A snivanil yelcꞌoch Dios
Sbꞌit jun tic vin̈aj David.
19
A satchaan̈ yedꞌ masanil tas ay dꞌay, a schꞌoxanel sbꞌinajnaquil Dios, schꞌoxanel svachꞌil smunlajel.2 Junjun cꞌu, junjun acꞌval schꞌoxjiel sjelanil yuj tastac ay dꞌa satchaan̈.
3 Vachꞌchom malaj junoc lolonel tzꞌabꞌchaji, malaj pax junoc jaj tzꞌabꞌchaj yochi,
4 palta sbꞌeybꞌat yabꞌixal Dios dꞌa masanil sat luum tic, masanto bꞌaj slajvicꞌoch masanil yolyibꞌan̈qꞌuinal tic.
A dꞌa satchaan̈, ataꞌ ay cꞌu yuj Dios.
5 Icha val junoc vin̈ quelem ato val snupnaji, stzalaji tzꞌelta dꞌa yol scuarto, icha chiꞌ sjavi cꞌu. Ma icha junoc vinac te ay yip stzalaj scꞌool ayic sbꞌat dꞌa smunlajel.
6 Sqꞌueul yoc cꞌu dꞌa yichchaan̈, sbꞌatxican dꞌa bꞌaj tzꞌemxicani, malaj junoc tas syal scolan sbꞌa dꞌa scꞌacꞌal.
7 A val scꞌaybꞌubꞌal Jehová malaj jabꞌoc spaltail, tzꞌacꞌji quip yuuj. A schecnabꞌil te yel, syacꞌan sjelanil ebꞌ mantalaj spensar.
8 A tas syal Jehová, te vachꞌn̈ej yaji, stzalajbꞌi co cꞌool yuuj. A sley Jehová, tojol toni, sjacvi co pensar yuuj.
9 A emnaquilal dꞌa Jehová te vachꞌn̈ej, ayn̈ejecꞌ dꞌa juneln̈ej. A tas nabꞌil yuj Jehová te yel, tojol toni.
10 Yelxo val te nibꞌabꞌil dꞌa yichan̈ qꞌuen oro te vachꞌ. Yelxo val te chiꞌ dꞌa yichan̈ nocꞌ yal chabꞌ ayoch dꞌa yedꞌtal.
11 Cachnabꞌil pax yaj dꞌayin a in a checabꞌ in tic. Tato tzin cꞌanabꞌajej a lolonel chiꞌ, vachꞌ ol in elcꞌoch yuuj.
12 ¿Tom ay junoc mach syal yilan sbꞌa dꞌa spaltail? Mamin Jehová, acꞌ in nivancꞌolal yuj juntzan̈xo in paltail max vil in cꞌulani.
13 Man̈ a cha vacꞌoch in bꞌa dꞌa scal chucal. Man̈ a cha yacꞌ yajalil chucal chiꞌ dꞌayin. Icha chiꞌ max och in mul, malaj junoc in chucal dꞌa yol a sat.
14 Mamin Jehová in Columal ach, in Tan̈vumal ach, chabꞌilocabꞌ uuj tas svalaꞌ yedꞌ tas tzin naꞌa.