ syal in satanel ebꞌ malaj tzin och dꞌay.
41 Scꞌan colval ebꞌ, palta malaj mach scolan ebꞌ. Stevi ebꞌ dꞌayach Jehová, palta max ach tacꞌvilaj dꞌa ebꞌ.
42 Chocꞌ tzꞌaj ebꞌ vuuj icha val pococ tzꞌicꞌchajqꞌue vaan yuj icꞌ. Tzin tecꞌanem ebꞌ icha val stecꞌchajem lum socꞌom dꞌa yoltac bꞌe.
43 Tzin a colel dꞌa yoval ebꞌ chꞌoc chon̈abꞌil, tzin acꞌancanoch yajaliloc juntzan̈ nivac chon̈abꞌ. A ebꞌ anima man̈ vojtacoclaj, a ebꞌ tzin acꞌan servil.
44 An̈ej syabꞌan vabꞌixal ebꞌ, tzin scꞌanabꞌajan ebꞌ. A ebꞌ chꞌoc chon̈abꞌil chiꞌ, syacꞌoch sbꞌa ebꞌ dꞌa yol in cꞌabꞌ.
45 Tzꞌibꞌxiqꞌue ebꞌ yuj xivelal ayic tzꞌelta ebꞌ dꞌa yol scuartel.
46 Ach Jehová pitzan ach. Ach in Columal, alchajocabꞌ vachꞌ lolonel dꞌayach. Ach Dios in Columal, icꞌjocabꞌ chaan̈ a bꞌi.
47 A ach tzacꞌ yojtaquejel ebꞌ tzin ixtani to ayach och vedꞌoc. Tzicꞌancot ebꞌ chꞌoc chon̈abꞌil dꞌa yalan̈ in mandar.
48 A ach tzin a colel dꞌa yoval scꞌool ebꞌ ayoch ajcꞌolal dꞌayin, aton ebꞌ schichon scꞌool dꞌayin. Mamin, tzin a colanpax dꞌa ebꞌ comonn̈ej smacꞌan anima.
49 Yuj chiꞌ jun, sval vachꞌ lolonel dꞌayach dꞌa scal juntzan̈ nivac chon̈abꞌ, tzin bꞌitan pax a bꞌi.
50 Uuj val, svacꞌ ganar nivac oval a in rey in tic, a in sicꞌbꞌil in el uuj. Dꞌa masanil tiempo tza chꞌox a vachꞌcꞌolal dꞌayin a in David in tic yedꞌ dꞌa ebꞌ vin̈tilal icha ajnac alani.